1 Timothy 1

Mazanderani GMB (گیله ماز)

Jump to: Chapter 2 →

1پولُس طرفِ جی که اَمیِ نِجات دَهَنده خُدایِ حُکمِ هَمرَه، و اَمیِ اُمید مسیحْ عیسی، مسیحْ عیسی یِه رَسولِ؛

2تیموتائوسِ وَسین، می حَقیقی ریکا ایمان دِلِه: فیض و رَحمَت و صُلح و سلامتی خُدای پیَر و اَمیِ خُداوند مسیحْ عیسی یِه طرفِ جی شِمِرِه بیه.

3هَمونجورکه وختی مقدونیه یه منطقه دَبام بوشوم، تی جی خواهِش هَکُردَم، یِدَفِه دیگه باز تی جی خَنَم که اَفِسُسِ شهرِ دِلهِ بُمانی تا بعضیان رِه دَستور هَدی که هیچ جورواجورِ تعلیمی نَدِن.

4وَ خودِشان رِه اَفسانه و شجره‌ نامه‌هایی که تَمام نَبونه یه هَمرَه مشغول نَکونَن، این چیزان، عوضِ اینکه خُدایِ کارِ که ایمان راه دِلِه دَرِه پِیش بَبِره، جَر و بحثِ باعث بونَن.

5اَمیِ منظور این دستورِ جی محبَتِ، مُحبتی که پاکِ دِل و خُجیرِ وجدان و خالِصِ ایمان جی هَنه.

6بعضیان این چیزانِ جی رو وَگِرداندِن، بیخُدی گَبانِ دُمّال بَشَن.

7خَنِن شَریعَتِ مُعَلِمین هَبون، بی اینکه بِدانَن چی گونَن یا چی یه جی اینجور مُطمَئِن گَب زَنِن.

8اَسِه، اَما دانیم که شریعَت خُجیرِ، اَگِه کَسی اونِهِ به دُرسّی عمل هَکونه.

9و دانیم که شریعت، صالِح آدمانِ وَسین نییِه، بلکِه اوشانه وَسین که قانون‌ِ اِشکَنِن و نافرمانان، بی‌دینان و گُناهکارانِ وَسینِ، اوشانه وَسین که مُقدس نییَن و اوشانه وَسین که کُفر گونَن؛ اوشانه وَسین که خودِشانِه پیَر و مارِ کُشِنِن؛ آدمکشانِ وَسین،

10زَناکارِان و لواط گَرانِ وَسین؛ اوشانیکه بَردِه خرید و فِروش کانَن، دِروزَنان، اوشانیکه دروئی قسم خارنَن، و هر چی که دُرسِّ تعلیم علیِه هیسه،

11اون تعلیمی که طِبقِ، خُدایِ مُبارکِ پُرجلالِ اِنجیل که مَرِه بِسپارِسِّه هَبا.

12اَمیی خُداوند مسیحْ عیسی رِه شُکر کانَم که مَرِه قُوَّت هَدَه چون مَرِه وفادار دَانِسِّه و مَرِه خودِشِه خِدمَت وَسین تعیین هَکُردِه.

13با اینکه پیشتَر کُفر گونه بام، عذاب دَنِه بام و توهین کانِه بام، ولی مَرِه رَحم هَبا، چون بی ایمانی یه دِلهِ نادانی کانه بام.

14و اَمیِ خُداوندِ فیض، اون ایمان و مُحبتِ هَمرَه که مسیحْ عیسی یِه دِلهِ دَرِه، فَراوانی یه هَمرَه می سَر بَریخته هَبا.

15این گَب قابل اعتماد و هر طرفِ جی قابلِ قَبولِ، که مسیحْ عیسی این دُنیایِ دِلِه بوما تا گُناهکارانِ نِجات هَدِه، که من اوشانه دِلِه گَت تَرینَم.

16ولی اینهِ خاطری مَرِه رَحم هَبا تا مسیح عیسی خودشه کامِلِ صَبر رِه، مَرِه که گُناهکارانِ دِلِه گَته تَرین بام، نِشان هَدِه، تا اوشانِ رَه که زندگی اَبدی یه وَسین اونه ایمان هارنَن، سَرمشق هَبوُم.

17اَسِه، اون پادشاهِ دوران، اونکه تا اَبد دَرِه و نَشَئنِه اونِه بَدییَن، اون ایتا خُدا، تا اَبد و تا اَبد حُرمَت و جلال هَبو؛ آمین!

18می وَچِه، تیموتائوس، این حُکمِ طبقِ اون نَبُوّت هایی که پیشتَر تی بارِه باَگوته هَبا با، تِرِه اِسِپاردِنَم، تا اوشانِ طریق اون خُجیرِ جنگِ انجام هَدی،

19ایمان و خُجیرِ وُجدانِ بَچِسب. چون بَعضیان ایشانِ رَد هَکُردَنِ هَمرَه اوشانه ایمان کَشتی بِشکِسِّه.

20هیمِنائوس و اسکندر این دسِّه یه جییَن، که اوشانه شِیطانِ دَس بِسپارِسَّم تا یاد هَگیرَن که دِ کُفر نُگون.

Jump to: Chapter 2 →