1 Timothy 6

Mazanderani GMB (گیله ماز)

← Chapter 5 Jump to:

1تمام اوشانیکه پاکاری یه گاجمه جیر دَرِن، بایسّی خودِشانِه اَربابانِ کامِلاً احترام بَنِن تا مردُم خُدای اِسم و اَمیِ تعلیم علیِه بَدِ چی نَگون.

2اوشانیکه اوشانه اَربابان ایماندارِن، نباید اَداش هَبوسَّن خاطری، اوشانه کمتر حُرمت بَنِن. بلکه بایسّی اوشانه بِهتَر خِدمَت هَکُنَن، چون اوشانیکه این خِدمتِ دِلهِ منفعت بَرنِن، ایماندار و عزیزِن. این چیزانِ اوشانه تعلیم هَدِه و اوشانه تشویق هَکُن که اینجوری هَکُنَن.

3اَگِه ینفر یِجور دیگه تعلیم هَدِه و اَمیی خُداوند عیسیِ مَسیح دُرسِّ کلام و اون تعلیم هَمرَه که دینداری یه راهِ دِلِئه جور دَرنییِه،

4اونه غرور بِیته و هیچی نِفَهمِنِه. اینجور آدمِ، جنگ و جدال و دعوا مرافه کَلماتِ سَر داره، که اونه جی حَسودی و دعوا و توهین و بَد گَمانِی وَرِسِنِه،

5وَ همَش مَردمِ میَن جنگ و جدالِ باعث بونه که اوشانِ فکر فاسد هَبا و حَقیقَتِ جی دور هَبان، خیال کانَن دینداری ایتا وَسیلِه منفعتِ وَسین هیسه.

6وَلی دینداری قِناعتِ هَمرَه، گَتِه مَنفعتِ.

7چون اَما هیچی این دُنیایِ دِلِه نیاردیم و هیچی هَم نَتَّنیم این دُنیایِ جی بَبِریم.

8پَس اَگِه اَما خوراک و لِواس داریم، ایشانهِ وَسین قانِعیم.

9وَلی اوشانیکه پولدار هَبوسَّنِ آرزو رِه دارَن، وَسوَسه یه دِلِه و پوچ و هوا وهَوَسِ تَلِه یه دِلِه دَکِنِن که ضرر رِساندِنَن، که مردُمِ نابودی و هلاکتِ سمت کِشاندِنِه.

10چون پولدوسی ریشه ایی یه که هر جور بَدی اونه جی به بار هَنِه، و هَمین پولِ حِرصِ که بعضیان ایمان جی دور بونَن، و خودِشان رِه خیلی دَردایِ گِرفتار هَکُردَن.

11وَلی تو که مَردِ خُدایی، این چیزانِ جی فَرار هَکُن، و صالحی، دینداری، ایمان، مُحبت، پایداری و مُلایمتِ دُمّال دَبو.

12ایمان خُجیرِ جنگِ دِلِه جنگ هَکُن. اون زندگی اَبدی که اونِ وَسین دُخوانِسِّه هَبَین و اونِه خیلی شاهدانِ ور اعتراف هَکُردی رِه بَچِسب.

13مَن خُدایِ وَر که هَمِه چیرِه زندگی دَنه، وَ مسیحْ عیسی که پُنتیوس پیلاتُسِ وَر خُجیرِ اعتراف هَکُردِه، جِدّی تِرِه سِفارِش کانَم

14که این حُکمِ تا اَمی خُداوند عیسی مَسیح بَموئَنِ موقِه، بی‌ عیب و بی سرکوفت بِداری،

15که خُدا اونِه ایتا خُجیرِ وَخت دِلِه انجام دَنه، اونیکه مُبارک هیسِه و تنها حاکِم، شاه شاهان وخُداوندِ خُداوندانِ.

16فقط اونه که اَبدیِه، اونیکه ایتا نورِ دِلِه دَرِه که نَشَئنِه اونه نِگاه هَکُردَن، و هیچکس اونه نَدییَه و نَتَّنِه بِینهِ، حرمت و سلطنت تا اَبد اونه هَمرَه دَبو. آمین.

17این دُنیایِ پولدارانِ باگو که مغرور نَبون، و خودِشانِه اُمیدِ این دُنیایِ مالِ سَر نُذارَن که نُماندِنه. بلکه اوشانه اُمید خُداییِ رِه هَبو که همه چیره فَت و فَراوان اَمی وَسین فَراهَم کانه تا اوشانه جی کِیف هَکُنیم.

18اوشانه دستور هَدِه که خوبی هَکُنَن، خُجیرِ کارانِ دِلِه دولتمند هَبون، بخشنده و دَس و دلباز هَبون.

19اینجوری، خودِشانِ وَسین ایتا گَنج اَمبار کانَن که آیندِه یه وَسین ایتا خُجیرِ پِی هیسه تا بِتَّنَن اونچه که حقیقی زندگي هیسِه رِه بِدَس بیارِن.

20اِی تیموتائوس، اون امانتی که تِرِه بِسپارِسِّه هَبا رِه حِفظ هَکُن. مُفتِ گَبانِ جی و مخالفِ فِکرای جی که اشتباهی، معرفت دُخوانده بونه، دوری هَکُن؛

21چون بعضی آدمان که این چیزانِ دِلِه اِدعا دارَن، ایمان جی دور هَبان. فیض شِیمی هَمرَه دَبو.

← Chapter 5 Jump to: