John 21

Mazanderani EMB (کتاب مقدس به زبان مازندرانی - گویش شرقی)

← Chapter 20 Jump to:

1بَعدِ از این اتّفاقا، عیسی اَت کَش دییه تیبِریهِ دریائه پَلی که هَمون جَلیلِ دریا بییه، شه ره شاگِردونِ وِسه دیار هاکارده. وه این طی شه ره دیار هاکارده:

2یِتا روز شَمعونِ پِطرُس، توما که وه ره دِقِلو گاتِنه، نَتَنائیل اَهل قانای جلیل، زِبدیِ ریکائون و دِتا شاگردِ دییه با هم دَینه.

3شَمعونِ پِطرُس وِشونِ بااوته: «مِن شومبه مائی بَیرِم.» وِشون بااوتِنه: «اِما هم تِ هِمراه اِمبی.» پَس بیرون بُوردِنه، لَتکا سِوار بَینه. ولی اون شو هیچی مائی نَییتِنه.

4زودِ صِواحی، عیسی دریالو اِیست هاکارده بییه؛ ولی شاگِردون نِفَهمِسِنه وه عیسی ئه.

5عیسی وِشونِ بااوته: «وَچون، هیچ مائی بَییتینی؟» جِواب هِدانه: «نا!»

6عیسی بااوته: «تورِ لَتکائه راسِ طَرِف دِم هادین که گِرنِنی.» وِشون این طی هاکاردِنه و اَنده مائی زیاد بییه که دییه نَتونِسِنه تورِ لَتکائه دِله بَکِشِن.

7اون شاگِردی که عیسی وه ره دوس داشته، پِطرُسِ بااوته: «خِداوندِ!» شَمعونِ پِطرُس وَختی بِشنُسه خِداوندِ، شه جِمه ره دَپوشیه - چوون جِمه ره کارِ وِسه شه تَن جِم دَر بیارده بییه - و شه ره دریائه دِله دِم هِدا بییه.

8دییه شاگِردون هَمون طی که تورِ پِر از مائی ره شه دِمبال کَشینه لَتکائه هِمراه بییَمونه، چوون وِشون دریالوِ جِم دور نَبینه و حدودِ صد متر فاصله داشتِنه.

9وَختی دریالو بَرِسینه، بَدینه یِتا تَش، زغالِ هِمراه رووشِنِ و وه سَر مائی دَره، و نونِم دَره.

10عیسی وِشونِ بااوته: « اون مائی هائه جِم که اَلان بَییتِنی، بیارین.»

11شَمعونِ پِطرُس لَتکا دِله بُورده و تورِ دریالو بَکِشیه. تور گَت گَتِ ماهیِ جِم پِر بییه، صد و پِنجاه و سه تا مائی تور دِله دَییه، با اینکه تور دِله خَله مائی دَییه ولی تور پاره نَییه.

12عیسی وِشونِ بااوته: «بِئین صِبونه بَخُرین.» شاگِردونِ جِم هیچ کِدوم جِرأت نَکاردِنه وه جِم بَپِرسِن، «تِ کی هسی؟» چوون دونِسِنه خِداوندِ.

13عیسی جلو بییَمو، نون و مائی ره بَییته و وِشونِ هِدا.

14این سِوّمین کَشی بییه که عیسی بعد از زنده بَییِن، شه ره شاگِردونِ دیار کارده.

15بعد از صِبونه، عیسی شَمعونِ پِطرُسِ جِم بَپِرسیه: «ای شَمعون، یوحَنائه ریکا، مِ ره اینائه جِم ویشتر دوس دارنی؟» وه جِواب هِدا: «اَره آقا؛ تِ که دوندی تِ ره دوس دارمه.» عیسی وه ره بااوته: «مِ وَره ها ره خِراک هاده.»

16دِوّمین کَش عیسی وه جِم بَپِرسیه: «ای شَمعون، یوحنائه ریکا، مِ ره دوس دارنی؟» شمعونِ پِطرُس جِواب هِدا: «اَره آقا؛ دوندی که تِ ره دوس دارمه.» عیسی بااوته: مِ گُسفِنا ره چَپونی هاکان.»

17سِوّمین کَش عیسی وه ره بااوته: «ای شَمعون، یوحنائه ریکا، مِ ره دوس دارنی؟» پِطرُس از اینکه عیسی سه کَش وه جِم بَپِرسیه، «مِ ره دوس دارنی؟» نارِحَت بَییه و بااوته: «آقا، تِ همه چیِ جِم خَوِر داری؛ تِ که دوندی تِ ره دوس دارمه.» عیسی بااوته: «مِ گُسفِنا ره خِراک هاده.»

18حییقَتاً، تِ ره گامبه، وَختی که جِوون تَر بیئی شه کَمِر وَسّی و هر جا خواسی شیئی؛ ولی وَختی پیر بَووی شه دسا ره واز کاندی و یه نَفِر دییه تِ کَمِرِ وَندِنه و تِ ره جایی که نِخوانی بُوری وَرنه.»

19عیسی اینِ بااوته تا پِطرُس بَدونه، چی طی مییِرنه و خِدا ره جِلال دِنه. بعد عیسی وه ره بااوته: «مِ دِمبال بِرو.»

20اون وَخت پِطرُس بَردَگردِسه و بَدیئه اون شاگِردی که عیسی وه ره دوس داشته وِشونِ دِمبال اِنه. وه هَمونتا بییه که شُومِ سَر، عیسیِ پلیه وَر تَکیه هِدا بییه و وه جِم بَپِرسی بییه، «آقا، کی تِ ره دِشمِنِ تَسلیم کانده؟»

21وَختی پِطرُس وه ره بَدیئه، عیسی جِم بَپِرسیه: «آقا، پَس وه سَر چی اِنه؟»

22عیسی پِطرُسِ بااوته: «اگه بِخوائم تا مِ بَردَگِردِسِنِ مووقه وه زِنده بَمونه، تِ ره چیه؟ تِ مِ دِمبال بِرو!»

23پَس این گَب، بِرارونِ دِله دَپیته که اون شاگرد نَمیرنه، در صورتی که عیسی پِطرُسِ نااوته که وه نَمیرنه، بلکه بااوته «اگه بِخوائم تا مِ بَردَگِردِسِنِ مووقه زِنده بَمونه، تِ ره چیه؟»

24این هَمون شاگردِ که این چیا ره شِهادت دِنه و اینا ره بَنوِشته. اِما دومبی که وه شِهادت راسِ.

25عیسی خَله کارائه دییه هم هاکارده که اگه یِتا یِتا بَنوِشته بونِسه، گِمون نَکامبه حَتَّی تِمومِ دِنیائه کتابا هم تونِسنه اون نوشته ها ره شه دِله جا هادِن.

← Chapter 20 Jump to: