Colossians 4

Dutch Frisian

← Chapter 3 Jump to:

1Jie Harren, jäwt jüne Sklowe waut rajcht en billijch daut ahn trafende es, doa jie weete, daut uck jie eenen Harrn em Himmel ha.

2Aum Jebäd hoolt staunthauft faust, woakt doarenn met Dank saje,

3en bäd toojlitj uck fe ons, daut Gott ons eene Däa fe daut Wuat opmoakt, omm daut Jeheemniss von Tjristus too räde, doawäajen etj uck jebunge sie,

4doamet etj daut openboa moak, woo etj räde saul.

5Waundelt enn Weissheit jäjenäwa dän, dee büte send, en tjeept de Tiet üt.

6Jun Räde saul auletiet enn Leeftol Jnod met Solt jewerzt, omm too weete, woo jie jiedem eenem auntwuade selle.

7Aules, waut mie aunjeit, woat Tiechikus jünt bekaunt moake, dee jeleefta Brooda en trüa Deena en Mettjnajcht em Harrn,

8däm etj jrod doawäajen no jünt jeschetjt ha, omm daut hee jüne Ommstende erfoaht en jüne Hoate treestet,

9met Onesimus, däm trüen en jeleeften Brooda, dee von jünt es; see woare jünt aules bekaunt moake, waut hia väajeit.

10Aristarkus, lat jünt jreese, mien Metjefangna, en Markus, de Vada von Barnabas, wäajen däm jie Befäl jetjräaje ha, wann hee no jünt tjemmt, nämt am opp,

11en Jesus, Jusstus jenant, dee üt de Beschniedunk send. Dise auleen send Metoabeida fe aum daut Ritj Gottes, dee mie een Troost jeworde send.

12Epafras lat jünt jreese, dee von jünt es, een Tjnajcht Tjristus Jesus, dee emma fe jünt tjampft emm Jebäd, doamet jie vollkohme en gauns äwazeijt enn aulem Welle Gottes stohne.

13Soo bezeij etj am, daut hee väl Mäj haft omm fe jünt en dee enn Laodizäa en dee enn Hierapolis.

14Lukas lat jünt jreese, dee jeleefta Dokta, en Deemas.

15Jreest de Breeda enn Laodizäa, en Nimfas en de Jemeende, de enn sienem Hüs es.

16En wann de Breef bie jünt jeläse es, soo moakt, daut dee uck enne Jemeende de Laodizäa jeläse woat, en daut uck jie dän üt Laodizäa läse;

17en sajcht too Archipus: Seeh, opp däm Deenst, dän dü em Harrn äwanohme emfange hast, daut dü däm erfällst.

18De Gruss met miene, Paulus, Haunt. Dentjt aun miene Fassle. De Jnod es met jünt!

← Chapter 3 Jump to: