1 Samuel 18

Nuer Bible © Bible Society in South Sudan 1998,2012

← Chapter 17 Jump to: Chapter 19 →

1Kä mëë cɛ thuɔ̱k kɛ ruac kɛ Thɔɔl, cu Jo-na-than Ɛ nhɔk ce̱tkɛ puɔ̱nydɛ.

2Kä cuɛ cu te kɛɛl kɛn ɛ Thɔɔl niɛ cäŋ ɔ, /kenɛ jɛ lɛ nhök loc dhɔr gua̱n.

3Kä cu Jo-na-than ruac mat kɛnɛ Dee-bid, kɛ ɣöö nhɔkɛ jɛ ce̱tkɛ puɔ̱nydɛ.

4Kä cu Jo-na-than bi̱i̱dɛ in te puɔ̱ɔ̱nydɛ ka̱m Dee-bid, kɛnɛ thɛpdɛ, kɛ bäärɛ, amäni la̱a̱kdɛ bä.

5Kä gua̱th diaal tin la Thɔɔl Dee-bid a jäk kä thi̱n, la gɔwkɛ kɛ jɛ. Cu Thɔɔl jɛ cu jak kä bo̱o̱th rɛ̈m. Kä cu lo̱c nɛɛni diaal tɛɛth, amäni bööth Thɔɔl bä.

6Kä min luny Dee-bid jɔk näk ran Pi-li-thɛt, cu män ben raar rɛy wi̱i̱ni I-thɛ-rɛl diaal, bäkɛ kä kuäär ni Thɔɔl tuarkɛ kä duthkɛ, kɛ tuaari tɛthkä lɔaac kɛ buɔ̱l.

7Kä min duthkɛ, cukɛ tuar i̱, “Ci Thɔɔl nɛy ti bathdɔɔr näk, Kä ci Dee-bid nɛy ti bathdɔɔri wäl näk.”

8Kä cu Thɔɔl kɛ̈c ɛlɔ̱ŋ, kɛ ɣöö ci ruac ɛ mɔ lɔcdɛ lo̱k. Kä cuɛ wee i̱, “Laar kɛnɛ Dee-bid tëë bathdɔɔri wäl, kä ɣän ta̱a̱ kɛ bathdɔɔr. Kä ɛŋu derɛ ku lɛ jek ɔ ciɛ ni kuäär?”

9Niɛ cäŋ ɛmɔ cu Thɔɔl Dee-bid tit.

10Mëë ruɔ̱ndɛ cu yiëë mi jiääk mi bä kä Kuoth ben kä Thɔɔl, cuɛ yɔ̱ŋ niɛ dhɔrɛ, kä puɔ̱ɔ̱t Dee-bid thom ce̱tkɛ min wen. Kä Thɔɔl te mutdɛ tetädɛ,

11Kä cuɛ mutdɛ kal nhial kiɛ riw, larɛ jɛ kɛ lɔcdɛ i̱, “Bä Dee-bid yiath puɔ̱ɔ̱ny duëël.” Duundɛ ɣöö cu Dee-bid ɛ kɔl ni kä rɛɛw.

12Dual Thɔɔl kɛ Dee-bid, kɛ ɣöö ci Kuoth Nhial jiɛɛn kä jɛ, kä tëë kɛɛl kɛ Dee-bid.

13Cu Thɔɔl Dee-bid woc kutdɛ, kä cuɛ jɛ jak kä bo̱o̱th bathdɔɔrä. Kä cu Dee-bid nɛɛkɛ bo̱th ko̱o̱r.

14Kä cu tëë diaal tëë cɛ la̱t gɔw, kɛ ɣöö te Kuoth Nhial kɛɛl kɛ jɛ.

15Kä mëë ci Thɔɔl ɛ nɛn i̱ gɔw ti diaal kɛ jɛ cuɛ dual kɛ Dee-bid.

16Kä cua Dee-bid nhɔk ɛ ji̱ I-thɛ-rɛl diaal kɛnɛ ji̱ Juda. Kɛ ɣöö cɛ kɛ böth ko̱o̱r.

17Ɛ jɛn cu Thɔɔl Dee-bid jiök i̱, “Nyaadä min di̱i̱t ni Me-rɛ̈b ɛn. Ɣän bä ka̱m ji̱ ala ciekdu. Bi lät ni ɣä ikä kɛ buɔ̱m, tɛr ko̱o̱ri Kuɔth Nhial.” Kɛ ɣöö car Thɔɔl ɛ kɛ lɔcdɛ i̱, “A jɛ /cä näk ɛ ɣän, a jɛ na̱kɛ ɛ ji̱ Pi-li-thɛt.”

18Kä cu Dee-bid Thɔɔl loc i̱, “Ɛ ɣän ŋa kä ɛ dhɔra mia̱a̱ ni kä I-thɛ-rɛl, min dëë ɣän a cɔw nyaa Kua̱r kɛ jɛ?”

19Kä kɛ gua̱a̱th in dëë Me-rɛ̈b nyaa Thɔɔl ka̱m Dee-bid, cua ka̱m Ɛ̈d-ri-el raan Mɛ-ɣo-lath ala ciekdɛ.

20Kä täämɛ cu Mi-kal nyaa Thɔɔl Dee-bid lɛ nhɔk. Kä cua la̱r Thɔɔl, kä cuɛ lɔcdɛ nhɔk.

21Kä cu Thɔɔl ɛ lɛni car kɛ lɔcdɛ wee i̱, “A jɛ ka̱mä jɛ, dɔ̱ŋ ba mi ka̱a̱pä ni jɛ, dɔ̱ŋ ba jɛ cu näk ɛ ji̱ Pi-li-thɛt.” Kɛ kui̱c ɛmɔ cu Thɔɔl Dee-bid nyɔk kɛ jiök i̱, “Ɛn täämɛ bia̱ cɔw nyaadä.”

22Kä cu Thɔɔl la̱a̱tkɛ jiök i̱, “Ruacɛ kɛ Dee-bid gekä, jiökɛ jɛ i̱ ‘Kuäär tɛth lɔcdɛ kɛ ji̱, kä bööthkɛ diaal nhɔakɛ ji̱ ɛn täämɛ, kua̱ cɔw nyaa kua̱r.’ ”

23Kä cu la̱a̱t kua̱r ruac ɛmɔ lat ji̱th Dee-bid. Kä cu Dee-bid wee i̱, “Guic yɛn ɛ täämɛ ɛ mi tɔt ɛn ɣöö bia̱ cɔw nyaa kua̱r, guɛcä jɛ kä ɣä /cɛ bi ben, ɛ ɣän can mi /ca ŋäc?”

24Kä cu bööth Thɔɔl la̱r min ci Dee-bid ɛ lar.

25Kä cu Thɔɔl kɛ jiök i̱, “Wiaa jiök ɛ jɛ i̱ ‘Ɛ kuäär i̱ thilɛ ɣɔ̱k kuën ti göörä, göörä ni ɣöö bi nɛy ti kuɔ̱r näk kä ji̱ Pi-li-thɛt ti /ka̱n cuɛl, kɛ ɣöö ba cut kua̱r kä ji̱ tɛ̈rɛ.’ ” Nɔmɔ ɛ ca̱p mi ci Thɔɔl ɛ la̱t kɛ ɣöö ba Dee-bid cu näk ɛ ji̱ Pi-li-thɛt.

26Kä min ci bööth Thɔɔl laat ti̱ti̱ ben la̱t Dee-bid, cuɛ lɔcdɛ nhɔk ɛlɔ̱ŋ kɛ ɣöö ba cɔw nyaa kua̱r, a /ken kuën ni ben.

27Cu Dee-bid kɛnɛ nɛɛkɛ wä cua ji̱ Pi-li-thɛt ti kur rɛw näk. Kä cuɛ nɛy ti /ka̱n cuɛl gupkiɛn ŋok kä cuɛ kɛ nööŋ, kä cuɛ kɛ thöp kuäär ni kɛ pekdiɛn kɛɛliw, kɛ ɣöö ba cɔw nyaa kua̱r. Kä cu Thɔɔl ɛ ka̱m nyadɛ ni Mi-kal ala ciekdɛ.

28Kä mëë ci Thɔɔl ɛ ŋa̱c ɛn ɣöö Kuoth Nhial te kɛɛl kɛ Dee-bid, kä nhɔakɛ jɛ ɛ nyadɛ ni Mi-kal,

29Cu Thɔɔl ŋot kɛ dual kɛ Dee-bid. Kä cua gua̱n tɛ̈rɛ ni ciaŋ.

30Kä la kua̱r rɛ̈m ji̱ Pi-li-thɛt a bä ko̱o̱r, ce̱tkɛ min wen, kä Dee-bid la nyinkɛ a reep ni rɔ kɛ gɔɔy kä bööth Thɔɔl tin kɔ̱ŋ. Kɛ kui̱c ɛmɔ cua ciötdɛ ŋa̱c ɛlɔ̱ŋ.

← Chapter 17 Jump to: Chapter 19 →