1 Samuel 19

Nuer Bible © Bible Society in South Sudan 1998,2012

← Chapter 18 Jump to: Chapter 20 →

1Kä cu Thɔɔl ruac kɛ gatdɛ ni Jo-na-than kɛ bööthkɛ diaal ɛn ɣöö ba Dee-bid näk. Duundɛ ɣöö Jo-na-than gat Thɔɔl nhɔkɛ Dee-bid ɛlɔ̱ŋ.

2Kä cuɛ ben la̱r Dee-bid i̱, “Gua̱a̱r go̱rɛ näkdu. Kɛ kui̱c ɛmɔ tit rɔ i̱ ruun kɛ runwaŋ, teeyni rɔɔdu guäth mi /ca ŋäc.

3Kä bä wä kɔnɛ gua̱a̱r ba̱kɔ wä cuɔ̱ŋ rɛy ka̱a̱kni guäth in ti̱i̱ thi̱n, kä bä ruac kɛ gua̱a̱r kɛ kui̱du. Mi tëë kɛ mi cä ŋa̱c bä la̱r ji̱.”

4Cu Jo-na-than ruac agɔaa kɛ gua̱n kɛ kui̱ Dee-bid, wee i̱, “Kuäär cu ja̱ŋdu ni Dee-bid lät kä mi jiääk. Kɛ ɣöö thilɛ mi jiääk mi cɛ lät kä ji̱, kɛ ɣöö tin diaal tin cɛ la̱t gɔwkɛ kɛ ji̱ ɛlɔ̱ŋ.

5Kɛ ɣöö jɛn cɛ tëkdɛ thöp mëë näkɛ raan Pi-li-thɛt cu Kuoth Nhial juc ka̱m ji̱ I-thɛ-rɛl diaal. Ciɛ nɛn, kä ci lɔcdu tɛɛth kɛ jɛ. Ɛŋu go̱o̱ri ɣöö lätdi duerɔ kɛ näk Dee-bid mi thil duer ɔ?”

6Kä cu Thɔɔl ruac gatdɛ liŋ, kä cuɛ rɔ yac i̱, “Ce̱tkɛ mɔ tëk Kuoth Nhial ɔ, ca jɛ bi näk.”

7Kä cu Jo-na-than Dee-bid cɔl, kä cuɛ jɛ la̱t ti diaal. Kä cuɛ Dee-bid nöŋ gua̱n, kä cu Dee-bid te kɛɛl kɛ jɛ nikɛ ta̱a̱ ëë wen.

8Kä cuɛ tekɛ ko̱r mi dɔ̱ŋ, cu Dee-bid wä nyiëëny kɛ ji̱ Pi-li-thɛt, kä cuɛ näk ɛlɔ̱ŋ rɛydiɛn, kä cukɛ rɔ bar nhiamdɛ.

9Kä cu yiëë mi jiääk mi bëë kä Kuoth Nhial ben kä Thɔɔl, tëë nyuurä dhɔɔrɛ a te mutdɛ tetädɛ, kä puɔ̱ɔ̱t Dee-bid thom.

10Cu Thɔɔl ɛ car i̱ derɛ Dee-bid Yiath puɔ̱ɔ̱ny duëël kɛ mut. Duundɛ ɣöö cu Dee-bid ɛ kɔl a bi mut cuit puɔ̱ɔ̱ny duëël. Cu Dee-bid riŋ, barɛ rɔ.

11Kɛn wär ɛ mɔ cu Thɔɔl naath jäk kä dhɔr Dee-bid ti wa jɛ guic, kɛ ɣöö derɛ jɛ näk kɛ runwaŋ. Duundɛ ɣöö cu Mi-kal, ciek Dee-bid ɛ la̱r Dee-bid i̱, “Mi ci rɔ bar ɛn wääri, kä ba ji̱ näk i̱ ruun.”

12Kä cu Mi-kal Dee-bid jak kä coth raar kɛ wernyin. Kä cuɛ rɔ bar, lënyɛ rɔ.

13Kä cu Mi-kal mi ce̱tkɛ puɔ̱ny ka̱n, kä cuɛ jɛ tɔa̱a̱c rɛy dhaŋä, kä cuɛ cääk mi ca la̱t kɛ miem böwä cak wi̱i̱dɛ, kä cuɛ jɛ kum kɛ bi̱i̱.

14Kä mëë ci Thɔɔl naath ja̱k i̱ wa Dee-bid nööŋ, cu Mi-kal wee “Tëë juey.”

15Kä cu Thɔɔl naath ja̱k i̱, “Wiaa ka̱pɛ jɛ wa̱nɛ mi kɛ dhaŋ, kä bä ben näk.”

16Kä min ci ja̱a̱k ben duëël, nɛ̈nɛ jɛ, cukɛ jek ni puɔ̱ny in daan rɛy dhaŋä, a te the̱nɛ min ca la̱t kɛ miem böwä wi̱i̱dɛ.

17Kä cu Thɔɔl Mi-kal jiök i̱, “Ɛŋu kaaŋi ɣä i̱ nɔmɔ, a bi gua̱n tɛ̈rä jak kä wä, a lënyɛ rɔ mɔ?” Kä cuɛ jɛ loc i̱, “Cɛ ɣä jiök i̱, ‘Jak ni ɣä kä wä. /Cä jɛ go̱o̱r i̱ bi näk?’ ”

18Cu Dee-bid rɔ lɛ̱̈ny ni kä Tha-muɛl kä Rama, kä cuɛ jɛ la̱t ti diaal tin ci Thɔɔl kɛ lät kä jɛ. Kä cukɛ wä cieŋ kɛnɛ Tha-muɛl kä Na-yoth.

19Kä cua la̱r Thɔɔl i̱, “Dee-bid a kä Na-yoth kä Rama.”

20Kä cu Thɔɔl naath jäk kä Dee-bid. Kä mëë cikɛ buɔ̱n göökni nɛn latkɛ nyin go̱o̱kä, kä te Tha-muɛl cuŋä nhiam ala bo̱o̱thdiɛn, cu yiëë Kuɔth ben kä ja̱a̱k Thɔɔl, kä cukɛ nyin go̱o̱kä lat bä.

21Kä mëë ca la̱r Thɔɔl, cuɛ nɛy ti kɔ̱ŋ ja̱k, cukɛ nyin go̱o̱kä lat bä. Kä cuɛ ja̱a̱k ti kɔ̱ŋ nyɔk kɛ jäkni kɛ diɔ̱kdiɛn, kä cukɛ lɛni ruac bä kɛ nyin go̱o̱kä.

22Kä cu puɔ̱nydɛ wä kä Rama, kä cuɛ ben wi̱i̱ jiɛw in di̱i̱t in te kä Cɛ-ku. Kä cuɛ thiec i̱, “Tha-muɛl a ni kɛnɛ Dee-bid?” Kä cu ram kɛl ɛ loc i̱, “Kɛn a kä Na-yoth kä Rama.”

23Kä cuɛ jiɛɛn ɛn wa̱nɔ wee kä Na-yoth kä Rama. Kä cu yiëë Kuɔth ben kä jɛ bä dup, kɛ cuɛ nyin go̱o̱kä lat amäni min cɛ cop kä Na-yoth kä Rama.

24Kä cuɛ rɔ lony a bɛ te juutdä, kä cuɛ nyin go̱o̱kä lat nhiam Tha-muɛl. Kä cuɛ te juutdä kɛ cäŋ kɛnɛ wäär kɛɛliw. Ɛ jɛn min laar kɛ jɛ i̱, “Ɛn Thɔɔl tëë rɛy göökni bä nu?”

← Chapter 18 Jump to: Chapter 20 →