bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nuer
/
Nuer Bible © Bible Society in South Sudan 1998,2012
/
1 Samuel 30
1 Samuel 30
Nuer Bible © Bible Society in South Sudan 1998,2012
← Chapter 29
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 31 →
1
Täämɛ mëë ci Dee-bid ben kä Dhik-lag kɛnɛ nɛɛkɛ. Kɛ diɔ̱ɔ̱k ni̱ni, cu ji̱ Ä-ma-lek Nɛ-gɛb kɛnɛ Dhik-lag ma̱k. Cukɛ Dhik-lag joc kä cukɛ wec waŋ,
2
Cukɛ män pɛc kɛnɛ tin diaal tin te thi̱n, kä cuɛ thil ram mi cua näk, cukɛ naŋ ni ti diaal, kä cukɛ wä dupdiɛn.
3
Kä mëë ci Dee-bid kɛnɛ nɛɛkɛ ben wi̱c, cukɛ jɛ jek a cɛ waaŋ, kä ca mänkiɛn kɛ gaatkiɛn naŋ ala pɛ̈ɛ̈c.
4
Cu Dee-bid kɛnɛ nɛɛkɛ wiee kɛ jɔw mi di̱i̱t. Amäni mëë cɛ ro̱lkiɛn thɔ̱t.
5
Kä män Dee-bid da̱ŋ rɛw cakɛ pɛc bä, Ä-ɣi-no-am kä Yidh-rɛɛl kɛnɛ Ä-bi-ga-yil ciek Na-bal ëë ci li̱w kä Kar-mɛl.
6
Kä cu Dee-bid riɛk ɛlɔ̱ŋ. Duundɛ ɣöö cu Dee-bid rɔ bum kɛ Kuoth Nhial Kuothdɛ.
7
Kä cu Dee-bid Ɛb-ya-thar bo̱o̱th palä gat Ä-ɣi-mɛ-lɛk jiök i̱ “No̱ŋ ni ɣä gaakni.” Cu Ɛb-ya-thar jɛ nöŋ gaakni.
8
Kä cu Dee-bid Kuoth Nhial thiec i̱, “Ɣän bä nɛy tɔ̱tɔ̱ guɔ̱ɔ̱r?” Kä cu Kuoth ɛ loc i̱, “Guuri kɛ. Bikɛ cop, kä bi nɛy tin ca pɛc luäk.”
9
Kä cuɛ jiɛɛn kɛnɛ nɛɛkɛ ti kur bäkɛl, kä cukɛ ben thok yiëër Bɛ-thor, cu tha̱a̱ŋdiɛn duɔth thi̱n.
10
Kä cu Dee-bid kɛ guɔ̱ɔ̱r kɛnɛ nɛy ti kur ŋuaan. Cu nɛy ti kur rɛw duɔth ti /ka̱n yier Bɛ-thor jiath kui̱c kɛ ɣöö cikɛ cuuc.
11
Kä cukɛ raan I-jëp jek thok wec, kä cua jɛ nöŋ Dee-bid. Kä cukɛ jɛ moc mi̱eth mi camɛ, kɛnɛ pi̱ ti bɛ math,
12
Kä cukɛ jɛ moc kɛ töl patdä buɔ̱ɔ̱kä kɛnɛ kar dɛɛni jiɛɛn da̱ŋ rɛw. Kä min cɛ thuɔ̱k kɛ mi̱eth cuɛ yieykɛ jek. Kɛ ɣöö /kenɛ mi̱th kä /kenɛ maath kɛ pi̱ kɛ cäŋdääri diɔ̱k kɛ wääri diɔ̱k.
13
Kä cu Dee-bid ɛ thiec i̱, “Ɛ ji̱n raan nikä? Kä bi nikä?” Kä cuɛ loc i̱, “Ɛ ɣän raan I-jëp, mi läät ji̱ Ä-ma-lek. Ci kuäärä ɣä ba̱ny jɔk kɛ ɣöö cɛ ɣä moc kɛ juey kɛ ni̱n diɔ̱k tëë ci wä.
14
Ca̱kɔ wec ji̱ Kɛ-rith min la duŋ Juda, kɛnɛ wec Ka-leb wä ma̱k, kä ca̱kɔ Dhik-lag cua̱th kɛ mac.”
15
Kä cu Dee-bid ɛ jiök i̱, “Deri ɣä nöŋ nɛy tɔ̱tɔ̱?” Kä cuɛ loc i̱, “Yac rɔ kɛ ciöt Kuɔth Nhial, ɛn ɣöö /ci ɣä bi näk, kä /ci ɣä bi ka̱m kuäärä kɛ ɣöö bä ji̱ ku lɛ nöŋ buɔ̱n ɛ mɔ.”
16
Kä min cɛ Dee-bid naŋ, ɛn buɔ̱n ɛmɔ cikɛ rɔ da̱k piny kɛn diaal rɛy wec. Mi̱thkɛ, kä mäthkɛ, kä ŋarkɛ, kɛ kui̱ kä tin diaal tin ca pɛc wi̱i̱ni Pi-li-thɛt kɛnɛ wec Juda.
17
Kä cu Dee-bid nyieenykɛ kɛ ni mi̱rä, cu mäni mëë ruɔ̱ndɛ kɛ thiaŋ thiaŋ. Kä cu kään ni ŋuɛ̈tni ti kur ŋuaan, ti ca rɔ bar kɛ thɔ̱a̱rɔa̱a̱li.
18
Kä cuɛ tëë diaal tëë ci ji̱ Ä-ma-lek kɛ ka̱n luɔ̱c jɔk kä cuɛ mänkɛ da̱ŋ rɛw kän bä.
19
Kä cuɛ thil mi te jɔ̱ɔ̱r, mi di̱i̱t kiɛ mi tɔt, kä kɛn tëë diaal tëë ca pɛc. Cu Dee-bid kɛn diaal nööŋ.
20
Kä cuɛ ɣɔ̱k kɛnɛ det lɛni pɛc. Kä cu nɛɛkɛ kɛ cuac nhiam ɣɔ̱ɔ̱kiɛn, kä cuɛ wee i̱, “Kɛ pɛ̈ɛ̈c Dee-bid kɛn ti̱ti̱.”
21
Kä cu Dee-bid ben kä nɛy ti kur da̱ŋ rɛw tëë ci cuuc, kä ci duɔth thok yiëër Be-dhor. Cukɛ ben ba Dee-bid ben lor kɛnɛ nɛy tin ci wä kɛɛl kɛ jɛ. Kä min cɛ cop kutdiɛn, cuɛ kɛ ner.
22
Kä cu tha̱a̱ŋ nath ti camjiɛɛc kä nɛy tin ci wä kɛɛl kɛ Dee-bid wee i̱, “Kɛ ɣöö/ken kɛ wä kɛɛl kɛ kɔn, /canɛ kɛ bi moc kɛ pɛ̈ɛ̈c tin canɛ wä pɛc, bi ramɔ ka̱n ni ciekdɛ kɛnɛ gaatkɛ kä rɔ.”
23
Duundɛ ɣöö cu Dee-bid wee i̱, “/Cuarɛ nɔmɔ lät, kuɛ la ŋu moc Kuoth Nhial kɔn kɛ jɛ mɔ gaatmaar. Cɛ kɔn gaŋ kä cuɛ buɔ̱n nɛɛni tin ca kɔn ma̱k ka̱m kɔn.
24
Thilɛ ram mi bi mat kɛ yɛ kä min lat yɛnɛ? Kä min bia̱ kui̱c raam mi ci wä ko̱o̱r, ɛ jɛn bia̱ kui̱c raam in ci duɔth kut kuakni ɔ. Bi kɛn diaal pa̱a̱r.”
25
Kä cu Dee-bid nɔmɔ la̱t ala ŋuɔ̱t kä I-thɛ-rɛl ɛn cäŋɛ mɔ mäni walɛ.
26
Kä mëë ci Dee-bid ben kä Dhik-lag, cuɛ tha̱a̱ŋ kuakni tin ca Pɛc jäk kä mäthnikɛ, ni bööth Juda, wee i̱, “Nɛmɛ ɛ mucdun kä tin ca pɛc kä ji̱ tɛ̈r Kuɔth Nhial.”
27
Cuɛ jäk kä nɛy tin te kä Beth-ɛl kɛnɛ ji̱ Ra-moth kä Nɛ-gɛb, kɛ Ya-tir,
28
Kɛnɛ ji̱ Ä-ro-er kä Thip-moth, kɛ Ɛc-tɛ-mo-ä,
29
kɛ Ra-kal, kɛnɛ wi̱i̱ Ya-ra-mɛ-ɛl, rɛy cieŋ ji̱ Kɛɛn,
30
kɛnɛ ji̱ Ɣɔr-ma, kɛ ji̱ Bor-a-can, kɛ ji̱ Ä-thak,
31
kɛ ji̱ Ɣɛb-ron, cuɛ kɛ jäk kä gua̱thni diaal tin ci Dee-bid kɛnɛ nɛɛkɛ wä thi̱n.
← Chapter 29
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 31 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31