Ecclesiastes 1

Nuer Bible © Bible Society in South Sudan 1998,2012

Jump to: Chapter 2 →

1Ti̱ti̱ kɛ ruaacni ŋi̱i̱cä gat Dee-bid kuäär kä Jɛ-ru-tha-lɛm.

2Cu ŋi̱i̱c wee, thilɛ jɛ luɔt thilɛ jɛ luɔt, tëk thilɛ jɛ luɔt! Ti diaal thilɛ kɛ luɔt.

3Ɛŋu mi jek raanɛ kä lätkɛ diaal tin cɛ la̱t?

4La ri̱c ɔ a wä, kä bi ri̱c ɔ ben, kä la mun a doth ni kɛ ta̱a̱dɛ.

5La cäŋ a käny kä bɛ kony, kä la locɛ niɛ guäth in la känyɛ thi̱n.

6La jiɔam a put wëë cuëëc, kä la putdɛ wëë caam. La jälɛ ri̱tdɛ rɔ, kä la locɛ niɛ guäth in bëë thi̱n.

7Kä kiɛr diaal lo̱nykɛ rɛy baar, kä ŋotdɛ /ci bar ni thiäŋ. Kä pi̱w lockɛ niɛ guäth in bäkɛ thi̱n.

8Ti diaal nööŋkɛ cuɔ̱c, a /ci raan kɛ dee luäŋ kɛ lat. /Ci waŋ ran thieŋ kɛ guec, kä /ci ji̱th ran thieŋ kɛ lieŋ.

9Kä mi ci kɔŋ te thi̱n ɛ jɛn bi te thi̱n ɔ, kä mi ca kɔŋ la̱t ɛ jɛn ba la̱t ni jɛ mɔ. Kä thilɛ mi pay tuɔɔk rɛy ɣɔaa kɛɛliw.

10Kä tëë kɛ mi dee raan ɛ lar i̱, “Nɛmɛ payɛ tuɔɔk”? Tëë thi̱n ni wal, a /ka̱nɛ ni ben.

11Thilɛ ram mi tiim mi ci wä ni wal, a cäŋɛ ni nɛy tɔ̱ bi ben tɔ̱, /ca kɛ bi tim, ɛ nɛy tɔ̱ ba kɛ guɔ̱ɔ̱r tɔ̱.

12Ɣän ŋi̱i̱c cä kɔŋ a kuäär I-thɛ-rɛl kä Jɛ-ru-tha-lɛm.

13Ɣän cua̱ jɛ go̱r kɛ ŋäc wecdä ɛn ɣöö dëë tin diaal tin ca la̱t rɛy ɣɔaa ŋa̱c. Cua̱ jɛ jek ɛ la̱t mi thiɛk ci Kuoth ɛ ka̱m naathɛ.

14Cua̱ kɛn diaal nɛn kɛn tin ca la̱t rɛy ɣɔaa. Kä nɛnɛ, kɛn diaal thilɛ kɛ luɔt, ce̱tdɛ kɛ wuɔ̱ɔ̱r kɔr jiɔam.

15Kä min ci gɔ̱a̱ŋ /ca dëë luäŋ kɛ ri̱c, kä tin thil /ca kɛ dee luäŋ kɛ kuën.

16Kä cua̱ rɔ jiök i̱, “Ta̱a̱ kɛ ŋäc pɛlä mi di̱i̱t kä nɛy diaal tëë ci ruëc kä Jɛ-ru-tha-lɛm nhiamdä. Kä ci wi̱cdä thia̱a̱ŋ kɛ ŋäc kɛnɛ tiit ŋɔaani mi di̱i̱t.”

17Kä cua̱ jɛ lɛ go̱r ɛn ɣöö bä ŋäc ŋɔaani kɛnɛ pɛl kɛ yɔ̱ɔ̱ŋ kɛ dɔ̱ɔ̱r lɛni ŋa̱c. Kä cua̱ jɛ lɛni jek ɛ wuɔ̱ɔ̱r kɔɔr jiɔam.

18Kä mɔ ci ŋɔak lɛ ŋa̱c ɛlɔ̱ŋ ɔ, la diɛɛri ɛlɔ̱ŋ bä. Kä ram ci ŋäcdɛ rep la diɛɛrɛ rɔ a reep bä.

Jump to: Chapter 2 →