Ecclesiastes 4

Nuer Bible © Bible Society in South Sudan 1998,2012

← Chapter 3 Jump to: Chapter 5 →

1Kä min cä rɔ nyɔk kɛ guec, cua̱ ciaŋ yiöŋ in la̱tkɛ rɛy ɣɔaa nɛn. Kä cua̱ nɛy tin yiɔaŋkɛ nɛn wieekɛ kä thilɛ ram mi luäk kɛ! Kɛ ɣöö te buɔ̱m kui̱ nɛɛni tin yiɔaŋkɛ kɛ, kä thilɛ ram mi luäk kɛ.

2Kä cua̱ car ni ɣöö gɔw ni nɛy tëë ci li̱w ni wal kä nɛy ti ŋot kɛ tëk ti.

3Duundɛ ɣöö ku lɛ gɔw ni nɛy tin /ka̱n ni dap kä kɛn diaal, kɛ ɣöö thilɛ lät ti jiäk ti /ca ni nɛn a la̱tkɛ rɛy ɣɔaa.

4Kä cua̱ jɛ nɛn bä ɛn min la lät kɛ raan ɛlɔ̱ŋ, ɛ nyiɛth gua̱n thieekädɛ. Kä nɔmɔ bä thilɛ jɛ luɔt, ɛ wuɔ̱ɔ̱r kɔr jiɔam.

5Kä la dɔ̱a̱r a kuak ni tetkɛ, bɛ rɔ cu pa̱l buɔth.

6Kä gɔaa ni ɣöö bi tekɛ mi tɔt kä ti̱i̱ kɛ mal, kä ɣöö ti̱i̱ kɛ la̱t mi di̱i̱t mi thiel luɔt ɛ wuɔ̱ɔ̱r kɔɔr jiɔam.

7Kä cua̱ mi thiel luɔt lɛ ni nɛn bä rɛy ɣɔaa.

8Cua̱ ram mi thil raan nɛn, jɛn thilɛ jɛ gat kiɛ däman. Kä ŋotdɛ thilɛ la̱tdɛ pek, kä /kenɛ ro̱ŋ kɛ ria̱ŋ in tekɛ jɛ, kä /kenɛ thiec i̱, “Ɛŋa mi la̱tdä ikä mɔ pënä rɔ tɛ̈th lɔaacɔ?” Ɛn nɔmɔ bä thilɛ jɛ luɔt, kä ɛ la̱t mi /ci gɔaa.

9Nɛy da̱ŋ rɛw gɔw ni kɛn kä ram kɛl, jek kɛn mi gɔaa kä la̱tdiɛn.

10Kɛ ɣöö mi ci ram kɛl tɛɛth kä kɛ, bi ram in dɔ̱ŋ ɛ jiac nhial. Duundɛ ɣöö riɛk akɛ ram kɛl, kɛ ɣöö mi cɛ tɛɛth thilɛ ram mi bi jɛ jiac nhial.

11Kä mi ci nɛy da̱ŋ rɛw tɔ̱ɔ̱c kɛɛl, la pua̱nykiɛn a leth. Kä /ci puɔ̱ny raam kɛl dee lëth, kä ɛ jɛn kärɔa.

12Kä cäŋ bumɛ ɛn ram kɛl, a derɛ ram kɛl puɔ̱t, la nɛy da̱ŋ rɛw a cuŋ nhiamdɛ. Kä /ci de̱p mi ca mat kä diɔ̱ɔ̱k jek ni puɔ̱t.

13Gɔaa ni ŋuɛ̈t mi can kä pɛl, kä kuäär mi dɔaaŋ mi dɔ̱a̱r mi /ci ruac liŋ,

14a cäŋ bëë raar duëël yieenä kä ba kuäär ɛn ŋuɛ̈t ɛ mɔ, kiɛ dapkɛ jɛ ala can.

15Cua̱ jɛ nɛn nɛy diaal tin tëk rɛy ɣɔaa guɔ̱ɔ̱rkɛ ŋuɛ̈t in bi kuäär guäl.

16Cäŋ ŋuan nɛy tin ruaacɛ a thilɛ kɛ pek. Ŋotdɛ bä nɛy tin bi lɔ̱ɔ̱ ben kɔɔrɛ /ci lo̱ckiɛn bi tɛɛth kɛ jɛ. Kɛ thuɔ̱k ɛn nɔmɔ bä thilɛ jɛ luɔt, ɛ wuɔ̱ɔ̱r kɔɔr jiɔam.

← Chapter 3 Jump to: Chapter 5 →