Joshua 1

Nuer Bible © Bible Society in South Sudan 1998,2012

Jump to: Chapter 2 →

1Kɛ kɔr liɛth kuanyä Kuɔth Nhial ni Muthɛ, cu Kuoth Nhial ruac kɛ gat wutdä mi cɔal i̱ Nun ni Jɔ-cua mëë mɔ läät Muthɛ, kä cuɛ jɛ jiök i̱,

2“Ci kuanydä ni Muthɛ thil. Täämɛ, ji̱n, ku kir Jɔr-dɛn ŋok yɛnɛ nɛy ti̱ti̱ diaal, wiaa ni muun in wa̱a̱ ka̱m kɛ kɛn gaat I-thɛ-rɛl.

3Kä ce̱tnikɛ mëë te kamäda kɔnɛ Muthɛ, cä mun in bia wä thi̱n ka̱m yɛ ni kɛɛliw.

4Kä bɛ ke̱y muɔ̱ɔ̱ndun lɔth niɛ piny paan ɛmɛ a wä ni nhial muun päämni Lɛ-ba-nɔn, bɛ lɛ ka̱n ni kiir in di̱i̱t ni Yu-pɛ-ree-tidh kä käny cäŋ bɛ löth kɛ rɛy rööl ji̱ Ɣɛ̈th, bɛ ben yiath ni Bar in Bo̱r in te kam wi̱i̱ni kä kony cäŋ.

5Ji̱n Jɔ-cua, thilɛ gat ran mi bi ji̱ luäŋ kɛ gëw runi te̱e̱kädu diaal, kɛ ɣöö ce̱tnikɛ mëë ta̱a̱ kɛ Muthɛ kɛɛl, ɣän bä te kɛɛl kɛ ji̱ bä, /cä ji̱ bi me̱t bäny piny.

6A bum ni ji̱n, kä /cu dual kɛ ɣöö bi nɛy ɛ ti böth muun ëë cä guɔ̱k gua̱ndɔɔŋnikiɛn i̱ bi a duundiɛn.

7A bum ni ji̱n, kä /cu dual kä ŋäcni jɛ ɛn ɣöö bi ŋuɔ̱t diaal la̱t ce̱tnikɛ mëë ca kɛ la̱t ji̱ ɛ kuanydä ni Muthɛ. Kä /cu tekɛ mi bi wäny kiɛ bi guäc rɛy kä tin diaal tin cɛ la̱t ji̱, kɛ ɣöö deri cu ja̱l kɛ cio̱o̱k mi gɔaa gua̱thni diaal.

8Ɛn warɛgak ŋuɔ̱tni ɛmɛ a /ci luɛ̈ɛ̈r thokdu, kä la car rɛydɛ kɛ cäŋ kɛnɛ wäär, kɛ ɣöö bi la tiidi ni tin diaal tin ca gɔ̱a̱r rɛydɛ. Kɛ kui̱ ɛmɔ dëë lätku cu cuɔ̱ŋ.

9Ɛ niɛ min cä la̱r ji̱ i̱ kämni lɔcdu buɔ̱m, kä /cu bath, kɛ ɣöö bä te kɛɛl kɛ ji̱ gua̱thni diaal ɣän Kuothdu ni Kuoth Nhial.”

10Kɛ kɔr kä min ci Jɔ-cua ruac in ci Kuoth ɛ la̱t jɛ liŋ, cuɛ ruac kɛ kua̱r lätni ji̱ I-thɛ-rɛl wee i̱,

11“Wiaa rɛy wec kä wiaa jiökɛ naath i̱, ‘Rialɛ mi̱thkun ikä, kɛ ɣöö bia ro̱l in wä Kuothdan ni Kuoth Nhial ɛ ka̱m yɛ ala duundun wä ka̱n.’ ”

12Kä cuɛ ruac kɛ do̱r kuayni Rɛ-u-ben kɛnɛ do̱r kuayni Gad kɛ tha̱a̱ŋ döör kuanyni Ma-na-thɛ kä cuɛ kɛ jiök i̱,

13“Tiɛtdɛ mëë ci kuany Kuɔth ni Muthɛ ɛ la̱r yɛ i̱ bi Kuothdun ni Kuoth Nhial yɛ dhil ka̱m mun ɛmɛ ala wecdun.

14Kɛ kui̱ ɛmɔ, bi mänkun kɛnɛ nyintiɛtnikun kɛ ɣɔ̱kun duɔth wi̱c ɛmɛ min ci Muthɛ ɛ ka̱m yɛ kui̱c Jɔr-dɛn, kä bi nɛy tin buɔ̱m buɔ̱ɔ̱m kä yɛ yio̱o̱kiɛn ka̱n kä bikɛ kac kui̱c kɛɛl kɛ dämuɔɔrikun kä bikɛ wä ko̱o̱r kɛɛl kɛ kɛ,

15amäni mi wä Kuoth dämuɔɔri wä nyuɔ̱ɔ̱r ɛn wani, ce̱tkɛ mi tia̱ mi, a bikɛ mun in käm Kuothdun ni Kuoth Nhial ɛ kɛ, ka̱n ala duundiɛn. Kä kɛ jɔak dërɛ cu luny muundun in ci Muthɛ in la kuany Kuɔth ɛ ka̱m yɛ kui̱c Jɔr-dɛn ɛmɛ lotdä käny ca̱ŋ, kä bia jɛ cu ben ka̱n.”

16Kä cu döör ɛ tɔ̱ ɛ loc i̱, “Kɔn bakɔ tin ci la̱t kɔ la̱t ni kɛn diaal, kä bakɔ wä gua̱thni diaal tin bi kɔ jäk kä thi̱n.

17Kɔn bakɔ thokdu liŋ bä, ce̱tnikɛ mëë cakɔ thok Muthɛ liŋ rɛy kä ti diaal. Min te ni jɛn thi̱n, a Kuothdu ni Kuoth Nhial luäk ji̱ thi̱n ce̱tnikɛ mëë cɛ Muthɛ luäk.

18Ram in /ci ruaacniku bi liŋ, kä /ci bi la̱t ni min ci la̱r jɛ, jɛn ba näk. A bum ni lɔcdu.”

Jump to: Chapter 2 →