Joshua 3

Nuer Bible © Bible Society in South Sudan 1998,2012

← Chapter 2 Jump to: Chapter 4 →

1Kä mëë ruɔ̱ndɛ cu Jɔ-cua loth piny kä cuɛ wecdɛ ɣo̱th kɛɛl kɛnɛ ji̱ I-thɛ-rɛl diaal, cukɛ jiɛn ni kä Ci-tim, kä cukɛ ben ni thok yiëër Jɔr-dɛn, kä cukɛ ben pua̱t thi̱n lɛɛr.

2Kä kɛ kɔr ni̱ni da̱ŋ diɔ̱k, cu kua̱r lätni ji̱ wec diaal wä la̱r lär i̱,

3“Yɛn, mi wiaa bööth palä kä ji̱ Lii-bay nɛn kapkɛ thanduk matdä Kuɔthdun ni Kuoth Nhial, ɛn wa̱nɔ kuɛ̈ɛ̈ nyuɔŋ kä ɣöthɛ kɔɔriɛn.

4Kɛ ɣöö yɛn pua̱nykun thilɛ ram mi ci me̱t ret kɛ jɛn duɔ̱ɔ̱p ɛ wiaa thi̱n ɛ, ɛ jɛn bikɛ yɛ ku nyuɔ̱th duɔ̱ɔ̱p. Kä yɛn bia dhil tekɛ kam mi nɔ̱a̱n kä mi tɔt kɛ thanduk matdä Kuɔth.”

5Ɛ jɛn, cu Jɔ-cua naath ku jiök i̱, “Jakɛ rɔ̱ kä lɛ̈y lɛ̈ɛ̈y nhiam Kuɔth, kɛ ɣöö iruun waaŋ bi Kuoth Nhial buɔ̱mdɛ nyoth nhiamdun kɛ lät ti ga̱ykɛ naath.”

6Kä cuɛ bööth palä ku jiök i̱, “Ka̱nɛ thanduk matdä Kuɔth kä böthɛ naath kɛ jɛ.” Kä cukɛ wä thi̱n.

7Kä cu Kuoth Nhial Jɔ-cua ku jiök i̱, “Ni ɛn wa̱lɛ mi, ɣän bä di̱tdu re̱p nhiam ji̱ I-thɛ-rɛl diaal. Ɛ jɛn bikɛ jɛ cu ŋa̱c ɔ ɛn ɣöö ta̱a̱ kɛɛl kɛ ji̱ ce̱tnikɛ mëë ta̱a̱ kɔnɛ Muthɛ.

8Täämɛ wër ruacni kɛ bööth palä tin kapkɛ thanduk matdä kä jio̱kni kɛ i̱ mi wäkɛ wä cop wi̱i̱ yiëër kä Jɔr-dɛn, akɛ cuŋ yie̱e̱r.”

9Kɛ kui̱ ɛmɔ, cu Jɔ-cua ji̱ I-thɛ-rɛl ben jiök i̱, “Ta̱yɛ rɔ̱ kä biaa liɛŋɛ laat Kuɔthdun in la Kuoth Nhial.

10Ɛ jɛn bia jɛ cu ŋa̱c nikɛ nɛmɛ ɛn ɣöö Kuoth mi tëk a rɛydun, kɛnɛ ɣöö mi wiaa ko̱r kap, jɛn bɛ ji̱ Kɛ-naan kɛ ji̱ Ɣɛ̈th kɛ ji̱ Iwi kɛ ji̱ Pɛ-rii-dhi kɛ ji̱ Gir-gac kɛ ji̱ Ɛ-mor amäni ji̱ Yɛ-buth jak kä bath ni ca̱r nhiamdun.

11Bia jɛ ŋa̱c kɛ ɣöö mi wä thanduk matdä Kua̱r ni gua̱n wec muɔ̱ɔ̱n kɛɛliw yɛ böth Jɔr-dɛn.

12Kɛ kui̱ ɛmɔ yɛn täämɛ kuɛ̈ɛ̈ nɛy da̱ŋ wäl rɛw ka̱n kä döör I-thɛ-rɛl, ram kɛl do̱o̱r ɔ.”

13Kä mi wä bööth palä tin kapkɛ thanduk matdä Kuɔth Nhial in la Kuäär wec muɔ̱ɔ̱n kɛɛliw pa̱a̱t ciöknikiɛn cua̱th yie̱e̱r kä Jɔr-dɛn, bi löny yiëër ɛmɔ cuɔ̱ŋ kä bi pi̱ tin lony ni kui̱c i̱ wee nhial i̱ rɔ̱ rol guäth kɛl.

14Ɛ jɛn, mëë ci naath ɣöth ni gua̱thni gɔalikiɛn kä wäkɛ yi̱er jiɛ̈th kui̱c, cua kɛ bo̱th ɛ bööth palä tin kapkɛ thanduk matdä.

15Kä täämɛ ci kir Jɔr-dɛn muak ci wäŋkɛ diaal wä raar amäni gua̱a̱th ŋër bɛɛl. Kä mëë ci nɛy tëë kapkɛ thanduk matdä ruac cop kä Jɔr-dɛn, mëë ci ciök bööthni palä tëë kapkɛ thanduk cop rɛy pi̱i̱ni,

16cu pi̱w tin lo̱ny nhial rɔ̱ ka̱p cuɔ̱ŋ, cukɛ rɔ̱ luth guäth kɛl ni nɔ̱nä kä A-dam, wec in te gekä Dha-rɛ-than. Kä cu tha̱a̱ŋ pi̱i̱ni lo̱ny baar Ä-ra-ba min la Bar in Wac guäth in cu pi̱ diaal ŋuɔɔk. Kä cu naath jiɛth kui̱c lotdä Jɛ-ri-ko.

17Kä guäth in jiɛ̈thkɛ yi̱er ɛ ji̱ I-thɛ-rɛl diaal kɛ duɔ̱ɔ̱p mi kööt, kɛn bööth palä tin kapkɛ thanduk matdä tekɛ cuŋä guäth mi kööt däär yiëër Jɔr-dɛn, amäni mëë cu do̱r ji̱ I-thɛ-rɛl thuɔ̱k kɛ jiëth kɛɛliw.

← Chapter 2 Jump to: Chapter 4 →