Joshua 20

Nuer Bible © Bible Society in South Sudan 1998,2012

← Chapter 19 Jump to: Chapter 21 →

1Täämɛ cu Kuoth Nhial ku ruac kɛ Jɔ-cua jio̱kɛ jɛ i̱,

2“Ruacni kɛ ji̱ I-thɛ-rɛl kä läri jɛ kɛ i̱ kuënyɛ rɔ̱ rɛ̈k ti bia rɔ̱ la lënyɛ thi̱n nikɛ ruac ëë cä lar kɛ thok Muthɛ.

3A dëë ram in ci raan guäc kɛ mam rɔ bar thi̱n dërɛ cu te gua̱a̱th mi lënyɛ rɔ̱ thi̱n kä ji̱ ran.

4Kä bi ram ɛmɔ rɔ bar rɛɛk kɛl kä kɛn rɛ̈k tɔ̱tɔ̱ kä bɛ wä cuɔ̱ŋ thok rɛ̈ɛ̈k ɛmɔ min la gua̱a̱th ji̱ luɔ̱kni kä bɛ ruacdɛ cu kuen di̱t rɛ̈ɛ̈k ɛmɔ kä bikɛ jɛ cu ma̱t rɔ̱ rɛy rɛ̈ɛ̈k kä ba cu moc gua̱a̱th tɔ̱ɔ̱cä kä bɛ cu nyuur cieŋ kɛɛl kɛ kɛ.

5Kä täämɛ mi wä bi̱i̱m jɛ wä gur kä lɛɛr, cikɛ gua̱n tho̱ŋä bi thöp jɛ kɛ ɣöö /ke̱rɛ raan thie̱e̱kädɛ di̱l kɛ näk kä thilɛ kɛ tɛr mi te kamädiɛn ni wänkä.

6Kä bɛ te rɛɛk ɛmɔ amäni cäŋ in wä cuɔ̱ŋ kɛ jɛ nhiam ji̱ dolä Kuɔth kɛ kui̱ luɔ̱kdɛ, amäni cäŋ in wä thil kɛ jɛn bo̱o̱th palä mëë di̱t ni jɛn kɛn ni̱ni tɔ̱tɔ̱. Ɛ jɛn kɛ kɔrɛ, dëë gua̱n tho̱ŋä cu luny rɛɛkdɛ kɛnɛ cieeŋdɛ rɛy rɛ̈ɛ̈k ëë kɔŋɛ rɔ bar jɔ̱ɔ̱r thi̱n.”

7Kɛ kui̱ ɛmɔ, cukɛ Kɛ-dɛc ku lɛy kä Gɛ̈-lɛ-li ro̱o̱l päämni Nap-ta-li, kɛnɛ Cɛ-kɛm ro̱o̱l päämni Ɛ-pa-rim, kɛ Kir-yath-ar-bä min mɔ Ɣɛb-ron ro̱o̱l päämni Juda.

8Kä kui̱c kiɛɛr Jɔr-dɛn, min lot ni käny cäŋ Jɛ-ri-ko, cukɛ Bɛ-dhɛr in te däär dɔaar kuany rɛy täpä röl gan Rɛ-u-ben, kɛnɛ Ra-moth kä Gil-yad rɛy rööl gan Gad, kɛ Go-lan kä Ba-can rɛy rööl gan Ma-na-thɛ.

9Ti̱ti̱ kɛ kɛn rɛ̈k tëë ca rialikä kɛ kui̱ gan I-thɛ-rɛl diaal kɛnɛ ji̱ kɔaariɛn tin cieŋ rɛydiɛn kɛ ɣöö dëë ram in ci raan näk kɛ guäc mi la guäc Kuɔth rɔ lëny thi̱n, kä /ci bi̱i̱m ɛ dëë lɛ bath amäni cäŋ in wa cuuŋ ni jɛ nhiam ji̱ dolä Kuɔth.

← Chapter 19 Jump to: Chapter 21 →