Joshua 18

Nuer Bible © Bible Society in South Sudan 1998,2012

← Chapter 17 Jump to: Chapter 19 →

1Kä täämɛ cu ji̱ dolä Kuɔth gan I-thɛ-rɛl diaal rɔ̱ duɔl kä Cilo, kä cukɛ gua̱a̱th palädiɛn yiath piny thi̱n kɛ kɔr kä mëë ci ro̱l kɛɛliw kua duundiɛn.

2Ɛn guäth ɔ, tëë kɛ döör da̱ŋ bärɔw kä gaat I-thɛ-rɛl ti ŋot /ka̱n tëm kui̱cdiɛn.

3Kä cu Jɔ-cua gaat I-thɛ-rɛl ku jiök i̱, “Yɛn bia ŋot kɛ cua̱ŋ kɛ käni rööl in ci Kuoth Nhial ni Kuoth guuri ɛ ka̱m yɛ amäni nɛy?

4Ŋuɔ̱nɛ nɛɛ diɔ̱k rɛy döörikun, kä bäkɛ ja̱k kä bikɛ rɛy rööl wä car kɛɛliw, kä bikɛ jɛ wä gɔ̱a̱r piny kɛ pëk in yiɛɛth rɔ kɛ ram ɔ kä kɛ, kä bikɛ cu luny kä ɣä.

5Kä bikɛ jɛ kɛ̈k kä bärɔw, kä bi Juda key kɛ kɛ kui̱c cueec kɛ thok duëël Jo-thɛp bɛ te kui̱c caamdɛ.

6Kä yɛn bia wec cu da̱k kɛ̈ɛ̈kni bärɔw kä bia jɛ nöŋ ɣä ɛn wanɛ, kä bäkɛ cu yɔ̱a̱t yɛ kɛ gaak nhiam Kuɔthdan ni Kuoth Nhial.

7Ɛ ni ɣöö thilɛ kui̱c mi ba ka̱m gaat Lii-bay tin te rɛydun kɛ kui̱ kä ɣöö la̱a̱t kuäärä palä Kuɔth Nhial ɛ duundiɛn, kä ci Gad kɛnɛ Rɛ-u-ben kɛ tha̱a̱ŋ döör Ma-na-thɛ kui̱cdiɛn ka̱n kui̱c yiëër Jɔr-dɛn kä käny cäŋ, jɛn mun rööl ëë ci Muthɛ in la kuany Kuɔth Nhial ɛ ka̱m kɛ.”

8Kä cu wutni tɔ̱tɔ̱ jiɛn. Kä min jiɛckɛ cu Jɔ-cua kɛ nöp i̱, “Wiaa kä wiaa ja̱lɛ rɛy rööl kä gɔ̱a̱rɛ jɛ piny. Kɛ kɔrɛ kuɛ̈ɛ̈ thuɔ̱kdɛ cu nöŋ ɣä kä bä jɛ ben dua̱c yɛ kɛ gaak nhiam Kuɔth Nhial wa̱nɛ mɛ kä Cilo.”

9Cukɛ cu wä kä cukɛ rɛy rööl wä jäl, kä cukɛ jɛ wä gɔ̱a̱r piny kɛ pëk rɛ̈knikɛ, cukɛ jɛ guɔ̱l kɛ guɔ̱ɔ̱l da̱ŋ bärɔw rɛy warɛgakä, kä cukɛ luny kä Jɔ-cua wi̱cdiɛn in ca pua̱t kä Cilo.

10Kä cu Jɔ-cua kɛ yɔ̱t ikä kɛ gaak nhiam Kuɔth Nhial kä Cilo, kä cuɛ gaat I-thɛ-rɛl tëm gua̱th thi̱n ram ɔ kɛ kui̱cdɛ.

11Kä cu gaak döör gan Ben-ya-min nikɛ gɔalkiɛn pɛ̈ɛ̈n, kä cu wecdiɛn te kamä rööl gan Juda kɛnɛ ro̱l gan Jo-thɛp.

12Kä pëk wecdiɛn in lot ni kui̱c kayŋua̱a̱k cuɛ jɛ ka̱n ni kä Jɔr-dɛn, kä cuɛ rɔ wä thi̱eŋ ni kui̱c caam Jɛ-ri-ko, kä cuɛ jɛ löth kɛ rɛy rööl päämni kui̱c in lot ni kony cäŋ kä cu këthnikɛ rɔ̱ ben pi̱em ni däär dɔaar kä Beth-a-wɛn.

13Kä cuɛ rɔ nyɔk kɛ jiɛn ni ɛn wi̱ni kä cuɛ wä ni Luudh, ni kui̱c in jay ni par Luudh, in la Beth-ɛl, kä cuɛ räth kä A-tɛ-roth-a-dar in thie̱e̱k kɛ päm in te cueec Beth-o-ron.

14Kä cu key rɔ nyɔk kɛ löth kä cuɛ rɔ gɔ̱a̱ŋ konyä ca̱ŋ in cät rɔ kui̱c targɛ̈w pa̱a̱m in römkɛ rɔ̱ kɛnɛ Beth-o-ron kui̱c in wee cueec kä cuɛ wä pal ni dhɔɔr in ca cɔl i̱ Kir-yath-baal in la Kir-yath-ya-rim rɛk mi mɔ duŋ gan Juda. Nɛmɛ cua jɛn pëk konyä ca̱ŋ.

15Kä cu key in lot ni kui̱c targɛ̈w rɔ lɔth ni wi̱i̱ tuɔ̱ɔ̱ŋ Kir-yath-ya-rim kä cuɛ rɔ ri̱t kɛ Ɛp-rɔn kä cuɛ räth ni löli pi̱i̱ni Nɛ-po-ta.

16Kä cu ke̱k rɔ nyɔk kɛ luŋ piny pa̱a̱m wi̱i̱ tuɔ̱ɔ̱ŋ in römkɛ rɔ̱ kɛnɛ pan cätdä I-nɔm in te paan ji̱ Rɛpa peek in lot ni kui̱c kayŋua̱a̱k, kä cuɛ lɛr piny paan I-nɔm cuɛ rɔ wä thi̱ŋ nikɛ Yɛ-buth kui̱c targɛ̈w kä cuɛ wä ni Een-ro-gel.

17Kä cuɛ jɛ lɔath ni kui̱c kayŋua̱a̱k kä cuɛ pal ni Een-cɛ-mɛc kä ɛn wani cuɛ räth ni Gɛ-li-loth min guɛckɛ ni rɔ̱ kɛnɛ duɔ̱ɔ̱p Ä-du-mim kä lɛr ni pa̱a̱m gatdä Rɛ-u-ben ni Bo-an.

18Kä cuɛ wä kɛ kui̱c cueec kamkɛ ni rɔ̱ kɛnɛ Beth-ä-ra-ba cu amäni min cɛ pɛn rɛy Ä-ra-ba kui̱c caam.

19Bɛ jɛ inɔ, cu key rɔ ku nyɔk kɛ pal kä cuɛ rɔ wä thi̱ŋ nikɛ Beth-ɔg-la kä cu ke̱kdɛ wä te ni kui̱c caam Bar in Wac cuɛ pal ni giɛɛkni Jɔr-dɛn kui̱c targɛ̈w. Nɛmɛ ɛ jɛn pëk këth ëë lot ni kui̱c targɛ̈w.

20Kä cua jɛ ge̱l ɛ Jɔr-dɛn kä käny cäŋ. Nɛmɛ ɛ jɛn guɔ̱l rööl ëë yiɛɛth rɔ kɛ gaat Ben-ya-min nikɛ pëk gɔalikiɛn.

21Kä rɛ̈k diaal tëë yiathkɛ rɔ̱ kɛ döör gan Ben-ya-min kɛ, Jɛ-ri-ko kɛnɛ Beth-ɔg-la kɛ E-mɛk-ɛ-dhidh

22kɛnɛ Beth-ä-ra-ba kɛ Dhɛ-ma-ra-yim kɛnɛ Beth-ɛl

23kɛ Awi kɛnɛ Para kɛ Ɔp-ra

24kɛnɛ Kɛ-par-a-mo-ni kɛ Ɔp-ni kɛnɛ Gabä. Tɔ̱tɔ̱ kɛ rɛ̈k wäl rɛw kɛɛl nikɛ dho̱rkiɛn.

25Tëë kɛ Gib-yon kɛnɛ Rama kɛ Bɛ-roth

26kɛ Midh-pee kɛnɛ Kɛ-pi-ra kɛ Mo-dhaa

27kɛ Rɛ-kɛm kɛnɛ I-rɛ-pel kɛ Thar-ä-la

28kɛ Dhelä kɛnɛ A-ɛ-lɛp kɛ Yɛ-buth in la Jɛ-ru-tha-lɛm kɛ Giba kɛnɛ Kir-yath-ya-rim. Tɔ̱tɔ̱ kɛ rɛ̈k wäl ŋuaan kɛɛl nikɛ dho̱rkiɛn. Nɛmɛ ɛ jɛn pëk ëë yiɛɛth rɔ kɛ do̱r gan Ben-ya-min gɔalikɛ.

← Chapter 17 Jump to: Chapter 19 →