Proverbs 2

Nuer Bible © Bible Society in South Sudan 1998,2012

← Chapter 1 Jump to: Chapter 3 →

1Gatdä mi liŋi ruacdä kä tiitdi luekdä,

2kä liŋ pɛl agɔaa, kä läthi ca̱ru kä ŋäc ŋɔaani,

3kɛ ɣöö mi wi̱i̱ ca̱r lɔaac wä go̱r, kä biɛ go̱r i̱ biɛ ŋa̱c.

4Biɛ go̱r a bɛc ce̱tkɛ ciɛk in bo̱r, kɛnɛ go̱r kä mi gɔaa mi ci bath.

5Ɛ jɛn bi luth Kuɔth Nhial cu ŋa̱c, kä bi ŋäc Kuɔth cu jek bä.

6Kɛ ɣöö Kuoth Nhial ŋunɛ ŋäc ŋɔaani, kä bä ŋäc ŋɔaani kä jɛ kɛnɛ tiit.

7Kä cɛ luäk tɛ̱̈ɛ̱̈ kɛ kui̱ gua̱n cuŋni, kä ɛ ko̱t nɛɛni tin thil bɛ̈ɛ̈l.

8Yiënɛ duɔ̱ɔ̱p cuŋni, kä gaŋɛ duɔ̱ɔ̱p nɛɛni tin ŋa̱thkɛ jɛ.

9Kɛ kɔrɛ bi thuɔ̱k kɛnɛ cuɔ̱ɔ̱ŋ kɛ ciaŋ päärä kɛ dup tin gɔw cu ŋa̱c.

10Kä bi ŋäc ŋɔaani cu ben lɔɔcdu, bɛ cua̱ mi gɔaa kɛ tieeydu.

11Bi luth kɛnɛ ŋäc ŋɔaanidu kɛ jɛ ji̱ gaŋ.

12Bɛ ji̱ ka̱m raar dup in jiääk kɛnɛ ruac nɛɛni tin ji̱ däkä.

13Kä nɛy tin wä duɔ̱ɔ̱p cuŋni wä päl a ba wä jäl ni dup ti ca̱a̱r,

14kä ba nhɔk ni lätni dui̱rä, kä tɛth lo̱ckiɛn kɛ ruaacni ji̱ däkä.

15Kɛ nɛy ti dupkiɛn gɔ̱a̱ŋ gɔa̱a̱ŋ, gɔ̱a̱lkɛ dupkiɛn ɛ naath.

16Bi cu kään kä ciek in go̱o̱r naath, kɛnɛ ruacdɛ min gɔaa in pɛɛlɛ nikɛ.

17Jɛn cɛ cɔwdɛ ba̱ny piny, kä cɛ guk Kuɔthdɛ pa̱l ruëëc.

18Kɛ ɣöö dhɔrɛ te ni lia̱a̱ thi̱n, kä duɔ̱ɔ̱pdɛ ɛ yiëë li̱eth.

19Kä ram ci wä kä jɛ /cɛ luny jɔk, kä /cɛ duɔ̱ɔ̱p teekä nyɔk kɛ jek.

20Ji̱n jäl ni duɔ̱ɔ̱p mi gɔaa, kä tit ni dup cuŋni.

21Kɛ ɣöö bi cieŋ ni ji̱ cuŋni wi̱i̱ muɔ̱ɔ̱n, kä bi duɔth ni nɛy ti thil bɛ̈ɛ̈l thi̱n.

22Duundɛ ɣöö ba ji̱ dueeri woc wi̱i̱ muɔ̱ɔ̱n, kä nɛy tin thil ŋa̱th bikɛ thil thar.

← Chapter 1 Jump to: Chapter 3 →