Proverbs 9

Nuer Bible © Bible Society in South Sudan 1998,2012

← Chapter 8 Jump to: Chapter 10 →

1Pɛl ce̱tkɛ kɛ ciek mi ci duelɛ la̱t, kä cɛ jɛ lät kä thi̱eer da̱ŋ bärɔw.

2Kä cuɛ yaaŋdɛ näk, kä cuɛ kɔaŋdɛ dhim, kä cuɛ mi̱ethdɛ rialikä.

3Kä cuɛ nyier la̱tdɛ ja̱k, kɛ ɣöö bikɛ wä ciöt gua̱thni tin loc rɛy wec.

4“A nɛy tin kueckɛ ŋɔak bëë wanɛ mi!” Cuɛ la̱t nɛy tin dɔa̱a̱r i̱,

5“Bia camɛ mi̱ethdä, kä bia mathɛ kɔaŋ in cä dhim.

6Pa̱lɛ dɔ̱ɔ̱run kɛ ɣöö bia tëk, bia ja̱lɛ ni duɔ̱ɔ̱p tiitdä lɔaac.”

7Ram lueek dɔ̱a̱r, kuethɛ ni rɔ, kä ram lueek ram mi jiäk mocɛ ni rɔ̱ buɔ̱t.

8/Cu dɔ̱a̱r luek, bɛ ji̱ lo̱k. Luek ni ram mi te pɛl, bɛ ji̱ nhɔk.

9Lätni ram mi tekɛ pɛl ruac, bɛ ŋot kɛ ŋäc ŋɔaani. Ŋi̱i̱cni gua̱n cuŋni, bɛ rep ni pɛlɛ.

10Kɛ ɣöö luth Kuɔth Nhial, ɛ jɛn tuk ŋäcä ŋɔaani. Kä ŋäc Raam in rɛl gɔɔydɛ rɔ, ɛ jɛn tiit lɔaac.

11Kä pɛl bɛ ni̱n teekädu rep ɛ ŋuan.

12Kä mi pɛli, pɛlu bɛ ji̱ rep. Kä mi ɛ ji̱n dɔ̱a̱r, dɔ̱ɔ̱ru bɛ jek ni ji̱.

13Kä dɔ̱ɔ̱r ce̱tdɛ kɛ ciek mi gua̱n rɔlä kä thilɛ mi ŋäcɛ, kä kui̱cɛ pöc.

14La nyuurɛ thok duëëlɛ, wi̱i̱ kɔam guäth in loc rɛy wec,

15cɔlɛ nɛy tin jäl kɛ jɛn gua̱a̱th ɛ mɔ, tin jäl ni dupdiɛn i̱,

16“A nɛy diaal tin kueckɛ ŋɔak bëë wa̱nɛ mi!” Cuɛ la̱t nɛy tin dɔa̱a̱r i̱,

17“Pi̱ kuël comkɛ, kä mi̱eth kua̱n kɛ tɛ̱̈ɛ̱̈ gɔaaɛ.”

18Duundɛ ɣöö /ci kɛn ɛ ŋäc i̱ tëë kɛ lia̱a̱, kɛ ɣöö ja̱a̱l ciëk ɛmɔ, kɛn a ni puul li̱eth.

← Chapter 8 Jump to: Chapter 10 →