Proverbs 21

Nuer Bible © Bible Society in South Sudan 1998,2012

← Chapter 20 Jump to: Chapter 22 →

1Kä lɔc kua̱r ce̱tdɛ kɛ lo̱o̱l pi̱i̱ni kä Kuoth Nhial. La ri̱tdɛ jɛ ce̱tnikɛ min go̱o̱rɛ.

2Kä lät ran diaal guicɛ kɛ ɛn ɣöö gɔwkɛ, duundɛ ɣöö lɔc ɣɔ̱a̱nkɛ jɛ ɛ Kuoth Nhial.

3La̱t cuŋni kɛnɛ thuɔ̱ɔ̱k gɔw ni kɛn kä Kuoth Nhial kä tho̱p mucä.

4Kä ram mi tëë kɛ kac kä liak rɔ, lätdɛ ni dueer ɛn raam ɛmɔ.

5Cär raam mi tekɛ päl lɔaac piny no̱o̱ŋɛ ti ŋuan, kä ram mi pɛ̈th cärä no̱o̱ŋɛ ni can.

6Ria̱ŋ mi jëkɛ kɛ kac /cɛ jäny, naŋɛ ni raan li̱th.

7Kä gak ji̱ dueeri bɛ kɛ bath, kɛ ɣöö lökɛ la̱t thukä.

8Duɔ̱ɔ̱p gua̱n dueeri ɛ gɔ̱l gɔ̱l, kä ciɛŋ raam mi muɔ̱l muɔ̱l kɛ cuŋ.

9Gɔaa ni ɣöö deri cieŋ gekä duëël, kä ɣöö bi ciaŋ mat yɛnɛ ciek mi puɔ̱ny gak.

10Kä lɔc gua̱n dui̱rä go̱o̱rɛ ni jiäk, thilɛ gɔɔy mi jek gua̱n thieekädɛ jɛ kä jɛ.

11Mi ca ram mi dhɔ̱ŋ dhɔ̱ŋ duäc, la dɔ̱a̱r ŋɔak a ŋäc. kä mi ca ram pɛl luek, la ŋäcdɛ rɔ a reep.

12La ram mi pɛl dhɔr ram mi lät jiäk a guic. Kä la däkɛ dhɔr raam in lät jiäk.

13Kä mi lo̱k raan ɣöö liŋɛ lul raam mi can, amäni jɛn bä, bɛ wiee kä thilɛ ram mi bi jɛ luäk.

14Muc gekä duänyɛ gak piny, kä kök yienyɛ gak mi di̱i̱t.

15Thuɔ̱k ɛ gɔɔy kä ji̱ cuŋni, kä ɛ riɛk kä la̱a̱t jiäkni.

16Kä ram yi̱c kɛ duɔ̱ɔ̱p pɛlä, bɛ wä lɔ̱ɔ̱ŋ ni wi̱c jɔɔkni.

17Kä ram nhɔk ni jäl bɛ la can, kä ram nhɔk ni kɔaŋ kɛnɛ liɛɛth /cɛ bi met ria̱ŋ.

18Nɛy tin ji̱ dueeri kɛ luëël ji̱ cuŋni, kä nɛy tin thil ŋa̱th kɛ luëël ji̱ ŋäthä.

19Gɔaa ni ciaŋ däärdɔaar, kä ɣöö bi cieŋ yɛnɛ ciek mi gua̱n gaak mi te nyi̱r.

20Ram mi pɛl la tɔ̱ɔ̱wɛ mi̱th, kä cam ram mi dɔ̱a̱r ni nyinkɛ.

21Kä ram mi guur ni gɔy kɛnɛ cuŋ, bɛ tëk kɛnɛ luth jek.

22La ram mi pɛl wec nɛɛni ti buɔ̱m buɔ̱ɔ̱m a mak, kä la däkɛ ti̱ec tin bum tin ŋa̱thkɛ.

23Kä ram mi tiit ruacdɛ, tiitdɛ ni rɔ rɛy rikni.

24Kä cɔalkɛ ram mi gua̱n kacä kɛnɛ liak i̱, “Dho̱o̱t nath.” Ɛn ram in lät ŋɔak kacä.

25Kä cär raam mi duaal na̱kɛ jɛ, kɛ ɣöö lo̱kɛ la̱t.

26Kä la but gua̱n dueeri kɛ go̱r kɛ gua̱th mi bɛ duɔ̱ɔ̱r jek thi̱n, kä ku gua̱n cuŋni la muc a /cɛ tetdɛ coŋ.

27Kä muc raam mi lät jiäk ɛ duer. Derɛ kulɛ te i̱di mi no̱o̱ŋɛ jɛ kɛ duɔ̱ɔ̱p mi duer.

28Kä neen mi lat ni kac bɛ li̱w, kä ram mi liŋ ruacdɛ bɛ da̱k amäni cäŋ kɛl.

29Gua̱n dui̱rä la juanɛ ni nhiamdɛ, kä gua̱n cuŋni caarɛ duɔ̱pkɛ.

30Kä thilɛ pɛl kɛnɛ tiit lɔaac kɛ ca̱r, mi dee gɔaa ni jɛn kä Kuoth Nhial.

31La rialkɛ jio̱k tuɔ̱ruɔ̱k ikä kɛ ko̱r, kä juc ŋunɛ Kuoth Nhial.

← Chapter 20 Jump to: Chapter 22 →