Song of Solomon 6

Nuer Bible © Bible Society in South Sudan 1998,2012

← Chapter 5 Jump to: Chapter 7 →

1Ciek in gɔaa ni jɛn kä män, luumdu cɛ wä nikä? Ɛ duɔ̱ɔ̱p in mi̱th ci luumdu wä kɛ jɛ mɔ, kɛ ɣöö dënɛ jɛ wä go̱r kɛɛl?

2Luumdä cɛ wä rɛy kakä walkɛ guäth in do̱ny jiɛn tin ŋuäny thi̱n, cɛ detkɛ wä la̱a̱k rɛy kakä, kä bɛ tual wä ma̱a̱t.

3Ɛ ɣän duŋ luumädä, kä ɛ duŋdä, lääkɛ detkɛ rɛy tuaali.

4Gɔaa i̱ ɛlɔ̱ŋ luumdä ce̱tkɛ wec Ti̱r-dha, nhɔakä ji̱ ce̱tkɛ Jɛ-ru-tha-lɛm, ce̱tdɛ nikɛ rɛm mi lät maacin.

5Ri̱t wäŋku kä ɣä, pen kɛn ɣä ciaŋ! La mi̱emku rɔ̱ a niaŋ ce̱tkɛ det ti ri̱i̱ŋ piny wi̱i̱ pa̱a̱m Gil-yad.

6Kä lɛcku buɔykɛ ce̱tnikɛ det ti ca lak, lɛc ti tak ti thilɛ mi ci ben raar thi̱n.

7Kä gi̱eeku läŋkɛ ce̱tnikɛ dɔw nöör, piny miirä nhiam kaandu.

8A kuäär tekɛ män kua̱r ti jiɛn bäkɛl, kɛ luɔɔm ti jiɛn bädäk, kɛ nyier ti ŋuan ti ca luäŋ kɛ kuën.

9Duundɛ ɣöö luumdä min gɔaa rɛlɛ rɔ, ɛ jɛn nyam ɔ kɛlɔ kä man, kä nhɔk man ni jɛ ɛlɔ̱ŋ. Mɔ ca jɛ nɛn ɛ nyier ɔ, la cɔalkɛ jɛ i̱ mi ca poth. Kä la män kua̱r kɛ luɔɔm jɛ a liak.

10Kä ɛŋa mi gɔaa ce̱tkɛ bak ɣɔaa, mi gɔaa ce̱tkɛ pay, kä buɔyɛ ce̱tkɛ cäŋ, kä riawɛ ce̱tdɛ nikɛ rɛm mi lät maacin.

11Kä cua̱ wä rɛy kakä wal, kɛ ɣöö bä gaakni jiɛn wä guic rɛy lo̱o̱lä, kɛnɛ mi ci wal ruët, kɛnɛ mi ci börɛ̈ɛ̈li tekɛ gaakni.

12A kuecä, cua̱ rɔ jek göörä luumdä ce̱tkɛ geer thurbiɛɛl mi wä ko̱o̱r.

13Lunyni jɔk lö Nya-cɔ-lam, lunyni jɔk bakɔ ji̱ ben guic. Ɛŋu bia ɣä guic ɔ, ce̱t guic yɛn ni nɛy ti duth?

← Chapter 5 Jump to: Chapter 7 →