Song of Solomon 7

Nuer Bible © Bible Society in South Sudan 1998,2012

← Chapter 6 Jump to: Chapter 8 →

1Ɛŋu gɔw ciöku i̱ nɛmɛ rɛy wa̱a̱ri lö nya kua̱r! Kä ɣa̱a̱mku ce̱tkɛ nikɛ mɔ tääthkɛ bël ɔ.

2Kä lo̱kdu ce̱tdɛ nikɛ tuɔ̱k mi thiäŋ kɛ kɔaŋ. Kä lɛ̈tdu ce̱tdɛ nikɛ buɔ̱n bɛɛl ti ca go̱l ɛ tuaal.

3Kä thinku ce̱tkɛ nikɛ cuɛ̈ɛ̈k kɛwä.

4Kä ce̱t ŋuäkdu nikɛ biɛɛ mi ca la̱t kɛ tuŋ gua̱r, kä wäŋku ce̱tkɛ nikɛ pul pi̱i̱ni kä Ɛc-bon, min te Thok Bath-ra-bim. Kä wumdu ce̱tdɛ nikɛ biɛɛ Lɛ-ba-nɔn, min guic ni wec Da-math-kɛth piny.

5Kä te wi̱cdu ni nhial ce̱tkɛ päm wec Kar-mɛl, kä ce̱t mi̱em wecdu nikɛ bi̱i̱ pua̱a̱ny duëël kua̱r, mëë cu gɔɔydɛ kuäär pɛc.

6Ji̱n gɔaa i̱ ɛlɔ̱ŋ, kä comi, luumdä ji̱n dholi ni gɔɔy.

7Kä cɛ ji̱ cuŋ ce̱tnikɛ jiath nöör, kä te thinku cuŋä ce̱tkɛ dɛy nöör.

8Kä cua̱ wee i̱, “Bä no̱r kɔt kä bä rɔ wä ka̱p karikɛ. Kä ce̱t thinku kɛ dɛy lua̱l, kä ɛ yiëëdu ŋuäny ce̱tkɛ dɛy ŋɔa̱a̱p,

9Kä ci̱emdu gɔaaɛ ce̱tkɛ kɔaŋ mi gɔaa.” Kä a kɔaŋ wä nikä luumdä, a jɛ lo̱ny ni thokdɛ.

10Ɛ ɣän duŋ luumädä, kä min go̱o̱rɛ ɛ ɣän.

11Bër lö luumdä, ber wan rɛy ciëŋ, ban wäär wä thuk thi̱n.

12Kä luɔ̱thnɛ rɛy ka̱a̱kni wal kɛ kui̱ kɔaŋ, banɛ wä guic mi cikɛ ruët, kɛnɛ mi cikɛ ɣa̱r, kɛnɛ mi ci börɛ̈ɛ̈li gaaknikiɛn jɔɔc. Ɛn wi̱ni bä ji̱ wä nhɔk thi̱n.

13Bi gaakni jiaath mandrak gɔw ŋuänydɛ jakä raar, thok dhɔaara te dɛy wal diaal tin gɔw thi̱n, ti pay ciɛk kɛnɛ tëë wal, tëë cä tɔ̱a̱w ji̱ luumdä.

← Chapter 6 Jump to: Chapter 8 →