1 Kings 16

nyankole

← Chapter 15 Jump to: Chapter 17 →

1Nyakubaho akatuma Yehu mwene Hanaani, kweziniza Baasha naamugira ati:

2Nkakwiha okuzimu, naakutunguura, naakuhindura omwebembezi w'abantu bangye Abaisiraeli. Kwonka okuratiire emitwarize ya Yeroboamu, waareetera abantu bangye Abaisiraeli kucumura; bangwisa kubi ahabw'ebibi byabo.

3Mbwenu iwe Baasha, niinyija kukucwekyerereza kimwe n'ab'eka yaawe; ab'omurayango gwawe mbagire nk'oku naagizire ab'ogwa Yeroboamu mwene Nebati.

4Weena ow'aba Baasha, oraafeere omu rurembo, ariibwe embwa, n'oraagwe omu ishwa, ariibwe amahungu.

5Endiijo mirimo ya Baasha, n'ebi yaakozire, n'amaani ge, bihandiikirwe omu Kitabo ky'eby'Obusingye bw'abagabe ba Isiraeli.

6Bwanyima Baasha yaafa, yaashanga baishenkuru, yaaziikwa Tiriza. Omutabani Eela yaamuhungurira, yaaba omugabe.

7Nyakubaho yaatuma omurangi Yehu mwene Hanaani kweziniza Baasha n'ab'omuryango gwe, n'ahabwa byona ebi yaacumwire omu maisho ga Nyakubaho, akamugwisa kubi n'ebi yaakoreise emikono ye akaba nk'ab'omuryango gwa Yeroboamu, kandi akataho n'okubacwekyereza.

8Omu mwaka gwa makumi abiri na mukaaga, ogwa Asa omugabe wa Yuda, nibwo Eela mwene Baasha yaaba omugabe wa Isiraeli omuri Tiriza, akategyekyera emyaka ebiri.

9Kwonka omugaragwa we Zimuri omukuru wa kimwe kya kabiri ky'ab'ebigaari bye, akamugiira omu kyetindo. Eela ku yaabaire ari Tiriza, omwa Aruza omureeberezi w'eby'eka ya omuri Tiriza, naanywa okuhitsya obu araasinde,

10Zimuri yaataahamu, yaamuteera, yaamwita, omu mwaka gwa makumi abiri na mushanju ogw'omu busingye bwa Asa omugabe wa Yuda; atyo yaaba omugabe omu mwanya gwe.

11Ku yaatandikire ati kuba omugabe aherize kusingama aha kitebe ky'obugabe, yaita ab'omuryango gwa Baasha boona, tiyaamutsigira oyetwa omushaija weena omuri beene waabo nari ow'omuri banywani be.

12Zimuri yaacwekyereza atyo ab'omuryango gwa Baasha, nk'oku ekigambo kya Nyakubaho eki yaagambiise Yehu omurangi kyabaire kiri.

13Ahabw'okuba ebibi bya Baasha byona n'eby'omutabani Eela ebi baakozire, bikareetera Isiraeli kucumura, byagwisa kubi Mukama wa Isiraeli ahabw'ebishushani byabo ebirikuramibwa.

14Endiijo mirimo ya Eela, na byona ebi yaakozire, bihandiikirwe omu Kitabo ky'eby'Obusingye bw'abagabe ba Isiraeli.

15Omu mwaka gwa makumi abiri na mushanju, ogw'omu busingye bwa Asa omugabe wa Yuda, nibwo Zimuri yaaba omugabe omuri Tiriza, akategyekyera ebiro mushanju. Ekyo kikabaho engabo zisiisiire kuteera Gibetoni ey'Abafilisiti.

16Ezo ngabo zaabaire zisiisiire ku zaahuriire ngu Zimuri agiire omu kyetindo yaita omugabe, ekyo kyareetera Abaisiraeli boona kwemeka Omuri omukuru w'eihe kuba omugabe wa Isiraeli eryo izooba omuri orwo rusiisira.

17Omuri nikwo kuruga Gibetoni, akahurura n'Abaisiraeli boona, bakagota Tiriza.

18Zimuri ku yaareebire baakwata orwo rurembo, yaahungira omu kigo ky'omu kikaari ky'omugabe, yaayeyokyeza omu nju y'obugabe, yaafa.

19Yaazira ebibi bi yaakozire akacumura omu maisho ga Nyakubaho, akakuratira emitwarize ya Yeroboamu, kandi n'ahabw'ekibi ki yaakozire, akareetera Isiraeli kucumura.

20Endiijo mirimo ya Zimuri n'ekyetindo ki yaagiiremu, bihandiikirwe omu Kitabo ky'eby'Obusingye bw'abagabe ba Isiraeli.

21Bwanyima Abaisiraeli bakeecwamu ebicweka bibiri, ekimwe kyayebumba na Tibuni mwene Ginati, kumuhindura omugabe, ekindi kyayebumba na Omuri.

22Kwonka abaayebumbire na Omuri baakiza emikono abaayebumbire na Tibuni mwene Ginati; Tibuni yaafa, Omuri yaaba omugabe.

23Omu mwaka gwa makumi ashatu na gumwe ogw'omu busingye bwa Asa omugabe wa Yuda, nibwo Omuri yaaba omugabe wa Isiraeli, akategyekyera emyaka ikumi n'ebiri, omukaaga agutegyekyeire Tiriza.

24Akagura ahari Shemeri ekibungo ky'omuri Samariya, empiiha z'efeeza akakumi kamwe n'enkumi ibiri, yaakyombekaho ekigo, orurembo rwakyo yaarweta Samariya naarweterera Shemeri owaabaire ari mukama w'ekyo kibungo.

25Omuri akakora ebitarikusiimwa Nyakubaho, yaakora ebibi ebirikukira eby'abaamubandiize.

26Ahabw'okuba akakuratirira kimwe emitwarize ya Yeroboamu mwene Nebati, n'ebibi bi yaakozire byareetera Abaisiraeli kucumura, bakagwisa kubi Mukama Ruhanga waabo, ahabw'ebishushani bi barikuramya.

27Endiijo mirimo ei Omuri yaakozire n'amaani gu yaayorekire, bihandiikirwe omu Kitabo ky'eby'Obusingye bw'abagabe ba Isiraeli.

28Bwanyima Omuri yaafa, yaashanga baishenkuru, yaaziikwa omuri Samariya; omutabani Ahabu yaamuhungurira, yaaba omugabe.

29Omu mwaka gwa makumi ashatu na munaana ogw'omu busingye bwa Asa omugabe wa Yuda, Ahabu mwene Omuri akatandika kuba omugabe wa Isiraeli. Ahabu ogwo mwene Omuri yaategyekyera Isiraeli emyaka makumi abiri n'ebiri ari Samariya.

30Ahabu mwene Omuri akakora ebitahikire omu maisho ga Nyakubaho, ebirikukirira kimwe eby'abaamubandiize.

31Nk'oku ahabwe kyamubeereire ekintu kikye okukora ebibi nk'ebya Yeroboamu mwene Nebati, akataho n'okushwera Yezebeeli, muhara wa Etibaali, omugabe w'Abasidoni, kyamureetera okuheereza Baali n'okumuramya.

32Yaayombekyera Baali eitambiro omu ndaaro i yaamwombekyeire omuri Samariya.

33Kandi Ahabu ogwo yaabyara enyomyo y'okuramizaho Ashera; yaayongyera kugwisa kubi Mukama Ruhanga wa Isiraeli okukira abagabe ba Isiraeli boona abaamubandiize.

34Omu busingye bwe, Hieli owa Beteli akombeka Yeriko. Ku yaabaire yaayombeka ati omusingi gwarwo, kyamureetera kufeerwa Abiraamu omutabani omujigaijo; kandi ku yaataireho ati amarembo gaarwo nabwo kyamurugiramu okufeerwa omutabani Segubu bucuranda; nk'oku ekigambo ki Nyakubaho yaagambiise Yoshwa mwene Nuuni, kyabaire kiri.

← Chapter 15 Jump to: Chapter 17 →