1 Kings 19

nyankole

← Chapter 18 Jump to: Chapter 20 →

1Ahabu ateekyerereza Yezebeeli byona ebi Eliya yaakora, n'oku yaita abarangi boona.

2Bwanyima Yezebeeli atuma entumwa ahari Eliya, naamugira ati: Nyencakare nk'aga magingo, ku ndaabe ntagizire magara gaawe nk'oku ogizire ag'abo bantu; baaruhanga bakinture n'okukiraho.

3Eliya nikwo kutiina, akaimuka, akahunzya amagara, akaza Beerisheba ey'omuri Buyuda, akatsigayo omugaragwa we.

4Kwonka we akagyenda orugyendo rurikurenzya eizooba, akaza omu ihamba. Akihikayo akashutama ahansi y'omukinga, akeeshabira okufa, naagira ati: Mbwenu, ai Nyakubaho, mperere hi! Haakiri onyite, ahabw'okuba tiinyine ki ndikuhitsa baatatenkuru.

5Atyo abyama, agwejegyerera ahansi y'omukinga. Reero maraika amukoraho, amugira ati: Imuka orye.

6Onu ku amagamaga ati, areeba ahamutwe gwe omugaati guteekirwe aha mabaare garikwotsya n'akanyungu k'amaizi. Nawe arya, anywa, agaruka abyama.

7Maraika wa Mukama agaruka aija omurundi gwa kabiri, amukoraho naamugira ati: Imuka orye, ahabw'okuba orugyendo rukiri ruraingwa, rutakaakurema.

8Nawe aimuka, arya, anywa, agyendera aha mwiguto gw'ebyo byokurya, okumara amazooba makumi ana n'ebiro makumi ana, ahika Horebu aha rushozi rwa Ruhanga.

9Eliya ku yaahikire Horebu, yaataaha omu nyanga, yaaraaramu. Ahonaaho Nyakubaho yaamugira ati: Eliya, nookora ki aha?

10Onu amugarukamu ati: Ngizire eihari ringi ahabwawe, Mukama Ruhanga w'amahe; ahabw'okuba Abaisiraeli baitsire endagaano yaawe, baasheenya amatambiro gaawe, baita abarangi baawe. Hati niinye nyenka otsigaireho, mbwenu nibenda kuunyita.

11Onu amugira ati: Shohora, oyemerere ahari oru rushozi, omu maisho gangye. Ago magingo Nyakubaho arabaho. Omuyaga mwingi gw'amaani gushatura enshozi, gwatagura enkiri, gumwebembeire; kwonka Nyakubaho atagurimu. Handi hakye, harabaho omutsitsa, kwonka nagwo Nyakubaho tagwijamu.

12Omutsitsa ku guhingura, haija omuriro, kwonka nagwo Nyakubaho tagubamu. Bwanyima y'omuriro, hakurataho akaraka kakye kabobeire.

13Eliya ku yaakahuriire, yaayehumbika omunagiro gwe aha maisho, yaashohora, yaayemerera aha muryango gw'enyanga. Ahonaaho yaahurira eiraka nirimugira riti: Eliya, nookora ki aha?

14Nawe agarukamu ati: Ngizire eihari ringi ahabwawe Mukama Ruhanga w'amahe; ahabw'okuba Abaisiraeli baitsire endagaano yaawe, baasheenya amatambiro gaawe, kandi baita abarangi baawe. Hati niinye nyenka otsigaireho, mbwenu nu nibenda kuunyita.

15Nyakubaho amugira ati: Irooko ogarukyeyo, otoore ogurikuza omu ihamba rya Damasiko. Haza ku oraahikyeyo, osiigye Hazaeli amajuta, abe omugabe wa Siriya.

16Ogasiigye na Yehu mwene Nimushi, abe omugabe wa Isiraeli, kandi ogasiigye Elisha mwene Shafati owa Abelimehoola, abe omurangi w'okuza omu mwanya gwawe.

17Reero orikira Hazaeli, aitwe Yehu, n'orikira Yehu, aitwe Elisha.

18Kwonka shi niinyija kwetsigiraho omuri Isiraeli abantu enkumi mushanju, abatakatsimbiraga Baali maju; na boona abatakamunywegyeraga.

19Eliya atyo arugayo, ashanga Elisha mwene Shafati naahingisa ente makumi abiri na ina, zikomeraine ibiri-ibiri zimuri omu maisho; kandi we aine ikumi na ibiri ezirikuhereerukayo. Eliya ku aba naamurabaho, akwata omunagiro gwe agumujweka.

20Elisha atyo atsigaho ente, airuka akuratiire Eliya, amugira ati: Ndeka, mbanze nnywegyere tata na maawe, ndagane nabo, haza nkukuratire. Eliya amugira ati: Irooko ogarukyeyo. Mbwenu shi waareeba naakugira nta?

21Elisha atyo areka kumukurata, atwara ezo nte zikomeraine ibiri-ibiri, aziita, aziteekyesa emigamba yaazo, azigaburira abantu, barya. Bwanyima aimuka, akurate Eliya; aba omugaragwa we.

← Chapter 18 Jump to: Chapter 20 →