1 Kings 22 — nyankole

4Mpaho abuuza Yehoshafaati ati: Noija kuhurura naanye kuteera Ramoti-Gileadi? Yehoshafaati agarukamu omugabe wa Isiraeli ati: Nyowe naiwe turi bamwe. Abantu bangye nibo baawe, n'embaraasi zangye nizo zaawe.

5Kwonka Yehoshafaati agira omugabe wa Isiraeli ati: Banza obuuze Mukama, oreebe eki arikugamba.

6Mpaho omugabe wa Isiraeli ayeta abarangi nka magana ana bateeranira hamwe, ababuuza ati: Mpurure nteere Ramoti-Gileadi, nari ndereere? Bamugarukamu bati: Hurura! Nyakubaho naija kugikurekurira, Nyakusinga, ogisingure.

7Yehoshafaati abuuza ati: Beitu tihariho murangi ondi owa Nyakubaho ou twakwehanuuzaho?

8Omugabe wa Isiraeli agarukamu Yehoshafaati ati: Hakiriyo omuntu omwe ou twakwehanuuzaho ebya Nyakubaho, niwe Mikaaya mwene Imula. Kwonka mmwanga, ahabw'okuba tandagurira birungi, kureka ebibi. Yehoshafaati amugira ati: Nyakusinga, reka kugamba otyo.

9Omugabe wa Isiraeli nikwo kweta omukuru w'abasherukare akamugira ati: Irooko oreete ahonaaho Mikaaya mwene Imula.

10Obwo omugabe wa Isiraeli na Yehoshafaati omugabe wa Yuda bakaba bashutami aha bitebe byabo by'obugabe, bajwaire bushuuti zaabo, bari omu kibuga aha irembo rya Samariya, abarangi boona nibaragurira omu maisho gaabo.

11Reero Zedekiya mwene Kenaana akaba ayeheesheire amahembe g'ekyoma, yaagambira Ahabu omugabe ati: Nyakubaho yaagira ati: Aga mahembe nigo oraabingise Abasiriya okuhitsya obu oraabacwekyereze.

12Abarangi boona nabo baaba nikwo baaragura. Baamugira bati: Hurura oteere Ramoti-Gileadi, osingure; Nyakubaho naija kugikurekurira, Nyakusinga, ogisingure.

13Entumwa i baayohereize kweta Mikaaya, ekamugira eti: Reeba, omugabe abarangi boona hamwe batarikutaana bamuraguriire akaso karungi. Mbwenu n'ebyawe bibe nk'eby'omwe aharibo, omuragurire akaso karungi.

14Kwonka Mikaaya agira ati: Nindahira Nyakubaho, Mukama eki arangambire nikyo ndaagambe.

15Ku yaahikire omugabe, omugabe yaamubuuza ati: Mikaaya, tuhurure, tuze kuteera Ramoti-Gileadi, nari turereere? Onu amugarukamu ati: Irooko ohurure, ogisingure, Nyakubaho naija kugikurekurira, Nyakusinga.

16Omugabe amubuuza ati: Niinyija kukurahiza kangahi, otarikungambira kindi omu iziina rya Nyakubaho, kureka amazima?

17Onu amugira ati: Ndeebire Abaisiraeli boona bataataaniire omu nshozi, nk'entaama zitaine muriisa. Nyakubaho agira ati: Manya abo bantu tibaine mukama waabo, buri omwe k'agarukyeyo omu ka ye n'obusingye.

18Omugabe wa Isiraeli agira Yehoshafaati ati: Tinaakugambira ku atarikwija kundagurira by'akaso karungi, kureka ebibi?

19Mikaaya amugira ati: Mbwenu nu, hurira ekigambo kya Nyakubaho. Ndeebire Nyakubaho ashutami aha kitebe kye ky'obugabe, amahe g'omu iguru goona gamwemereire aha rubaju rwa buryo, n'aha rwa bumosho.

20Nyakubaho yaagira ati: N'oha oraabeihabeihe Ahabu, akahurura Ramoti-Gileadi, haza akagwayo? Omwe yaagamba okundi, n'ondi okundi.

21Bwanyima omutima gwaija, gwayemerera omu maisho ga Nyakubaho, gwagira guti: Niinye ndaamubeihabeihe.

22Mukama yaagubuuza ati: Noomubeihabeihesa ki? Gwamugarukamu guti: Niinyija kugyenda, mpindukye omutima gw'ebishuba, ngambire omu barangi be boona. Nawe agugira ati: Niiwe oraamubeihabeihe, kandi noija kukibaasa. Irooko obe nikwo waatwaza.

23Mbwenu, reeba, nikwo kibaire. Nyakubaho areeteire abarangi baawe aba boona kukubeiha, yaaragiira ku ogwerwa akagwe.

24Bwanyima Zedekiya, mwene Kenaana airira haihi, ateera Mikaaya oruhi rw'omushaya. Amugira ati: Mutima wa Nyakubaho andugireho ata, kuba niiwe yaagambira?

25Mikaaya amugira ati: Ekyo orabukimanye aha izooba ri oraagiireho kweshereka omu kishengye ky'endugu.

26Omugabe wa Isiraeli aragiira omwe aha bakungu be ati: Kwata Mikaaya ogu, omugarureyo ahari Amoni omutegyeki mukuru w'orurembo, n'ahari mutabani wangye Yoashi.

27Haza obagambire oti: Omugabe yaagira ati: Mute eki kishaija omu kihome, mukiriise ebyokurya bitaine ku biri, kandi mukinyweise amaizi, okuhitsya obu ndaatabaarukye buhooro.

28Mikaaya amugira ati: Ku oraagarukye buhooro, biri Mukama tiwe yangambisa. Ayongyera agira ati: Imwe bantu 'mwe mwena, ekyo mukihurire!

29Ahabu omugabe wa Isiraeli na Yehoshafaati omugabe wa Yuda bahurura kuteera Ramoti-Gileadi.

30Omugabe wa Isiraeli agambira Yehoshafaati ati: Nyowe niinyija kwehindura okundi, nze omu rugamba; kwonka iwe ojware ebyawe eby'obugabe. Mpaho omugabe wa Isiraeli ayehindura okundi, aza aha rugamba.

31Mbwenu obwo omugabe wa Siriya akaba aragiire abakuru b'ebigaari bye makumi ashatu na babiri ati: Mutarwana n'abato nobu baakuba abakuru; kureka murwanise omugabe wa Isiraeli wenka.

32Abakuru b'ebigaari by'okurwanisa ku baareebire Yehoshafaati, bagira bati: Buzimazima ogwo n'omugabe wa Isiraeli. Batyo bakubuuka kumurwanisa. Yehoshafaati aborooga!

33Abakuru b'ebigaari ku baareebire atari mugabe wa Isiraeli, baarekyera aho kumubinga.

34Kwonka omushaija omwe ananuura obuta, afa okurasha omwambi, aguteera omugabe wa Isiraeli ahu ebijwaro bye by'okurwanisa birikuteeranira n'eky'okwekingiza aha kifuba. Omugabe nikwo kugira orikugyendesa ekigaari kye ati: Hinduka, onyihe aha rugamba; ahabw'okuba naahutaara munonga.

35Eryo izooba orugamba rwashaarira, omugabe baamuhigika omu kigaari kye naareeba ei Abasiriya bari, okuhitsya obu yaafiire omu mwabazyo; n'eshagama y'omu buhuta bwe ekahimintika, ekaterama omu kigaari.

36Eizooba ku ryabaire nirirengarenga, baayamuza nibarangirira ab'omu ihe, bati: Buri muntu agarukye omu rurembo rw'owaabo, n'omu nsi y'owaabo.

37Omugabe Ahabu yaaba nikwo yaafa, omutumbi gwe baagutwara Samariya, baaguziikayo.

38Ekigaari baakyogyeza aha kiyanja kya Samariya, embwa zaakomberaho eshagama ye, na baamaraaya baakyogyeramu, nk'oku Mukama yaagambire.

39Endiijo mirimo ya Ahabu, n'ebi yaakozire byona, n'ekikaari ki yaakoreise emiino, n'endembo zi yaayombekire, bihandiikirwe omu Kitabo ky'eby'omu Busingye bw'abagabe ba Isiraeli.

40Ahabu nikwo yaafiire atyo, akashanga baishenkuru; omutabani Ahaziya akamuhungurira, akaba omugabe.

41Yehoshafaati mwene Asa akatandika kuba omugabe wa Yuda omu mwaka gwa kana ogwa Ahabu omugabe wa Isiraeli.

42Yehoshafaati obu yaaza aha ngoma, akaba aine emyaka makumi ashatu n'etano y'obukuru; yaategyekyera emyaka abiri n'etaano omuri Yerusalemu. Nyina akaba naayetwa Azuuba, ari muhara wa Shiluhi.

43Akakuratira emitwarize ya Asa ishe, tiyaagiteishukaho. Yaaguma naakora ebi Mukama arikusiima. Kwonka shi tiyaihaho ndaaro z'okuramizamu, abantu baaguma nibazitambiramu ebitambo, nibazootereramu obubaani.

44Yehoshafaati kandi akakora endagaano y'obusingye n'omugabe wa Isiraeli.

45Endiijo mirimo ya Yehoshafaati, n'amaani gu yaagizire, n'engamba zi yaarwaine, bihandiikirwe omu Kitabo ky'eby'omu Busingye bw'abagabe ba Yuda.

46Kandi akamarira kimwe omu nsi abashaija barikuraayira omu maramizo, abaabaire batsigaireho omu busingye bwa Asa, ishe.

47Omu biro ebyo Edomu ekaba etaine mugabe, kureka ekaba neetegyekwa omutsigire owaatairweho omugabe wa Yuda.

48Yehoshafaati akakora emeeri za Tarushiishi okuza Ofiri kwihayo ezaabu, kwonka tizirahikireyo, ahabw'okuba zikacwekyererera Ezionigeberi.

49Ebyo ku byahwaire Ahaziya mwene Ahabu yaagira Yehoshafaati ati: K'abashaija bangye bagyende hamwe n'abaawe omu meeri. Kwonka ekyo Yehoshafaati tarakisiimire.

50Bwanyima Yehoshafaati akafa, yaashanga baishenkuru; baamuziika nabo omu rurembo rwa Daudi ishenkuru. Yehoraamu omutabani yaamuhungurira, yaaba omugabe.

51Ahaziya mwene Ahabu akatandika kuba omugabe wa Isiraeli omuri Samariya omu mwaka gwa ikumi na mushanju ogwa Yehoshafaati omugabe wa Yuda; yaategyekyera Isiraeli emyaka ebiri.

52Akakora ebi Nyakubaho atarikusiima. Yaakuratira emitwarize ya ishe n'eya nyina n'eya Yeroboamu mwene Nebati, owaacumwize Isiraeli.

53Akaba omuheereza wa Baali, yaataho n'okumuramya. Yaagwisa kubi Mukama Ruhanga wa Isiraeli. Yaamwitsa ekiniga omu muringo gwona, nk'oku ishe yaakimwitsize.