bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nyankole
/
nyankole
/
1 Kings 20
1 Kings 20
nyankole
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 21 →
1
Benihadadi omugabe wa Siriya akahuruza eihe rye ryona, yaakwatanisa n'abandi bagabe makumi ashatu na babiri abaine embaraasi n'ebigaari. Yaagyenda, yaagota Samariya, yaagirwanisa.
2
Reero yaatuma entumwa omu rurembo ahari Ahabu, omugabe wa Isiraeli, kumugira ziti: Benihadadi yaakutumaho ati:
3
Efeeza zaawe n'ezaabu zaawe n'ebyangye; n'abakazi baawe barungi hamwe n'abaana baawe nabo n'abangye.
4
Omugabe wa Isiraeli nawe amugarukamu ati: Eego, mukama wangye Nyakusinga, nk'oku waagamba, nyowe ndi owaawe, n'ebi nyine byona n'ebyawe!
5
Bwanyima entumwa zikagaruka ahari Ahabu zaamugambira ziti: Benihadadi yaagira ati: Nkakutumaho ninkuragiira nti: Mpeereza efeeza zaawe n'ezaabu n'abakazi baawe n'abaana baawe.
6
Mbwenu nyencakare nk'aga magingo, niinyija kukwoherereza abairu bangye, bacaakye enju yaawe, n'amaju g'abagaragwa baawe; kyona eki baraahitsyeho engaro, baakisiima, bakitware.
7
Omugabe wa Isiraeli ayeta abakuru b'omuri egyo nsi boona, abagira ati: Mbwenu mwetegyereze, mureebe oku ogu mushaija arikutaara akabi. Reeba akantumaho kumuha abakazi bangye n'abaana bangye, n'okumuha efeeza zangye n'ezaabu zangye, haza tinaamwangira.
8
Abakuru boona n'abantu boona baamugira bati: Ebyo otabyetaho kandi otabiikiriza.
9
Nawe agira entumwa za Benihadadi ati: Mugambire mukama wangye omugabe muti: Ebi waabandize kunshaba, nyowe omwiru waawe, niinyija kubikora, kwonka eki tindikukikwikiriza. Entumwa zityo zibimuteekyerereza.
10
Benihadadi nawe amutumaho naamugira ati: Baaruhanga bakinture n'okukiraho, omuri Samariya ku haakubamu omucuucu gurikwijuza ebihi by'engabo zangye zoona.
11
Omugabe wa Isiraeli amugarukamu ati: Mumugambire muti: Orikujwara eby'okurwanisa tayekiita, kureka heesiima orikubijuura.
12
Benihadadi ku yaahuriire obwo butumwa, naanywa n'abandi bagabe omu rusiisira, yaaragiira engabo ze ati: Mutengye orugamba. Nabo baarutenga kuteera orurembo.
13
Mbwenu omurangi akaija, yaahika Ahabu omugabe wa Isiraeli, yaamugira ati: Nyakubaho naagira ati: Tiwaareeba egyo migogo yoona? Kwonka eri izooba niinyija kugikurekurira ogisingure, obone kumanya ku ndi Nyakubaho.
14
Ahabu amubuuza ati: Ni baahi abaraagirwanise? Onu ati: Nyakubaho naagira ati: Abatsigazi abarwani abarikureebererwa abategyeki bakuru b'ebyanga. Ayongyera, amubuuza ati: N'oha oraatandikirize orugamba? Amugarukamu ati: Niiwe.
15
Mpaho Ahabu ahuruza abatsigazi abarwani b'abategyeki bakuru b'ebyanga, bahika magana abiri na makumi ashatu na babiri; bwanyima ahuruza Abaisiraeli enkumi mushanju.
16
Bahurura omu ihangwe, Benihadadi ari omu nsiisira naayenywera asinzire, hamwe n'abagabe makumi ashatu na babiri, abaizire kumuha emikono.
17
Abatsigazi abarwani ab'abategyeki bakuru b'ebyanga ku baabandize kuteera, Benihadadi yaayoherezayo entatsi, zaamugira ziti: Engabo zaahurura niziruga Samariya.
18
Agira ati: Ku baraabe baareetwa okushaba obusingye, mubakwate bahuriire, nainga ku baraabe baareetwa okurwana, nabwo mubakwate bahuriire.
19
Batyo abatsigazi abarwani ab'abategyeki bakuru b'ebyanga bashohora nibaruga omu rurembo, bakuratiirwe eihe ry'Abaisiraeli.
20
Buri omwe yaayeitira omuntu. Abasiriya baahunga, Abaisiraeli baabakurata bababingire; omugabe Benihadadi owa Siriya yaahunga atembire embaraasi, ari hamwe n'ab'eihe ry'ab'aha mbaraasi.
21
Omugabe wa Isiraeli yaahurura, yaanyaga embaraasi n'ebigaari, yaita Abasiriya baingi munonga.
22
Ebyo ku byahwaire, omurangi ori yaija, yaahika omugabe wa Isiraeli, yaamugira ati: Irooko oyeteekateekye, oreebe eki oraakore; ahabw'okuba omwaka ku guraabe nigutandika, omugabe wa Siriya naija kugaruka kukurwanisa.
23
Bwanyima abagaragwa b'omugabe wa Siriya bakamugira bati: Manya baaruhanga baabo n'ab'omu bibungo; nikyo batukiriize amaani. Mbwenu ka tubarwanisize omu ruhita; buzimazima nitwija kubakiza emikono.
24
Eki oraakore n'eki: Iha abo bagabe, buri omwe ahu obaire omutaire, omu myanya yaabo otemu abakuru b'amahe.
25
Kandi ohuruze eihe ririkwingana n'eri waafeereirwe; ogarureho embaraasi omu mwanya gw'embaraasi, n'ekigaari omu mwanya gw'ekigaari. Haza tubarwanisize omu ruhita. Buzimazima nitwija kubakiza emikono. Nawe yaikiriza ebi baamugambiire, yaaba nikwo yaatwaza.
26
Omwaka ku gwabaire nigutandika, Benihadadi yaahuruza Abasiriya, yaaza Afeki kurwanisa Abaisiraeli.
27
Abaisiraeli nabo baahurura baine eby'okukoresa aha rugamba, baaza kubarwanisa. Abaisiraeli baasiisira ahashungaine nabo, bari nk'amasyo makye abiri g'embuzi; kwonka Abasiriya baashweka ensi.
28
Reero omuntu wa Ruhanga yaija, yaahika omugabe wa Isiraeli, yaamugira ati: Nyakubaho yaagira ati: Ahabw'okuba Abasiriya bagizire ngu Nyowe ndi ruhanga w'ebibungo, tindi ruhanga w'empita; mbwenu naaza kukurekurira egyo migogo yoona ogisingure, obone kumanya ku ndi Nyakubaho.
29
Batyo baamara ebiro mushanju basiisiire ahashungaine. Aha izooba rya mushanju orugamba rutandika. Abaisiraeli omu izooba rimwe baita omu Basiriya abantu akasirira kamwe ak'abarikugyendesa ebigyere.
30
Abaatsigaireho baahungira omu rurembo Afeki, ebigo byarwo byagwera abantu obukumi bubiri n'enkumi mushanju. Benihadadi nawe yaahungira omu kishengye ky'endugu eky'omuri orwo rurembo.
31
Abagaragwa be baamugira bati: tuhuriire ngu abagabe b'omurayango gwa Isiraeli n'ab'embabazi. Mbwenu ka twezirikye ebiguniya, twekome emigoye omu mutwe, tuze ahari ogwo mugabe wa Isiraeli; shana akaakusaasira, areka kukwita.
32
Batyo beezirika ebiguniya, beekoma emigoye omu mutwe, bahika omugabe wa Isiraeli, bamugira bati: omwiru waawe Benihadadi yaagira ati: Naakweshengyereza, otaanyita. Onu ababuuza ati: Biri akiriho? Ka ni mwene tata shi.
33
Mbwenu abo bantu bakaba bategyereize kureeba eki arikuteekateeka. Ahabu ku yaagambire ekyo, baakiiziraho baagira bati: Eego, Benihadadi ni mwene sho. Nawe nikwo kubagira ati: Nimwirooko mumureete. Benihadadi ku yaizire, yaamuhika; onu yaamutembesa omu kigaari kye.
34
Benihadadi yaamugira ati: Niinyija kukugarurira endembo zi tata yaanyagire sho, oyeteere amaduuka omuri Damasiko, nk'oku tata yaagataire omuri Samariya. Ahabu amugira ati: Ku oraatwaze otyo, naanye ninkurekura. Batyo baakora endagaano; n'onu yaamurekura.
35
Omwe omuri batabani b'abarangi, ahabw'okuragiirwa Mukama, akagambira mugyenzi we ati: Naakweshengyereza, nteera. Kwonka ogwo muntu yaayanga kumuteera.
36
Onu nikwo kumugira ati: Nk'oku otaayorobera eki Nyakubaho yaagamba, hati ku orandugyeho oti, entare neekwita. Haza ku yaamurugireho ati, entare yaamwita.
37
Bwanyima ogwo murangi yaabugana ondiijo muntu, yaamugira ati: Nteera, n'onu amuteera munonga, amuhutaaza.
38
Ogwo murangi ku aruga aho, ategyerereza omugabe aha muhanda, ayehindwire okundi n'ekitambaara ki ayeshwekire aha amaisho.
39
Omugabe ku yaabaire naahingura, ogwo murangi yaamutakira naamugira ati: Nyowe omwiru waawe, ku mbaire ninza aha rugamba, omuserukare yaakubuuka, yandeetera omuntu, yangira ati: Rinda ogu muntu. Ku araabure noomuzira nari noija kuriha empiiha z'efeeza enkumi mukaaga.
40
Mbwenu nyowe omuheereza waawe ku mbaire nindabanamu ninkora oku n'oku, ogwo muntu yaagyenda. Omugabe wa Isiraeli amugira ati: Orubanja rwawe rube nk'oku waarwecwera.
41
Ogwo murangi atyo arahuka kweiha ekitambaara ahamaisho, omugabe wa Isiraeli amumanya ku ari ow'omu barangi.
42
N'onu amugira ati: Nyakubaho naagira ati: Ahabw'okuba orekwire omuntu ou mbaire ndagiire ngu aitwe, mbwenu waaza kumuzira, oitwe omu mwanya gwe, n'abantu baawe baitwe omu mwanya gw'abe.
43
Omugabe wa Isiraeli atyo agaruka owe Samariya agwirwe kubi kandi aine enaku.
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 21 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22