1 Thessalonians 1

nyankole

Jump to: Chapter 2 →

1Nyowe Paulo na Silivaano na Timoteeho, nituhandiikira ab'ekigombe ky'abaikiriza ba Tesalonika, abari omuri Ruhanga Taata na Mukama Yesu Kristo, nitubendeza emigisha n'obusingye.

2Obutoosha tusiima Ruhanga ahabwanyu mwena, n'okubagambaho kaingi omu kushaba kwaitu.

3Nitwijuka omu maisho ga Ruhanga waitu kandi Tataitwe ebi mukora, ahabw'okwikiriza n'okwehenenga okurimu rukundo, kandi n'amatsiko agahamire omuri Mukama waitu Yesu Kristo.

4Banyaruganda nitumanya ku Ruhanga abakunda kandi ku yaabatooraine.

5Manya ku twabarangiriire Amakuru Marungi, bikaba bitari bigambo bugambo, kureka gakaba garimu amaani omuri Mutima Orikwera, kandi tukaba nitumanya ku gari ag'amazima. Nimumanya oku twabaire nitutwaza tubarimu ngu tubagasire.

6Haza naimwe mukatooreza emitwarize yaitu n'eya Mukama, mwaikiriza ekigambo nimubonabonesibwa munonga, kandi mushemereirwe ahabw'okuhwerwa Mutima Orikwera.

7Mutyo mwaba eky'okureeberwaho abaikiriza boona ab'omuri Makedoniya n'omuri Akaiya.

8Manya ekigambo kya Mukama ekyarugire omuriimwe, tikiragarukiire Makedoniya na Akaiya zonka, kureka enkuru y'okwikiriza Ruhanga kwanyu ekabuga hoona. Nikyo tutarikwetengyera kubigambaho.

9Bo bonka batugambaho nk'oku mwatwakiire, n'oku mwarekire kuramya ebishushani, mukakubuukira Ruhanga ohuriire kandi ow'amazima kumuheereza,

10n'okutegyereza Omwana we kuruga omu iguru, ou yaazoire omu bafiire, niwe Yesu, otujuna ekishinjo kya Ruhanga ekirikwenda kwija.

Jump to: Chapter 2 →