1 Thessalonians 3

nyankole

← Chapter 2 Jump to: Chapter 4 →

1N'ahabw'ekyo, ku twaremirwe kukigumisiririza, twasiima kutsigara Ateene twenka.

2Nikwo kutuma mwene waitu Timoteeho, omuheereza wa Ruhanga omu kurangirira Amakuru Marungi ga Kristo, ngu abahamye omu kwikiriza kwanyu kandi abeehangaanise,

3ngu hatakaagira owaatenteburwa ezo naku. Naimwe ekyo nimukimanya ku turi ab'okuzireeba,

4ahabw'okuba obu twabaire tukibaine, tukabagambira bukiri kare ku turi ab'okubonabonesibwa; nk'oku kibaireho kandi nk'oku murikukimanya.

5N'ahabw'ekyo, ku naaremirwe kukigumisiririza, naabatumaho Timoteeho, ngu mbone kumanya oku okwikiriza kwanyu kuri, obwo nintiina nti, shana omwohi akaaba yaaboohize, okwehenenga kwaitu kukaba okwa busha.

6Mbwenu Timoteeho, ku aizire naaruga okwo, yaatugambira enkuru nungi y'okwikiriza kwanyu n'okukunda kwanyu; kandi yaatumanyisa ku obutoosha murikutwijuka mutwiniire rukundo n'orushusho rw'okutureeba, nkaitwe oku turubainiire.

7N'ahabw'ekyo, banyaruganda, n'obu turaabe turi omu naku nyingi n'okubonabonesibwa, kwonka okwikiriza kwanyu kutugarwire omutima omunda.

8Manya nituruhuuka mwaba muhamiire omuri Mukama.

9Mbwenu tukaasiima tuta Ruhanga ahabw'okwo kushemererwa kwingi oku twine ahabwanyu omu maisho ge?

10Nitushaba tutaireho omutima nyomushana na nyekiro, ngu tubone kureebana naimwe butunu, n'okwijuririza ekibuzireho omu kwikiriza kwanyu.

11Ruhanga waitu kandi Tataitwe wenka, na Mukama waitu Yesu nibakatushorongyeze omuhanda oguraatuhitsye okwo owaanyu.

12Mukama abakanyisemu rukundo, eshaagaane, mugigirirane kandi mugigirire abantu boona, nkaitwe oku tugibagirira.

13Reero Mukama waitu Yesu ogwo ahamye emitima yaanyu; haza ku ariija hamwe n'abarikwera be boona, mushangwe mutaine ki murikuhaahuuzibwa, muri abarikwera omu maisho ga Ruhanga waitu kandi Tataitwe.

← Chapter 2 Jump to: Chapter 4 →