1 Thessalonians 4

nyankole

← Chapter 3 Jump to: Chapter 5 →

1Banyaruganda, eky'aha muheru nitubeeshengyereza, kandi nitubeehanangiriza omuri Mukama Yesu tuti: nk'oku mwatwegyeireho oku mushemereire kutwaza n'okugwisa gye Ruhanga, nk'oku murikukora hati, mube nikwo mwagumizamu nimukora n'okukiraho.

2Ahabw'okuba nimumanya ebi twabahabwire ahabwa Mukama Yesu.

3Manya eki nikyo Ruhanga ayenda. Ayenda ngu mube abarikwera, abataine kakwate na by'obushambani.

4Haza, nkabarikwera, buri omwe omuriimwe amanye okutwaza gye omukazi we naamuha ekitiinwa,

5kutari kutwarwa okwetenga kw'omubiri, nk'abakaafiiri abatamanya Ruhanga.

6Hatarigira owaashaagiza mugyenzi we omu kintu ekyo, akamusiisira obwo burungi bwe. Ahabw'okuba Mukama aba omuhoozi w'enzigu, nk'oku buzimazima twabaire twabahabwire.

7Manya Ruhanga taratweteire by'enshoni, kureka okuba abarikwera.

8N'ahabw'ekyo weena oteeta hari ekyo, aba atagayire muntu, kureka Ruhanga, obaha Mutima we Orikwera.

9Kwonka aha bikwatiraine n'okukundana kw'abanyaruganda, timurikwetenga kugira owaabibahandiikira, ahabw'okuba imwe mwenka Ruhanga yaaherize kubeegyesa okukundana,

10kandi buzimazima nimukunda abanyaruganda boona ab'omuri Makedoniya yoona. Reero nu, banyaruganda, nitubeehanangiriza n'okukiraho,

11mutuure mubukaire, mutaire omutima aha byanyu byonka, nimukoresa emikono yaanyu nk'oku twabaragiire,

12haza mubone kusiimwa ab'aheeru, mutarikutungwa by'omuntu weena.

13Beene Taata, aha by'abaagwejegyeire, titukaayenzire kubareka mutabimanyire, ngu mutakaacuncubara nk'abandi abataine matsiko oku baba.

14Manya nk'oku twikiriza ngu Yesu akafa kandi akazooka, n'abaagwejegyereire omuri Yesu nikwo Ruhanga aribareeta hamwe nawe.

15N'ahabw'ekyo nitubagambira ekyagambirwe Mukama, ku itwe abahuriire abariba bakitsigaireho obu Mukama ariija, tutaribandiza abaagwejegyeire.

16Ahabw'okuba haryabaho eiraka ririkuragiira, n'okweta kwa maraika omukuru n'okugamba kw'enzamba ya Ruhanga; reero Mukama ashuume naaruga omu iguru, haza abaafeereire omuri Kristo babe nibo baabanza kuzooka.

17Mpaho naitwe abahuriire, abariba batsigaireho, tutwarwe hamwe nabo omu bicu, tutangiririre Mukama omu kaabunga, kandi tutyo tugume nawe obutwire bwona.

18N'ahabw'ekyo muhuumurizane n'ebyo bigambo.

← Chapter 3 Jump to: Chapter 5 →