1 Thessalonians 5

nyankole

← Chapter 4 Jump to:

1Banyaruganda, eby'amagingo n'obunaku timurikwetenga kubihandiikirwa.

2Ahabw'okuba naimwe mwenka nimumanya gye ku ekiro kya Mukama kiriija nk'omushuma wa nyekiro.

3Abantu ku bariba nibagira ngu: Ni buhooro; kandi ngu: Tihariho kabi, nibwo okuhwerekyerera kuribagwera kitaraariire, nk'ebisha oku bikwata omukazi orikurumwa, haza tiharigira owaahonokaho.

4Kwonka, beene Taata, imwe timuri mu mwirima, ngu ekyo kiro kibagweho nk'omushuma.

5Ahabw'okuba mwena muri abaana b'omushana, kandi aba nyomushana; tituri ba nyekiro nari ab'omwirima.

6N'ahabw'ekyo ka turekye kugwejegyera nk'oku abandi bagira, kureka tugume nitureeba tutasinzire.

7Manya abagwejegyera bagwejegyera nyekiro, n'abasinda basinda nyekiro.

8Kwonka itwe nk'oku turi aba nyomushana, ka tugume turekye kuba abasinzi. Tujware eky'okwekingiza aha kifuba, nikwo kwikiriza n'okukunda, kandi n'enkofiira, nigo matsiko g'okujunwa.

9Ahabw'okuba Ruhanga taratuteekateekyeire kutumariraho ekishinjo, kureka ngu tujunirwe omuri Mukama waitu Yesu Kristo,

10owaatufeeraire ngu tugume hamwe nawe, yaaba turi abahuriire nari abafiire, aha kiro ki ariiziraho.

11N'ahabw'ekyo mugumyane kandi mwombekane, nk'oku murikugira na hati.

12Banyaruganda, nitubeeshengyereza ku muha ekitiinwa abarikubakorera nibeehenenga, nibabategyeka omuri Mukama kandi nibabahana.

13Haza mubasiime munonga ahabw'omurimo gwabo mubainiire rukundo. Mutuurane nabo n'obusingye.

14Kandi, banyaruganda, nitubeehanangiriza ku muhana abatatebeekaine, mukagumya abagwire enshazi, mukahwera abataine maani; abo boona mubagumisiririze.

15Mureebe ngu tihariho n'omwe omuriimwe orikuhoora mugyenzi we enzigu, kureka obutoosha mwitanire okukorerana gye, abandi boona.

16Mushemererwe ebiro byona,

17mushabe obutoosha,

18kandi musiime omu birikubaho byona, ahabw'okuba ekyo nikyo Ruhanga abendeza omuri Kristo Yesu.

19Mutaritsiza Mutima.

20Mutarigaya eby'oburangi,

21kureka mukyenguuze byona, kandi muhamire aha kirungi;

22mwetantare ekibi ky'omuringo gwona.

23Ruhanga Mukama w'obusingye wenka abeereze kimwe. Emitima yaanyu n'amagara gaanyu n'emibiri yaanyu birindwe biri gye. Haza aha kwija kwa Mukama waitu Yesu Kristo mushangwe mutaine ki murikuhaahuuzibwa.

24Manya ogwo owaabeetsire n'omwesigwa, kandi aryakikora.

25Beene Taata, mutushabire.

26Muramutsye abanyaruganda boona n'okunywegyerana okurikwera.

27Nimbarahiza Mukama ku ebaruha egi eshomerwa abanyaruganda boona.

28Embabazi za Mukama waitu Yesu Kristo zigume naimwe.

← Chapter 4 Jump to: