Amos 1

nyankole

Jump to: Chapter 2 →

1Ebi n'ebigambo bya Amosi, ow'omu bariisa ba Tekoa, ebi yaayorekirwe ahari Isiraeli, omu busingye bwa Uziya omugabe wa Yuda, n'omu bwa Yeroboamu mwene Yoashi omugabe wa Isiraeli; hatsigaireyo emyaka ebiri omutsitsa kwija.

2Akagira ati: Nyakubaho naatsinda naayema Siyooni, eiraka rye nirihindira Yerusalemu; amariisizo g'abariisa nigacura, n'obunyaatsi bw'aha mutwe gwa Karumeelo nibuhotoka.

3Mukama naagira ati: Ahabw'ebicumuro bishatu by'aba Damasiko n'aha bwa bina tindibaihaho kifubiro; ahabw'okuba bakahuura Abagileadi n'ebihuuzo by'ebyoma.

4Nikyo ndyoherereza omuriro aha nju ya Hazaeli, gukookyeza kimwe ebigo bya Benihadadi.

5Ndyahenda empimbi z'amarembo ga Damasiko mmareho abatwire omu ruhita rwa Aveni, n'okwaitse enkoni y'obugabe omuri Betedeni; n'Abasiriya batwarwe Kiiri bari enkwatwa. Nikwo Nyakubaho arikugamba.

6Nyakubaho naagira ati: Ahabw'ebicumuro bishatu by'Abaagaaza n'ahabwa bina, tindibaihaho kifubiro; ahabw'okuba bakatwara ab'eihanga ryona bari enkwatwa baabarekurira Abanyaedomu.

7Nikyo ndyoherereza omuriro aha kigo kya Gaaza, gukookyeza kimwe ebigo byarwo.

8Ndyamaraho abatwire omuri Ashidoodi, n'okwaitse enkoni y'obugabe omuri Ashikelooni, mbangire Ekurooni omukono, n'Abafilisiti abaatsigaireho bacwekyerere. Nikwo Mukama Ruhanga arikugamba.

9Nyakubaho naagira ati: Ahabw'ebicumuro bishatu by'Abanyatuuro, n'ahabwa bina, tindibaihaho kifubiro; ahabw'okuba bakarekurira Abanyaedomu eihanga ryona, tibaijuka ku baine naryo endagaano y'okuba abanyaruganda.

10Nikyo ndyoherereza omuriro aha kigo kya Tuuro, gukookyeza kimwe ebigo byayo.

11Nyakubaho naagira ati: Ahabw'ebicumuro bishatu by'Abanyaedomu n'ahabwa bina, tindibaihaho kifubiro; ahabw'okuba bakabinga beene waabo babacurikiire rurara, batabainiire saasi n'akakye, ekiniga kyaguma nikyenda kubabarura, baine enziika ebiro byona.

12Nikyo ndyoherereza omuriro ahari Temani, gukookyeza kimwe ebigo bya Bozira.

13Nyakubaho naagira ati: Ahabw'ebicumuro bishatu by'Abaamoni, n'ahabwa bina, tindibaihaho kifubiro; ahabw'okuba bakafumurana abakazi ba Gileadi abaine enda, ngu babone kwirizayo omwatano gw'ensi yaabo.

14Nikyo nditwekyera ekigo kya Raba omuriro, gukookyeza kimwe ebigo byayo; hakabayo orwari aha izooba ry'orugamba, n'eihunga aha izooba ry'akasooroora;

15omugabe waabo hamwe n'abategyeki be bakatwarwa bari enkwatwa.

Jump to: Chapter 2 →