Amos 9

nyankole

← Chapter 8 Jump to:

1Nkareeba Nyakubaho ayemereire aha rubaju rw'eitambiro; reero yaaragiira ati: Teera munonga emitwe y'enyomyo za Nyaruju, okuhitsya obu orukanga ruraatengyeete, kandi ozishenyagurire aha mitwe y'abantu boona; haza abaraatsigareho baitwe, hatagira owaahunga, kandi hatagira owaakira.

2Nobu baakutimba, bakahika okuzimu, omukono gwangye guryabaihayo; nobu baakutemba bakahika omu iguru, nayo ndyabahananturayo.

3Nobu baakweshereka aha mutwe gwa Karumeelo, ndyabacoocooza, mbaiheyo. Kandi n'obu baakuunyeshereka okuzimu ahansi y'enyanja, okwo nayo nkaaragiira ekijoka kibarumirayo.

4Nangwa n'obu baritwarwa omu bukwatwa bafunyirwe abazigu baabo, ndyaragiira rurara ebaitireyo, kandi ngume mbataireho eriisho kubakora kubi, kutari kubakora gye.

5Mukama Ruhanga ow'amahe, okora aha nsi, ekayaga, abagitwiremu boona bakacura, kandi yoona ekaijura nka Nailo, ekaijururuka nk'ogwo Mugyera gwa Misiri,

6ogwo oyombeka kaanyinaabiri ze omu iguru, akahamiza orukanga rwe eruguru y'ensi; oyeta amaizi g'enyanja kwija, akagashandaaza ensi, Nyakubaho niryo iziina rye.

7Nyakubaho naagira ati: Imwe Baisiraeli 'mwe, ahariinye timuri nk'Abanyaetiopiya? Tindaihire Baisiraeli omu nsi ya Misiri, n'Abafilisiti Kafutoori, n'Abasiriya Kiiri?

8Reeba, Nyowe Mukama Ruhanga amaisho ngataire ahari obu bugabe enyabibi, kandi ndyabucwekyereza, mbumare omu nsi; kureka abu ntaricwekyerereza kimwe n'ab'omuryango gwa Yakobo. Nyakubaho nikwo arikugamba.

9Manya reeba, ndyaragiira, kandi nshungurire ab'omuryango gwa Yakobo omu mahanga goona, nk'oku omuntu ashungurira oburo aha rugari, kwonka hatagire rujuma rwaragara ahansi.

10Abasiisi boona ab'omu bantu bangye, abagira bati; Tihaine kabi karitugwera, nobu kwakuba okutuhikaho, baryaitwa rurara.

11Aha izooba eryo ndyaimutsya enju ya Daudi eyaagwire, mpunduuze ebyayo ebyasheenyukire, nyimutsye ebisheenyuka byayo, ngyombekye busya, ebe nk'oku yaabaire eri omu biro bya ira;

12babone kukubuura ekicweka kya Edomu ekyatsigaireho n'amahanga goona agarikuunyetererwa. Nyakubaho orikora ekyo, nikwo arikugamba.

13Nyakubaho naagira ati: Ebiro biri haihi kuhika, obu eigyesha ririkuratana riti n'eibiba, n'okunyuuka emizaabibu kukakuratana kuti n'okugibyara, obu enshozi ziritoonya viino enuzire; enshozi zoona zikahimintika nayo.

14Ndyagarura abantu bangye Abaisiraeli aha buteeka, bombekye busya endembo zaabo ezaashenyagurikire, bazituuremu, babyare emizaabibu, banywe viino yaayo; bahingye emisiri, barye ebi eyerize.

15Ndyababyara omu nsi yaabo, barekye kurandurwa obundi omuri egyo nsi ei mbahaire. Mukama Ruhanga waanyu nikwo arikugamba.

← Chapter 8 Jump to: