Amos 8

nyankole

← Chapter 7 Jump to: Chapter 9 →

1Oku nikwo Mukama Ruhanga yaanyorekire: Nkareeba ekiibo kirimu ebijuma by'ekyanda.

2Nyakubaho yambuuza ati: Amosi nooreeba ki? Naamugarukamu nti: Nindeeba ekiibo kirimu ebijuma by'ekyanda. Bwanyima Nyakubaho yangira ati: Mbwenu muheru y'abantu bangye Abaisiraeli yaahika. Tindirenzya maisho bicumuro byabo obundi.

3Eryo izooba ebyeshongoro by'omuri Nyaruju biryaba okuborooga. Mukama Ruhanga naagira ati: Emitumbi y'abantu eryaba mingi, baginagye buri hantu bacecekire.

4Nimuhurire eki, imwe abarikuribatiirira abakyene, mukamara abooro omu nsi.

5Obwo nimugira muti: Oku kwezi kubonekire, nikurenga ryari tukatunda ebyokurya by'omujuma? Na Sabato ehweho ryari, tukahununura engano z'okutunda; ekitenga tukakihindura kikye, n'encuro tukagihindura mpango; haza tukaryangatanisa nitukoresa endengo z'ebishuba;

6abooro tukabagura efeeza, n'abakyene tukabagura enkaito, tukatunda entiti z'engano?

7Nyakubaho ohimbya Yakobo naarahira ati: Buzimazima tindyebwa kintu kyona eky'ebi baakozire.

8Mbwenu shi ekyo tikirireetera nsi kutetema, n'abagitwiremu boona bakacura? Egyo nsi yoona ekaijura n'eijururuka nka Nailo Omugyera gwa Misiri?

9Kandi Mukama Ruhanga naagira ati: Ahari ekyo kiro ndyarenzya eizooba omu ihangwe, ntimbye ensi omwirima nyomushana,

10amagyenyi gaanyu ngahindure okucura, n'ebyeshongoro byanyu byona bibe okutonzya, abantu boona mbeezirikise ebiguniya, n'emitwe yaabo yoona ebe enkomborora, eryo izooba ndigire nk'eri omuntu acuriiriraho mutabani we omwe nyamunegyere, omuheru gwaryo gube nk'ogw'eizooba ry'obusaasi.

11Mukama Ruhanga naagira ati: Obunaku buryahika nteeze ensi enjara etari njara y'ebyokurya nari eiriho ry'ebyokunywa; kureka ey'okuhurira ekigambo kyangye.

12Baryazengyerera okuruga aha nyanja okuhika aha ndiijo; bairukye nibakora oku n'oku kusherura ekigambo kya Mukama; kwonka tibarikibona.

13Eryo izooba empangare nungi n'abatsigazi baryagwa enshazi ahabw'eiriho.

14Reero abarahira Ashima ruhangakazi wa Samariya, bakagira bati: Iwe Daani nindahira ruhanga waawe! Kandi bati: Nindahira omuhanda gurikuza Beerisheba; baryagwa kandi tibarigira bu baimukire.

← Chapter 7 Jump to: Chapter 9 →