Amos 7

nyankole

← Chapter 6 Jump to: Chapter 8 →

1Mbwenu oku nikwo Nyakubaho yaanyorekire. Reeba, akareeta omuzinga gw'enzigye, obunyaatsi bw'embaraasi z'omugabe bwaherize kutemwa, obusya butandikire kumera!

2Ku zaaherize kurya obunyaatsi bw'egyo nsi, naagira nti: Ai Mukama Ruhanga, ninkweshengyereza, osaasire abantu abaawe! Aba Yakobo nibabaasa bata kugumaho, haza bari bakye?

3Nyakubaho ekyo yaakyegarukamu, yaagira ati: Ekyo tikirikwija kubaho.

4Kandi Mukama Ruhanga oku nikwo yaanyorekire; reeba, Mukama Ruhanga akaba naayeta omuriro kufubira abantu be, kukomberaho kimwe enyanja rutankanda ey'okuzimu, n'okumaraho ensi.

5Ntyo ngira nti: Ai Mukama Ruhanga, ninkweshengyereza, reka! Aba Yakobo nibabaasa bata kugumaho, haza bari bakye?

6Mukama Ruhanga ekyo yaakyegarukamu ati: Ekyo nakyo tikirikwija kubaho.

7Ekindi akaanyoreka eki: Reeba Mukama akaba ayemereire aha rubaju rw'ekigo kyombekirwe na kariisho, haza agikwaitse omu ngaro.

8Nyakubaho yangira ati: Amosi, nooreeba ki? Nti nindeeba kariisho. Reero Nyakubaho agira ati: Reeba ninta kariisho omu bantu bangye Abaisiraeli, kandi tindirenzya maisho bicumuro byabo obundi.

9Emyanya y'obutungutungu eya Isaaka eryaba omushaka, n'emyanya ya Isiraeli erikwera ecwekyerezibwe; nyimukye nkwaitse rurara, ndwanise ab'omuryango gwa Yeroboamu.

10Bwanyima Amaziya omuhongyerezi wa Beteli akatuma ahari Yeroboamu omugabe wa Isiraeli naamugira ati: Amosi akugiiriire omu naama mbi omu ba Isiraeli. Ebi arikugamba ensi terikubaasa kubigumisiriza!

11Ahabw'okuba agizire ati: Yeroboamu n'ow'okwitwa. Abaisiraeli n'ab'okwihwa omu nsi yaabo, bakazaahibwa.

12Bwanyima Amaziya agira Amosi ati: Iwe muhanuuzi 'we, irooko ohungire omu nsi ya Yuda, obe niyo waahwera omushumi, orangireyo;

13kwonka otagaruka kurangira Beteli, ahabw'okuba n'omwanya gw'omugabe wenka; kandi nigwo Iramizo ry'obugabe.

14Amosi agarukamu Amaziya ati: Nkaba ntari murangi, kandi ntari mwana w'omurangi; kureka ndi omuriisa n'omusharizi w'emikunyu.

15Nyakubaho yaanyiha aha murimo gw'okuriisa amatungo; yangira ati: Irooko orangire abantu bangye Abaisiraeli.

16Mbwenu nu hurira eki Nyakubaho arikugamba. Noogira oti: Otarangira kubi Isiraeli kandi otaragurira kubi ab'omuryango gwa Isaaka.

17Nikyo Nyakubaho arikukugira ati: Omukazi waawe aryaba maraaya omuri oru rurembo, batabani baawe na bahara baawe baitwe rurara, ensi yaawe eryabaganisibwa n'omugoye, naiwe ofeere omu nsi y'abatarikummanya Nyowe Ruhanga; buzimazima Abaisiraeli baihwe omu nsi yaabo bazaahibwe.

← Chapter 6 Jump to: Chapter 8 →