1 Chronicles 15

Oromo Bible (KITAABA WAAQA) 2019

← Chapter 14 Jump to: Chapter 16 →

1Daudini mana iti galu dira isaa keesati jaarate. Ammalle fulla Sanduqa Wold'aqisa Waaqa kayanile mid'aase, waaro iti jaare.

2Jennaani inni waan jed'e, Worra Lawi male nami tokoleeni Sanduqa Wold'aqisa imbaatini. Wonti akanatiifi nami duri AABBO Waaqi fohate huji suni kenneefi, ammalle, haga jiru jireenna na hojad'a jed'e, worra.

3Duuba Daudini worra Israeli ch'ufa Yerusalemuti wolti yaame, aka Sanduqa Wold'aqisa fulla inni kurfeesefiti geesani.

4Ammalle inni ilmaani Harunitifi worra Lawi wolti yaame.

5Gosa Lawi keesa nami balbala Kohathi ka inni yaame, Yurieli, ka nama d'ibba tokofi diddama ka balbala isaa inni iti mataa:

6Nami balbala Merari ka inni yaame, Asaya, ka nama d'ibba lamafi diddama ka balbala isaa inni iti mataa;

7nami balbala Gershoni ka inni yaame, Yoeli, ka nama d'ibbafi sodoma ka balbala isaa inni iti mataa;

8nami balbala Elisafani ka inni yaame, Shemaya, ka nama d'ibba lama ka balbala isaa inni iti mataa;

9nami balbala Hebroni ka inni yaame Elieli, ka nama saddeetama ka gosa isaa inni iti mataa;

10nami balbala Uzieli ka inni yaame, Aminadabu, ka nama d'ibbafi kud'ani lama inni iti mataa.

11Jennaani Daudini qaalole Sadokifi Abiatharifi ammalle worra gosa Lawi: Urieli, Asaya, Yoeli, Shemaya, Elielifi Aminadabu yaame

12waan jed'eeni, Isani worra mata balbala gosa Lawiti; tanaafi isanifi oboleyaani teesani ch'ufti ufi qulqulleesa, aka Sanduqa Wold'aqisa AABBO Waaqa Israeli fulla anini mid'aasefitini d'uftani.

13Waan gaafa qara isa fuud'ani isani huji suni keesa injirreefi AABBO Waaqi aka hama nuti dallane, waan nu aada isaa gula Sanduqa suni baachu dinneefi.

14Jennaani qaaloleefi worri Lawi ufi qulqulleese, aka Sanduqa Wold'aqisa AABBO Waaqa Israeli baatani.

15Akuma Musani dubbi AABBO Waaqa gula worra barsiise kaani, worri Lawi Sanduqa Wold'aqisa Waaqa kalchooni gurmu irati baate.

16Ammalle Daudini worra mata gosa Lawi wolti yaame waan jed'eeni, Nama kiraarifi bilbila d'ae sirbu fohad'a.

17Balbala gosa sirbitu keesa worra kana, ka bilbila sibiila diimani mid'aasani d'ae sirbu, fohatani: Hemani, ilma Yoeli, oboleesa isaa Asafu, ilma Benekia, Ethani, ilma Kishi, ka balbala Marari. Ammalle worra gosa Lawi kana, ka worra qarqaare kirari qonqo olbaase d'au, fohatani: Zekaria, Yaasieli, Shemiramothi, Yehieli, Uni, Eliabu, Maaseya, Benaiya. Ammalle worra gosa Lawi d'ibi, ka kirari qonqo gadi buuse d'au, worra kana fohatani: Matithia, Elifebehu, Mikneya, Azazia, ammalle worra fullo eegu, Obed-Edomufi Yeieli.

22Waan inni sirba gudo beekhufi Kenani fohatani mata siribdu gosa Lawi suni tolchani.

23Berekiafi Elkana, Obed-Edomufi Yehia woliini, nama Sanduqa Wold'aqisa eegu, fohatani. Ammalle qaalole tana fohatani Shekania, Yoshefathi, Nethaneli, Amasai, Zekaria, Benaiya, Elezeri, aka worri Sanduqa Wold'aqisa dura yae magalata d'au.

25Jennaani Daudifi jaarole Israelitiifi jari gugurda askarti mana Obed-Edomu d'aqani, Sanduqa Wold'aqisa arti fuud'ani, guddo gammadani.

26Waan Waaqi worra Lawi ka Sanduqa Wold'aqisa AABBO Waaqa baatu qarqaareefi, worri koromi looni torbafi hooliye torba sorio qale.

27Daudini ubaara boofta dansa keeyate, ammalle worri sirbituleni, Kenania ka worraa matatifi worri Lawi ka Sanduqa baatuleeni woyuma akasi keeyate. Daudini ammalle woya aka korbo hid'atani taani keeyate.

28Duuba akanaani worri Israeli ch'ufti gammade, magalatafi bilbilafi kirari d'ae sirbe, Sanduqa Wold'aqisa Yerusalemu geese.

29Ato Sanduqa suni diratini yaanu, intalti Saulo Mikalini qaa manatini millate aka Daudini AABBO Waaqa durati sirbe ch'ech'eu agarte, jennaani isa tufate.

← Chapter 14 Jump to: Chapter 16 →