John 21

Oromo Bible (WAADAA LAMMATAA) 2013

← Chapter 20 Jump to:

1Asiin maayii Yesuus galaana Xibiriyaadoosii biratti darasootatti deebi'ee isaanitti mudhate.

2Simoon Pheexroosiif ka Didimoos jedhamu Toomaas nama Qaanaa Galiilaa Naatinaa'elii fi ijoolleen Zabdiyoosi darasoota keessaallee ka biraa namoonni lamaa isaan woliin turan.

3Simoon Pheexroos, «Ani Qurxummii qabu'uuf deema'aara» isaaniin jedhe. Isaan, «Nullee si woliin deemna» jedhaniin. Bayanii gara yabalaa seenan. Halkan san ammoo womaa hin qabne.

4Haga bari'e Yesuus galaana bira dhaabate. Darasoonni ammoo Yesuusiin ta'uu hin beenne.

5Yesuusillee, «Ijoollee tiyya! Waan nyaatan qabduu?» isaaniin jedhe. Isaan, «Hin qabnu» jedhanii deebisaniif.

6Innillee, «Siiboo keessan yabala keessan gara mirgaatiin darbaa'a hin argattanii» isaaniin jedhe. Kanaaf hin darbatan; hennaa san sababaa baay'inna Qurxummi'iitiif harkisuu dadhaban.

7Darasaan Yesuus jaalatu Pheexroosiin, «Goofta'aa bee!» jedhe. Kanaaf Simoon Pheexroos Gooftaa ta'uu haga dhagaye, qullaa waan tureef uffata uffatee gara galaanaa uf darbe.

8Darasoonni kuuwwan ammoo lafa irraa haga ciqilee dhibba lamaa caalaa guddaa waan hin fagaanneef siiboo qurxummi'iin guuttame harkisa'aa yabalaan dhufan.

9Haga gara lafaa bayan qurxummi'ii fi xoroshoo barbadaa irra jiru argan.

10Yesuusillee, «Qurxummii amma qabdan keessaa as fidaa'a» jedheen.

11Simoon Pheexroosillee gara yabalaa seenee qurxummii dhibbaaf shantamii sadihii gugurdaa siiboo guutee gara lafaa harkise; haga kana maraa qurxummiin guddaa ta'ullee siiboon hin biinxamne.

12Yesuusillee, «Koottaa hurbaata nyaadhaa'a!» isaaniin jedhe. Darasoota keessaa tokkollee, «Ati eennu?» jedhee ka isa qoruu ugge hin jiru. Waan akka inni Gooftaa ta'e beekaniif.

13Yesuusillee dhufee, xoroshoo fuudhee, isaaniif kenne; akkasuma qurxummiillee'e.

14Yesuus worra du'an jiddu'uu ka'ee hennaa sadaffa'aatiif darasootatti mudhate.

15Haga xoroshoo nyaataniin maayessa Yesuus Simoon Pheexroosiin, «Ilma Yoona'aa Simooni, kanniin caalaa na jaalattaa?» jedheen. «Ee, Gooftaa, akka si jaaladhu atuu hin beetta» jedheen. «Ilmoolee tiyya bobbaasi» jedheen.

16Ammallee lammaffaa, «Ilma Yoona'aa Simoon, na jaalattaa?» jedheen. «Ee Gooftaa akka si jaaladhu atuu hin beetta» jedheen. «Korbeeyyii tiyya eegi» jedheen.

17Sadaffa'aaf, «Ilma Yoona'aa Simoon, na jaalattaa?» jedheen. Sadaffaa na jaalattaa? jennaniin Pheexroos gaddee, «Gooftaa kiyya! Ati waa maraa beetta; akka si jaaladhullee atuu hin beetta» jedheen. Yesuusillee, «Hoolota tiyya bobbaasi»

18«Ani dhugama dhuga'aatiin siin jedha: hennaa nama dargaggeessa turte, mudhii kee ufumaan hidhattee hulee feete deemta. Haata'uu ammoo hennaa jaartee harka kee ol qabattee, namni biraa mudhii kee si hidhee gara ati hin barbaanne si fida» jedheen.

19Du'a attamiitiin Rabbiin kabajju'uuf akka ta'u mudhisu'uuf kana jedhe. Kana haga jedheen maayessa, «Na faana koottu!» jedheen.

20Pheexroosillee midhatee darasicha Yesuus jaalatu uduu isa faanaa deemu arge, innillee hennaa dhiyanaa gara qoma isaatitti siqee, «Gooftaa'a, ka dabarsee si kennu eennu?» ka jedhee gaafate san.

21Pheexroosillee kana argee, Yesuusiin, «Gooftaa'a, kunillee attamitti ta'a?» jedheen.

22Yesuus, «Haga ani dhufuuf akka jiraatu yoo jaaladhe hoo maaltu si dhibe? Ati na faana koottu» jedheen.

23Kanaaf darasichi sun hin du'u wonti jedhame uduu gara obboleewwanii gayee, haga Yesuus dhufuuf akka jiraatu yoo jaalate maaltu si dhibe?» jedheen malee, hin du'u hin jenneen.

24Waan kanninillee ka rageef ka barreesse darasaa kana, ragaanillee dhugaa akka ta'e hin beenna.

25Yesuus waan biraallee heddu hojjateera. Akkasuma uduu marti isaanii tokko tokkoon barreeffamanii jiraatanii, kitaabbillee barreeffaman saniif, ani lafti tun waan geettu natti hin fakkaatu.

← Chapter 20 Jump to: