Mark 11

Oromo Bible (WAADAA LAMMATAA) 2013

← Chapter 10 Jump to: Chapter 12 →

1Isaan Yeruusaaleemitti galu'uuf Beetafaage'ee fi Bittaaniya'aatti, gara gaara ejersaatitti hennaa dhiyaatan, Yesuus darasoota ufii keessaa nama lamaan,

2«Gara ganda fuullee keessan jiru san dhaqaa'a, akkuma achi geettaniin ilmoo harre'ee ka haga ammaa namni tokkollee hin yaabbanne argitan; hiika'aatii as naa fidaa'a.

3Eennullee, ‹Maaf hiittan?› yoo isiniin jedhe, ‹Goofta'atu barbaada; inni uduu hin turin bakumatti deebisa› jedhaa'a!» isaaniin jedhe.

4Achiin maayessa dhaqanii ilmoo harre'ee balbala tokko afoo karaa irratti ka hidhamteertu arganii hiikan.

5Worra achi dhaabatan keessaa gari gariin, «Maal godhu'uuf ilmoo harre'ee hiittan?» jedhanii isaan gaafatan.

6Darasoonnillee waan Yesuus isaaniin jedhe isaanitti himan; isaanillee isaan dhiisan.

7Ilmoo harre'ee sanillee gara Yesuusii fidan. Uffata ufii ilmoo hare'ee irra kaayan; Yesuusillee hin yaabbate.

8Namoonni hedduu uffata ufii, worri kuuwwan ammoo muka irraa baala ciranii karaa inni irra deemu irratti afan.

9Worri duraa fi duuba isaa deeman laagaa isaanii ol qabatanii, «Hoosaanaa! ka maqaa Goofta'aatiin dhufu ka eebbifame!

10Mootummaan abbaa keenna Daawitii ta dhuftu sun ta eebbifamte! Hoosaanaa ol samii gubba'atti» jedha'aa woca'aa turan.

11Yesuus Yeruusaalemitti mana woyyuu seenee, waan maraa haga laaleen maayessa, lafti waan dhiiteertuuf darasoota ufii kudha lamaan woliin gara Bittaaniya'aa dhaqe.

12Guyyaa lammaffa'aa hennaa isaan Bittaaniya'aa deebi'an Yesuus hin shoome.

13Inni muka hurbu'uu baala qabdu takka fago'otti argee, waan nyaatan irraa argadhinnaa laata? jedhee dhaqe. Haata'uu ammoo hennaan sun hennaa hurbuun midhaan godhatu waan hin taaneef, baala malee womaa irraa hin arganne.

14Hennama san Yesuus mukattii hurbu'uu saniin, «Ammaa achi eennullee midhaan sirraa hin nyaatin!» jedhe. Darasoonni isaallee waan inni jedhe kana dhagayan.

15Isaan hennaa Yeruusaalemiin gayan, Yesuus mana woyyuu seenee, worra achitti waa bitanii fi gurguran gad baase. Inni xarapheessaa worra birrii sharafuutii fi teessoo worra handarii gurguratuu garagaggalche.

16Eennullee mi'a baadhatee mana woyyuu keessa akka hin lufne dhoogge.

17Achiin maayessa inni akkana jedhee barsiise, «Manni kiyya gosa maraaf mana itti faateffatan ta'a jedhamee barreeffameera. Isin ammoo goda hattuun itti dhokattu gootan» isaaniin jedhe.

18Bulchoota gadootaatii fi barsiisonni Seera Muuse'ee, waan Yesuus jedhe dhagayanii, mala isa ittiin ajjeesan barbaaduu jalqaban, gumiin barumsa isaa guddisanii waan maalalfataniif, isaan isa sodaatan.

19Hennaa lafti galgaloofte, Yesuusii fi darasoonni isaa qachaa san keessaa baya'aa turan.

20Guyyaa lammaffa'aa ganama, Isaan uduu karaa san irra lufan, mukattiin hurbu'uu sun hiddumaan ta goddeertu argan.

21Pheexroos waan Yesuus jedhe qaabatee, «Barsiisaa, laali! mukattiin ati abaarte goddeerti» jedheen.

22Yesuusillee deebisee akkana isaaniin jedhe, «Rabbitti amanaa'a.

23Dhugaa isiniin jedha; eennullee garaa ufii keessatti uduu hin mamin amanti'iin, gaara kanaan, ‹Asii buqqa'ii, gara galaanaa darbami› yoo jedhe hin ta'aaf.

24Kanaaf ani akkana isiniin jedha, waan kadhattanii fi waan gaafattan maraa akka argattanitti amanaa'a, wonti gaafattan maruu isiniif kennama.

25Hennaa Rabbiin kadhachu'uuf dhaabattan, Abbaan keessan ka samii jiru yakka keessan akka isinii araaramu, eennuun irrattillee komii yoo qabaattan araaramaa'a.

26Isin ammoo yoo namaa araaramuu diddani, Abbaan keessan ka samii gubbaa jiru yakka keessan isinii hin araaramu.» jedhe.

27Isaan deebi'anii gara Yeruusaalemii dhaqan. Yesuus mana woyyuu keessa uduu deddeemu, bulchoonni gadootaa, barsiisonni Seera Muuse'eetii fi mangudoonni gara isaa dhufanii,

28Isaan Yesuusiin, «Baallii maali'iitiin waan kana maraa goota? Yookiin waan kana maraa akka gootuuf baallii eentu sii kenne?» jedhaniin.

29Yesuusillee deebisee, «Ani waan tokko isin gaafadha; yoo isin naaf deebiftan, Anillee baallii maali'iitiin waan kana maraa akka godhu isinitti hima.

30Yohaannis akka Cuuphuuf baallii eentu kenneef? Rabbii mo'o nama? mee naa deebisa'aa!» isaaniin jedhe.

31Isaan wol mormanii, «Rabbiin irra yoo jenne, ‹Dubbii Yohaannisii maaf amanuu diddan ree?› nuun jedha;

32‹Nama haa jennuu laata?› » jedhan. Namoonni maruu Yohaannisiin akka raagaatitti waan laalaniif gumii sodaatan.

33Kanaaf hin beennu jedhanii Yesuusiif deebisan. Yesuusillee deebisee, «Maarre anillee baallii maali'iitiin waan kana maraa akka godhu isinitti hin himu» isaaniin jedhe.

← Chapter 10 Jump to: Chapter 12 →