Mark 15

Oromo Bible (WAADAA LAMMATAA) 2013

← Chapter 14 Jump to: Chapter 16 →

1Akkuma lafti bariiteen obboroo bulchoonni gadootaa, manguddoonni, barsiisonni Seera Muuse'eetii fi Yaa'iin murti'ii maruu woliin mari'atan. Achiin maayessa Yesuusiin hidhanii fuudhanii Philaaxoositti dabarsanii kennan.

2Philaaxoosillee, «Ati Mootii Yihuudi'iitii?» jedhee gaafate. «Maarre atuu jette» jedhee deebise.

3Mootonni gadootaallee waan hedduun isa himatan. Inni ammoo womaa isaanii hin deebifne.

4Philaaxoosi ammoo, ammallee «Womaa hin deebiftuu? Kunoo waan meeqaan si himata'aaran?» jedhee gaafate.

5Yesuusillee ammoo deebii biraa tokkollee hin deebifneef; Philaaxoos waan kana hin baaseeffate.

6Hennaa ayyaana Faasika'aa Philaaxoos worra hidhaman keessaa nama tokko ka baniin gaafate isaanii hiiku'uuf aadaa qaban.

7Hennaa san worra shiftanii lola kaasa'aa nama ajjeesanii hidhaman keessaa namicha Baarbaan jedhamu tokkotu ture.

8Baniinillee bayanii akkuma baratame akka aadaa isaanii akka isaanii godhuuf Philaaxoosiin kadhatan.

9Philaaxoosillee Mootii Yihuudii akka isinii hiiku barbaaddanii? isaaniin jedhe.

10Inni akka bulchaa gadootaa hinaaffa'aan dabarsanii Yesuusiin isatti kennan beekeera.

11Bulchoonni gadootaa, Philaaxoos bikka isaa Baarbaaniin akka isaanii baasuuf Banii kakkaasan.

12Philaaxoos deebisee, «Eegasuu mootii Yihuudii ka jettan maal akka godhu barbaaddan ree?» isaaniin jedhe.

13Isaaniilee, «Isa fannisi!» jedha'aa iyyan.

14Philaaxoosillee, «Wonti hamaan inni godhe maali'i?» isaaniin jedhe. Isaan ammoo «Fannisi» jedhanii guddisanii iyyan.

15Philaaxoos yaa'ii gammachiisu'uuf jedhee Baarbaaniin isaaniif hiike. Achiin maayessa Philaaxoos Yesuusiin shabbeenaan dhaansisee akka fannifamuuf dabarsee kenne.

16Loltoonni Yesuusiin gara dallawa galma mooti'ii keessa geessanii loltoota sanniin keessaa worra hafanillee waamanii wolitti qaban.

17Isaan uffata diimaa dhiilgee itti uwwisanii qoree dhaddoo dhayanii mataa isaa irra kaayan.

18Achiin maayessa isaan, «Mootii Yihuudi'ii nageenni siif haata'u» jedha'aa harka itti kaasuu jalqaban.

19Isaan mataa isaallee ule'een dhaya'aa, itti tufa'aa, itti balda'aa afoo isaatitti jilbiiffatanii isaa sagadan.

20Haga isatti baldaniin maayii uffata diimaa san irraa mulqanii, uffata isaa deebisanii itti uwwisanii fannisu'uuf achi geessan.

21Isaan namicha biyya Qareena'aa tokko, ka Simoon jedhamu abbaa Iskindiroosiitiif Ruufoosii, maasa'aa gara qacha'aa uduu dhufu, qabaniinii fannoo Yesuusii akka baatu hunnaan taasisan.

22Isaan lafa golgootaa jedhamtutti Yesuusiin geessan; «Golgootaa» jechuun lafa «Buqee mata'aa» jechu'u.

23Jarrillee inni daadhii woyini'ii ka qumbi'iin wolitti makame akka dhuguuf kennaniif. Inni ammoo dhuguu dide.

24Achiin maayessa isa fannisan; uffata isaallee eennuun fa'a akka gayu beeku'uuf hixaa buusanii qoodaman.

25Hennaa isa fannisan ganama keessaa sa'aatii sadihi.

26Barreeffamni yakkaa ka inni ittiin himatame, «Mootii Yihuudotaa» jedha.

27Isa woliinillee shiftoota lamaa tokko mirgaan tokko bita'aan fannisan.

28Akka kanaan barreeffamni Woyyuun inni seera cabsitoota woliin laakayame jedhu sun raawwatame.

29Worri achi biraan lufanillee mataa ufii raasa'aa akka malee isa arrabsa'aa, «Hay! Ati namni mana woyyuu diiddee guyyaa sadihitti deebiftee ijaartu,

30Mee fannoo irraa bu'ii uf hambisi!»

31Akkasuma bulchoonni gadootaatii fi barsiisonni Seera Muuse'ee Yesuusitti balda'aa, «Inni worra biraa fayyiseera, uf hambisuu hin danda'u! woliin jedhan.

32Inni Kiristoosii mootii Israa'elii yoo ta'e, Fannoo irraa uf haa buusuu. Achiin maayii nullee arginee isatti amannaa!» jedha'aa, jarri lamaan Yesuusiin woliin fannifamanillee isa arrabsan.

33Sa'aatii jaharraa jalqabee haga sa'aatii sagalii ardiin martinuu hin dukkanoofte.

34Sa'aatii sagal irratti Yesuus, «Elohii, Elohii laamaa Sabaktanii?» jedhee laagaa gudda'aan iyye; akkasi jechuun, «Rabbii kiyya, Rabbii kiyya, maaf na dhiifte?» jechu'u.

35Worra achi dhaabatan keessaa gariin kana dhagayanii, « Eliyaasiin waamata'aara» jedhan.

36Isaan keessaa tokko fiigee dhufee, carqii qaccee ule'eetitti hidhee, daadhii woyini'ii dhangaggooftuu keessatti cuuphee, akka afaanitti cophu dhiyeesseef, «Eegi mee! Eeliyaas dhufee fannoo irraa akka isa buusu laallaa!» jedhe.

37Yesuus laagaa gudda'aan iyyee lubbuu ufii dabarsee kenne.

38Golgi mana woyyu'uu gubbaa irraa haga gadii bakka lamatti tarsa'e

39Ajajaan loltuu dhibbaa ka fannoo Yesuusii afoo dhaabateeru akkanatti iyyee lubbuu ufii dabarsee akka inni kenne hennaa arge, «Namni kun dhugamaan Ilma Rabbii ture» jedhe.

40Dubartoonni gariin fagoo dhaabatanii laala'aa turan. Isaan keessaa Maariyaamii Magdalaa, Maariyaamii haadha Yaaqoobii maandhichaatii fi Yoose'ee, Saloomeen faati achi jiran. Isaan hennaa inni Galiilaa jiru isa faanaa deemanii, isa tajaajilan. Dubartoonni biraallee isa woliin gara Yeruusaalemii dhufanii achi jiran.

42Ammallee hennaa dhiye jal-bultii guyyaa Sambata diqqa'aatiif guyyaa qophii waan tureef,

43Yooseef namni Armaatiya'aa beekkamaan yaa'ii Yihuudotaa tokko ija jabeennaan Philaaxoosiin bira dhaqee, reeffa Yesuusii akka isaa kennu isa kadhate. Yooseefiin kun inninuu nama dhufa jeennata Rabbii abdi'iin eeggata'aa ture.

44Philaaxoos attamitti haganatti du'e jedhee maalalfatee, inni ajajaa dhibbaa waamee, «Haga du'e turee?» jedhee gaafate.

45Philaaxoos akka Inni du'e ajajaa loltuu dhibbaa irraa hubatee, reeffa isaa Yooseefiif kenne.

46Yooseefillee qoola reeffa ittiin kafanu bitee, reeffa Yesuusii fannoo irraa buusee, qoola saniin kafanee, awwaala dhaga'aan hojjatame keessa kaaye. Afaan boollaatitti dhagaa gangalchee cufe.

47Maariyaamiin qachaa Maagidala'aatii fi Maariyaamiin haati Yoosa'aa reeffa Yesuusii eessa akka kaayan laala'aa turan.

← Chapter 14 Jump to: Chapter 16 →