bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan (Tayta Diospa Wilakuynin) 2003
/
Exodus 3
Exodus 3
Quechuan (Tayta Diospa Wilakuynin) 2003
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 4 →
1
Moisésnami suedrun Jetrupa uyshankunata y cabrankunata mitsiq. Jetruqa madianita runakunapa cüranmi karqan. Juk kutimi Moisés mitsikuq aywarqan chunyaq jirkapa. Tsayno aywarmi chayarqan Tayta Dioswan tinkuna Horeb jirkaman.
2
Tsaychömi Tayta Diospa angilnin Moisésta yuriparqan shiraka rupaykaqcho. Moisés tantiyaykunanpaqqa tsayjina rataykarpis manami shirakata ruparqantsu.
3
Tsawraqa kayno nirqan: «¡Imaraq taqay! Mä aywashaq jinanman rikamunäpaq. ¡Imanirtaq nina ratarpis shirakata mana ushantsu!»
4
Moisés rikaq aywaykaptinmi nina rupaykaqpita Tayta Dios qayakurqan kayno nir: «¡Moisés, Moisés!» Tsawraqa Moisés nirqan: «¿Imata, Tayta?»
5
Tsawraqa Tayta Dios kayno nirqan: «Ama witimuytsu. Kay ichirashqayki patsaqa sagrädumi kaykan. Tsayno kaykaptinqa lanqikita jorquy».
6
Mastapis kayno nirqan: «Unay ayluykikuna Abrahampa, Isaacpa y Jacobpa Diosninmi kaykä». Tsayno niptinmi Diosta rikayta mantsakushpan Moisés qaqlanta tsapakurqan.
7
Nirkurnami Tayta Dios kayno nirqan: «Kuyashqä runakuna Egiptucho fiyupa lakikur kawarkaykaqtami rikashqä. Tsaynöpis mayashqä capatazninkuna pasaypa nakatsiptin quejakamar manakamashqanta. Tsaynölami musyaykä amatar nakarkaykashqanta.
8
Tsaymi noqa shamushqä Egipto runakunapa makinpita jorqamunäpaq. Jorqarkamurmi pushashaq maypis täkuypaq jatunkaray partiman. Tsaychöqa lëchipis abëjapa mishkinpis yakunöraqmi atska kaykan. Tsay markakunachömi tarkaykan cananeo runakuna, heteo runakuna, amorreo runakuna, ferezeo runakuna, heveo runakuna y jebuseo runakunapis.
9
Noqa mayashqämi Israel runakuna manakamashqanta. Tsaynöpis rikashqämi paykunata Egipto runakuna fiyupa nakaykätsishqanta.
10
Tsaymi Faraón kaqman kanan kachashayki kuyashqä Israel runakunata jorqamunaykipaq».
11
Tsayno niptinmi Tayta Diosta Moisés kayno nirqan: «Noqa manami valurätsu Faraónpa nawpanman aywayta, Tayta. Tsaynöpis manami valurätsu Israel runakunata Egiptupita jorqamuyta».
12
Tsawraqa Tayta Dios kayno nirqan: «Noqami qamwan kaykäshaq. Egiptupita Israel runakunata jorqarkamurmi kay jirkaman shapäkamunki noqata adoramänaykipaq. Tsaymi qamwan kaykashqäta musyankipaq».
13
Tsayno niptinmi Moisés kayno nirqan: «Egiptuman chayaykur Israel mayïkunata kaynömi nishaq: «Unay ayluntsikuna yärakushqan Tayta Diosmi qamkunaman kachamashqa». Tsayno wilaptï paykuna kayno nirmi tapumanqa: «¿Imataq paypa jutin?» Tsayno tapumaptin ¿imatataq nishaq?»
14
Tsawraqa Tayta Dios kayno nirqan: «Noqaqa: « Noqami Kä ». Israel runakunata kayno ninki: « Noqami Kä niqmi qamkunaman kachamashqa» ».
15
Tsaynölami Moisésta Tayta Dios kayno nirqan: «Israel runakunata kaynöpis ninki: « Yahwehmi kachamashqa. Payqa unay ayluntsi Abrahampa, Isaacpa y Jacobpa Diosninmi kaykan» ». Mastami Tayta Dios kayno nirqan: «Noqapa jutïqa Yahwehmi imayyaqpis kanqa».
16
«Egiptuman chayaykushpayki Israel mayor runakunata shuntaykur kayno ninki: «Unay ayluntsi Abraham, Isaac y Jacob yärakushqan Tayta Diosmi yuriparkamar kayno nimashqa: «Noqa rikaykämi Israel runakunata Egipto runakuna fiyupa nakaykätsishqanta».
17
« «Tsaynöpis nimashqa nakaykashqaykipita jorqushushpayki cananeo runakuna, heteo runakuna, amorreo runakuna, ferezeo runakuna, heveo runakuna y jebuseo runakuna tashqan nacionman pushashunaykipaq kashqanta. Tsaychöqa lëchipis abëjapa mishkinpis yakunöraqmi atska kaykan».
18
«Tsayno niptikiqa Israel mayor runakuna cäsukushunkipaqmi. Tsawraqa paykunawanna aywanki Egipto nacionpa mandaqnin reywan parlanaykipaq. Chayaykurna kayno ninki: «Hebreo runakunapa Tayta Diosninmi noqakunata yuripämashqa. Tsaymi chunyaq jirkaman kimsa junaq aywayta munarkaykä sacrificiuta rupatsir payta adorapäkunäpaq».
19
«Tsayno niptikipis Egipto nacionpa mandaqnin rey manami kachapäshunkitsu yarqupäkamunaykipaq. Fiyupa nakatsiptïraqmi kachapäshunkipaq.
20
Tsaymi Egipto runakunataqa munayniyuq kashqäta musyatsishaq mantsariypaq castïgukunawan. Tsaynöparaqmi Faraón kachapäshunki yarqupäkamunaykipaq.
21
«Yarqamuptikimi Egipto runakuna imatapis qarashunaykipaq shakyätsishaq. Tsaynöpami jinaylaqa mana yarqamunkipaqtsu.
22
Tsaymi warmikunapis vecïnankunata y vecïnancho taq warmi mayinkunata manakärinqa imatapis qellaypita kaqta o qoripita kaqta qarananpaq. Tsaynölami röpakunata manakärinqa wawankunata jatipänanpaq. Tsaynöpami Egipto runakunapa imaykantapis apakärinkipaq».
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 4 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40