Ezra 1

Quechuan QXO (Biblia en Quechua del sur de Conchucos)

Jump to: Chapter 2 →

1Persia nacionchö Ciro rey kayman yaykunqan watam Ciruta Tayta Dios yarpayta qorqan Israel runakunata nacionninkunaman kutitsinanpä. Tsaynö kutitsirmi profëta Jeremías willakunqanta cumplirqan. Tsaymi rey Ciruqa pregunaypa y cartakuypa entëru mandanqan nacionman willakatsir nirqan:

2«Noqa Ciro, Persia nacionpa mandaqnin rey karmi nï: Ciëluchö kaykaq Tayta Diosmi llapan nacionkunata podernïman churamushqa. Paymi nimashqa Judáchö kaykaq Jerusalénchö templunta shäritsinäpä.

3Tsaymi Tayta Diosman yärakuq runakuna mayqanpis aywakuyta munaptin ordenä Jerusalénman chaykur Tayta Diospa templunta shäritsiyänanpä. Payqa Israel runakunata kuyaq Dios karmi Jerusalénchö täkun. Aywakuyaptin mana dëjaypa yanapaykullätsun.

4Taykäyanqanpita Jerusalénman aywaqkunata quëdaq kaq Israel mayinkuna yanapayätsun qellaywan, qoriwan, ashmakunawan y ofrendakunawanpis. Tsaynölla yanapayätsun Tayta Diospa templunta Jerusalénchö shäritsiyänanpä».

5Rey Ciro ninqannö templuta shäritsiyänanpämi wakin Israel runakunata Tayta Dios valuratsirqan. Tsaymi Benjamín trïbupa y Judá trïbupa mandaqninkuna, sacerdötikuna y levitakunapis Jerusalénman aywayarqan.

6Aywayaptinmi llapan vecïnunkuna yanapayarqan qellaywan, qoriwan, mikuykunawan, ashmakunawan, imapis chanin kuyayllapä kaqkunawan y ofrendakunawanpis.

7Tsaynöllam Tayta Diospa templunpita Nabucodonosor apanqan manëjukunata rey Ciro entregarqan Jerusalénman kutitsiyänanpä. Tsay manëjukunaqa Nabucodonosor adoranqan diosninkunapa templunchömi churararqan.

8Jerusalénman kutitsiyänanpämi tesorëru Mitrídatesta rey Ciro entregarqan. Paymi Sesbasarta yupapurqan. Sesbasarqa Judáman aywaqkunapa mandaqninmi karqan.

9Yupapur entregaptinmi manëjukuna kayarqan: qoripita kimsa chunka (30) tazonkuna, qellaypita waranqa (1,000) tazonkuna, ishkay chunka isqun (29) cutsillukuna,

10qoripita kimsa chunka (30) väsukuna, qellaypita chusku pachak chunka (410) väsukuna y waranqa (1,000) imayka niraq manëjukuna.

11Qoripita y qellaypita chaskiyanqan llapan manëjukunam pitsqa waranqa chusku pachak (5,400) karqan. Llapan tsaykunatam Israel mayinkunawan aywar Babiloniapita Jerusalénman Sesbasar kutitsirqan.

Jump to: Chapter 2 →