Ezra 9

Quechuan QXO (Biblia en Quechua del sur de Conchucos)

← Chapter 8 Jump to: Chapter 10 →

1Tsaypitanam Israel runakunapa mandaqninkuna shamuykur niyämarqan: «Kaychö täraq jäpa runakunapa costumbrinkuna mana alli kanqanta musyaykarmi sacerdötikuna, levitakuna y wakin Israel mayintsikkunapis tsay jäpa runakunawan juntakashqa kaykäyan. Tsay jäpa runakunam kaykäyan cananeo runakuna, heteo runakuna, ferezeo runakuna, jebuseo runakuna, amonita runakuna, moabita runakuna, Egipto runakuna y amorreo runakuna.

2Paykunawan juntakarmi kikinkunapis y tsurinkunapis paykunapa warmi tsurinkunawan tätsinakuykäyan. Tayta Dios kuyanqan santu runakuna kaykarmi jäpa runakunawan takukashqa kaykäyan. Tsaynö jutsata rurayänanpäqa autoridäkuna y wakin mandaq mayïkunam puntata jutsata rurayashqa».

3Tsaynö willayämaptinmi pasaypa llakikur röpätapis rachirqä. Aqtsätapis shaprätapis llukir usharqä.

4Babiloniapita Jerusalénman puntata shamuq runakuna tsaynö jutsata rurayanqanpitam Diosta cäsuq Israel mayïkuna noqawan qorikäyarqan. Tardi kaq sacrificiuta altarchö rupatsiyanqan hörayaqmi llapäkuna pasaypa llakishqa kayarqä.

5Tsay höra llakikuynï päsaskiptinmi röpäpis rachishqalla qonquriykur Tayta Diosta mañakur nirqä:

6«Tayta Diosllä, pasaypa penqakushqam kaykä. Manam musyätsu imata ruranäpä kanqantapis y imanö mañakamunäpä kanqantapis. Noqakunaqa pasaypam jutsata rurayarqü. Jutsata rurayanqäkunaqa yupaytapis mana puëdiypämi kaykan.

7Unaypitam jutsata rurallar kawayarqü. Jutsata rurayanqänö unay castäkunapis jutsata rurayaptinmi mandaqnin reykunata y sacerdötikunata pasaypa castigarqayki. Tsaymi juklä nacionpa mandaqnin reykuna vincir poderninchö tsarararqan. Tsay runakunam unay castäkunata pasaypa maqayarqan y markankunapitapis karuman apakuyarqan. Imaykankunatapis qechuskirmi manakaqman churayarqan. Paykunanöllam kananyaqpis ñakaykäyä.

8«Tayta Diosllä, kuyapäyämaptikim wallkaqllapis kaychö libri kaykäyä. Tsaymi kay akranqayki partichö wayïkunatapis rurayarqü. Tsaynöpam juklä nación runakunapa poderninchö kayanqäpita salvayämarnin alli kawayta qarayämarqayki.

9Jäpa runakunapa poderninchö kayaptïpis manam jaqirayämarqaykitsu. Kuyapäyämaptikim Persia nacionpa mandaqnin reykunapis kuyapäyämashqa. Qammi kallpata qarayämarquyki raqällana kaykaq templuykita allitsayänäpä. Judáchöpis y Jerusalénchöpis qammi chikimaqnïkunapita tsapäyämarquyki.

10«Tayta Diosllä, pasaypa jutsayuq karmi ima niytapis puëdiyätsu. Mandamientuykikunatapis shumaqllaqa manam cumpliyarqütsu.

11Tsay mandamientuykikunataqa sirvishuqniki profëtakunawan willakatsirmi niyämarqayki: «Yaykuyänaykipä kaq nacionkunachö täraq runakunaqa maytsaychöpis jutsata rurayaptinmi nacionninkuna impüru kaykan.

12Tsaynö kaykaptinqa tsurikikunata paykunapa tsurinkunawan ama casaratsiyaytsu ni imachöpis ama yanapayankitsu. Kay ninqäta cäsurmi chakraykikunachö wayuqkunata mikur kushishqa kawayanki. Tsaynöllam chakraykikuna tsurikikunapä imayyaqpis kanqa».

13«Tsay ninqaykita mana cäsukuypa jutsata rurayaptinmi unay castäkunata pasaypa castigarqayki. Tsaynö castigarpis manam jutsata rurayanqanmannötsu castigarqayki, sinöqa wallkaqllapis kayman shayämunäpämi yanapayämarqayki.

14Tsaynö kuyaykäyämaptikipis jutsasapa runakunapa warmi tsurinkunawan churakarmi mandamientuykikunata yapay manakaqman churayarqü. Tsaynö rurayanqätaqa manam imanöpapis tantiyayta puëdïtsu. Tsaynö ruraykäyaptïqa rabyar rasunpam llapäkunata ushakätsiyämankiman.

15«Tayta Dios, kuyapämarmi yanapayämarquyki wallkaqllapis kaychö kayänäpä. Tsaynö kaptinpis jutsayuqmi kayä. Manam puntaykichö kaytapis merëciyätsu».

← Chapter 8 Jump to: Chapter 10 →