Galatians 1

Quechuan QXO (Biblia en Quechua del sur de Conchucos)

Jump to: Chapter 2 →

1Galacia provinciachö kaykaq wawqikuna y panikuna: Noqa Pablum kay cartata qamkunaman cartakamü. Apóstol kanäpä manam runakunatsu churayämashqa, sinöqa Jesucristo y payta kawatsimuq Tayta Diosmi. Kaychö kaykaq wawqikuna y panikunam saludayämushunki.

3Papänintsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.

4Papänintsik Tayta Dios munanqannömi kay patsachö jutsapita salvamänantsikpä Jesucristo wanurqan.

5Tayta Dios imayyaqpis alabashqa kaykullätsun. Amén.

6Musyayanqaykinöpis Jesucristupa kuyakuyninwanmi Tayta Dios qayayäshurqayki. Tsayta musyaykarqa ¿imanirtä llutan yachatsikuyman criyir pöcu tiempullata Tayta Diospita witikuyarquyki? ¡Tsaytaqa manam imanöpa tantiyaytapis puëdïtsu!

7Jesucristupa willakuyninpita mas juk willakuyqa manam salvakunantsikpä kantsu. Tsaynö kaptinpis wakin runakunam Jesucristupa willakuyninman yaparkur llutanta yachaykätsiyäshunki.

8Qamkunata yachatsinqäta manakaqman churar pipis llutanta yachatsiptinqa infiernuman Tayta Dios qaykutsun. Noqakunatapis llutanta yachatsiyaptïqa infiernuman qaykayämätsun. Ciëlupita shamuq angeltapis llutanta yachatsiptinqa infiernuman qaykutsun.

9Yapaymi nï: Pipis Jesucristupa willakuynin jananman llutan yachatsikuyta yapaq kaqtaqa infiernuman qaykutsun.

10Tsaynö nir ¿runakuna alabayämänantatsurä ashï? ¿Runakunapita alli rikashqa kaytatsurä munä? Noqa manam runakuna alabayämänanpätsu yachatsï, sinöqa Tayta Dios: «Allitam rurarquyki» nimänanpämi. Runakuna alabayämänan raykur yachatsirqa manam Jesucristupa sirviqnintsu käman.

11Wawqikuna y panikuna, shumaq tantiyakuyay. Alli willakuyta willakunqäqa manam runakunapa yarpaynintsu.

12Tsay willakuytaqa manam runatsu yachatsimashqa, sinöqa kikin Jesucristum revelacionchö tantiyatsimashqa.

13Qamkuna musyayankim ñöpata Israel runakunapa costumbrinkunata cumplir imanö kanqätapis. Tsay witsanmi Jesucristuman criyikuqkunapa contran shärir qatikacharqä. Paykunatam llapanta ushakätsiyta munarqä.

14Wakin Israel mayïkunapitapis masmi costumbrïkunata välitsirqä. Llapan yuriy mayïkunapitapis masrämi Moisés qellqanqankunata cumplirqä.

15Peru imanö kaptinpis manarä yuriptïmi Tayta Dios kuyapämar payta sirvinäpä akramashqa.

16Tsaypitanam Jesucristuman criyikunäpä shumaq tantiyatsimar mana Israel runakunata willakuyninta willanäpä mandamashqa. Tsaynö mandamaptinmi willakuyninta tantiyatsimänanpä pitapis tapukurqänatsu.

17Manam noqapita mas punta kaq apostolkunawan parlanäpäpis Jerusalénman aywarqätsu, sinöqa Arabia partipam aywarqä. Tsaypitanam Damasco markaman yapay kutirqä.

18Tsaypita kimsa watatarämi Pedruwan parlaq Jerusalénman aywarqä. Tsaychömi chunka pitsqa junaq paywan juntu kayarqä.

19Tsaychömi reqirqä Señor Jesucristupa wawqin Santiaguta. Peru wakin apostolkunataqa manam reqirqätsu.

20Tayta Dios musyanmi mana llullakunqäta.

21Tsaypitanam Siria y Cilicia provinciakunapa aywarqä.

22Judea provinciachö wawqikuna y panikunaqa manam mayqanpis reqiyämarqantsu.

23Paykunash wiyayänä: «Qatikachämaqnintsik runam kananqa Jesucristupa willakuyninta willakurna puriykan».

24Tsaynö niqta wiyarshi Tayta Diosta alabayänä.

Jump to: Chapter 2 →