Galatians 5

Quechuan QXO (Biblia en Quechua del sur de Conchucos)

← Chapter 4 Jump to: Chapter 6 →

1Jesucristo libramashqam Moisés qellqanqan leykunapa poderninchö kanqantsikpita librina kaykantsik. Tsaynö kaykaptinqa tsay leykunata cumpliyänaykipä obligayäshuptikipis ama cäsuyaytsu.

2Noqam nï: Señalakuyaptikirä Tayta Dios salvayäshunqaykita yarpäyaptikiqa Jesucristuman criyikuyanqaykipis wallällam kanqa.

3Yapaymi nï: Pipis señalakuq kaqqa Moisés qellqanqan leykunata llapantarämi cumplinman.

4Tsay leykunata cäsur pipis salvakuyta munarmi Jesucristupitapis y Tayta Diospa kuyakuyninpitapis witikuyashqa.

5Peru noqantsikmi sïqa Espíritu Santu tantiyatsimashqa musyantsik Jesucristuman yärakur salvakunapä kanqanta.

6Jesucristuman criyikushqaqa manam señalashqa kanqantsiktsu ni mana señalashqa kanqantsiktsu välin, sinöqa payman yärakur kuyanakur kawanqantsikmi.

7Qamkunaqa Jesucristuman criyikur allim kayarqayki. ¿Pitä niyäshurquyki rasunpa kaq willakuyta mana cäsuyänaykipä?

8Paykuna yachatsiyanqanqa manam qayamaqnintsik Tayta Diospitatsu.

9Tsay llutan yachatsikuyqa wallka levadüra mäsata jakatsinqannömi kaykan.

10Llutan yachatsikuqkunata manana chaskiyänaykipämi Tayta Diosta mañakü. Tsay runakunataqa pï kayaptinpis Tayta Diosmi juzganqa.

11Wawqikuna y panikuna, señalakuyänanpä yachatsiptïqa manam pipis qatikachämanmantsu ni Jesucristo noqantsik raykur cruzchö wanunqanta willakunqäpita chikimanmantsu.

12«Señalakurrämi salvakuyanki» nir yachatsiyäshuqnikikunaqa penqayninta kuchupita roquskiyätsun.

13Wawqikuna y panikuna, librina kayänaykipämi Tayta Dios qayayäshurquyki. Librina karpis jutsata ama rurayaytsu, sinöqa jukniki juknikipis kuyanakur yanapanakuyay.

14Diospa leyninchömi nin: «Kikiki kuyakunqaykinö runa mayikita kuyanki». Tsay ninqanta cumplirqa llapan leyninkunatam cumpliykäyanki.

15Peru tsaynö kaykaptinqa cuidädutä chikinakuyankiman. Chikinakurqa qallayätsinakurmi qarqunakuyanki.

16Tsaymi nï: Espíritu Santu tantiyatsiyäshunqaykinölla kawayay. Tsaynö kawarqa manam shonquykikuna munanqannö jutsata rurayankitsu.

17Llutan yarpaykunaqa Espíritu Santupa contranmi y Espíritu Santunam llutan ruraykunapa contran. Tsaymi ishkan contranakuyaptin allita rurayta munarpis puëdiyankitsu.

18Espíritu Santu tantiyatsiyäshunqaykita cäsurqa manam leykunapa poderninchönatsu kayanki.

19Llutan yarpaykunata cäsuqkunaqa [majankuna kaykaptinmi jukwan jukwan kakuyan,] fornicación jutsata rurayan, melanaypä kaqkunata rurayan, achachäpakushqa kar penqakuypä jutsata rurayan,

20ïdulukunata adorayan, runa mayinta brüjutsiyan, runa mayinta chikiyan, rimanakuyan, cëlanakuyan, imallapitapis rabyakuyan, contranakuyan, qarqunakuyan, qallayätsinakuyan,

21envidiösu kayan, [runa mayinta wanutsiyan,] upyallachö kakuyan, machaskir llutankunata rurayan y tsaynöllam mastapis rurayan. Ñöpata ninqänöllam kananpis nï: Tsaynö kawaqkunaqa Tayta Diospa mandakuyninman manam chäyanqatsu.

22Peru Espíritu Santupa poderninchö kawarmi sïqa kuyanakuntsik, kushikuntsik, alli kawantsik, pacienciakuntsik, qollmi shonqu kantsik, yanapakuq kantsik, awninqantsikta cumplintsik,

23humildi kantsik y allita ruranantsikpä tantiyakuntsik. Tsaynö kawarqa manam ima leytapis manakaqman churantsiktsu.

24Jesucristupana karmi unay kawaynintsikta cruzchö wanutsishqana kaykantsik. Tsaymi jutsa ruraykuna yarpaynintsikman shamuptinpis cäsuntsiknatsu.

25Espíritu Santupa poderninchö kaykarqa pay tantiyatsimanqantsiknö kawashun.

26Tsaynö kawaykarqa pitapis rabyanätsir ama runa tukushuntsu ni envidiösu kashuntsu.

← Chapter 4 Jump to: Chapter 6 →