Mark 1

Quechuan QXO (Biblia en Quechua del sur de Conchucos)

Jump to: Chapter 2 →

1Tayta Diospa Tsurin Jesucristupa alli willakuyninta willakur qallananpämi

2profëta Isaías qellqarqan. Tsay qellqanqanchömi nin: «Nänita pitsaqnö runakuna alistakuyänanpämi willakuqnïta puntaykita mandashä.

3Paymi desiertuchö qayaraypa willakur ninqa: «Tayta Dios shamunanpä nänita allitsayay. Wiksu nänikunata derechayay».

4Isaías qellqanqannöllam desiertuchö Juan bautizar runakunata nirqan: «Tayta Dios perdonayäshunaykipä jutsaykikunata dëjar bautizakuyay».

5Juan willakunqanta wiyayänanpämi Judea provinciapita y Jerusalénpita llapan runakuna aywayarqan. Tayta Diosta perdonta mañakuyaptinmi Jordán mayuchö tsay runakunata Juan bautizarqan.

6Juanpa röpanqa camëllupa aqtsanpita awashqam karqan. Wachukunpis camëllupa qaranpita rurashqam karqan. Chukllushkunata y abëjapa mishkintam mikurqan.

7Willakurmi nirqan: «Qepäta shamuq kaqmi noqapita mas poderyuq kaykan. Paypa llanqi watunta paskanalläpäpis manam välïtsu.

8Noqaqa yakullawanmi bautizä. Peru paymi sïqa Espíritu Santuwan bautizayäshunki».

9Tsay witsanmi Galileachö kaykaq Nazaretpita Juan bautizaykanqan kaqman Jesús aywarqan. Chaykuptinmi paytapis Jordán mayuchö Juan bautizarqan.

10Yakupita sharkurmi Jesús rikarqan ciëlu kichakaskiptin Espíritu Santu imayka palumanö payman uraykämuqta.

11Tsay höram ciëlupita Tayta Dios nimurqan: «Qammi kuyay tsurï kanki. Qampitam kushikü».

12Tsaypitanam Jesústa Espíritu Santu desiertuman pusharqan.

13Chusku chunka (40) junaq munti ashmakuna kayanqanchö kaykaptinmi Satanás tentarqan. Angelkunam Jesústa yanapayarqan.

14Juan carcelchö wichqaraykaptinnam Galileaman Jesús kutirqan. Tsaychömi Tayta Diospa mandakuyninpä alli willakuyta willakur

15nirqan: «¡Tayta Diosmi promitinqankunata cumplishqana! ¡Tayta Diospa mandakuynin chämushqanam! ¡Jutsaykikunata dëjaskir Tayta Diospa alli willakuyninman criyikuyay!»

16Galilea qocha kuchunpa aywaykanqanchömi Simónta y wawqin Andrésta Jesús rikarqan. Paykunaqa pescädu tsariq karmi mällanta yakuman jitaykäyarqan.

17Paykunatam Jesús nirqan: «Qatiyämay. Noqam yachatsishayki runakunata pescayänaykipä».

18Tsaynö niptinmi mällankunata dëjaskir Jesúswan aywayarqan.

19Tsaypita mas washata aywaykarmi Zebedeupa tsurin Santiaguta y wawqin Juanta rikarqan. Paykunam büquinchö mällankunata allitsaykäyarqan.

20Paykunatapis qayaptinmi jinan höra aywayarqan papänin Zebedeuta y peonninkunata büquichö jaqiskir.

21Tsaypitanam Capernaúm markaman discïpulunkunawan Jesús aywayarqan. Jamay junaqchö sinagögaman yaykurmi yachatsikur qallaykurqan.

22Yachatsiptinmi runakuna pasaypa espantakuyarqan. Manam ley yachatsikuq runakunanötsu yachatsirqan, sinöqa mas poderyuq karmi shumaq yachatsirqan.

23Tsay sinagögachömi supay löcuyätsinqan runa kaykarqan. Paymi qayarar

24nirqan: «[¡Waauuu!] ¡Nazaretpita Jesús! ¿Imatatä noqakunawan munanki? ¿Ushakätsiyämänaykipäku shamurquyki? ¡Musyämi Tayta Dios mandamunqan santu runa kanqaykita!»

25Tsaymi supayta ollqutupar Jesús nirqan: «¡Upälla kay runapita yarquy!»

26Tsaynö niptinmi tsay runata tsapiskir supay pasaypa qayarar aywakurqan.

27Tsayta rikaykurmi juknin jukninpis mantsakashqa niyarqan: «¡Imatanatä rikantsik! ¡Poderninwan niptinmi supaykunapis cäsur aywayan! ¡Pay yachatsinqannöqa manam pipis yachatsintsu!»

28Supayta qarqunqanta musyaykurmi entëru Galileachö Jesús poderyuq kanqanta parlayaq.

29Sinagögapita Jesús yarqurnam Santiaguta y Juanta pusharkur Simónpa y Andréspa wayinman aywayarqan.

30Chaykuyaptinmi Simónpa suegran fiebriwan antsa ujuraykanqanta willayarqan.

31Tsaymi qeshyaykanqan kaqman Jesús yaykuskir makipita shäritsiptin jinan höra alliskirqan. Alliskirnam paykunata mikuyta qararqan.

32Patsa tsakaykaptinnam llapan qeshyaqkunata y supaykuna ñakatsinqan runakunatapis Jesúsman apayämurqan.

33Tsay markachö llapan runakunam Jesús kaykanqan wayi punkuman qorikäyarqan.

34Tsaychömi imaykaläya qeshyawan qeshyaqkunata Jesús allïtsirqan. Tsaynöllam atskaq runakunapita supaykunatapis qarqurqan. Pï kanqantapis supaykuna musyayaptinmi mana parlayänanpä Jesús ollqutuparqan.

35Warayninnam Tayta Diosta mañakunanpä tsaka tsakalla tsunyaqman Jesús aywakurqan.

36Tsaymi Jesústa watukaskir Simón y paywan kaykaqkuna ashir aywayarqan.

37Tariskirnam niyarqan: «Taytay, llapanmi ashiyäshunki».

38Jesúsnam nirqan: «Tayta Diospa willakuyninta willakuq wakin markakunamanpis aywashun. Tsaypämi shamurqü».

39Tsaymi entëru Galileapa Jesús purirqan sinagögakunachö willakur y supaykunata runakunapita qarqur.

40Juk kutichömi leprawan qeshyaq runa Jesúspa puntanman qonqurikuykur nirqan: «Taytay, voluntäniki kaptinqa alliykatsillämay».

41Tsaynö rugakuptinmi kuyaparnin yataykur Jesús nirqan: «Allishqa kanaykitam munä».

42Tsaynö niptinmi jinan höra leprawan qeshyaykanqanpita alliskirqan.

43Aywakunanpä niskirmi Jesús chunkapis nirqan:

44«Allïtsinqäta ama pitapis willankitsu, sinöqa allinqaykita rikashunaykipä sacerdötiman ayway. Tsaypita Moisés qellqanqanchö ninqannölla purificakunaykipä ofrendaykita templuman apay. Tsaynöpam allinqaykita musyayanqa».

45Tsaynö nikaptinpis tsay runaqa Jesús allïtsinqantam pïmayta willakurqan. Tsaymi markamanpis Jesús yaykurqantsu, sinöqa tsunyaqllachömi quëdakurqan. Tsaymanpis maytsaypitam runakuna aywayaq.

Jump to: Chapter 2 →

Recommended Reading

Commentary Mark Commentaries → Devotional Mark Devotional Guide → Get This Bible Quechuan QXO (Biblia en Quechua del sur de Conchucos) Study Bible →