bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Mark 6
Mark 6
Quechuan QXO (Biblia en Quechua del sur de Conchucos)
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 7 →
1
Tsaypitanam Nazaret markanman discïpulunkunawan Jesús aywayarqan.
2
Jamay junaq kaptinmi sinagögachö yachatsikuptin runakuna mantsakashqa niyarqan: «Tsaynö yachatsinanpä ¿maychörä yachakamushqa? Tsaynölla ¿imanöparä milagrukunata ruran?
3
¿Manaku payqa carpintëru? Mamanpis ¿manaku María? Wawqinkunapis ¿manaku Santiago, José, Judas y Simón? Paninkunapis ¿manaku kay markachö täyan?» Tsaynö nirmi Jesús yachatsinqankunata criyiyarqantsu.
4
Jesúsnam nirqan: «Wakin markakunachö profëtata chaskiyaptinpis castankuna y marka mayinkunaqa manam chaskiyantsu».
5
Tsaynö mana chaskiyaptinmi ima milagrutapis tsay markachö rurarqantsu, sinöqa juk ishkay qeshyaqkunallatam yataykur allïtsirqan.
6
Marka mayinkuna payman mana criyiyaptinmi Jesús pasaypa llakikurqan. Tsaypitanam markakunapapis jallqakunapapis runakunata yachatsiraykar Jesús purirqan.
7
Tsaynö purirmi chunka ishkay discïpulunkunata qayaykur poderninta qararqan runakunapita supaykunata qarquyänanpä. Tsaypitam alli willakuyninta willakuyänanpä ishkaq ishkaqta mandarqan.
8
Tsaymi nirqan: «Tukrullata apayanki. Qepita, millkapata ni qellaytapis ama apayankitsu.
9
Jatiräyanqayki llanqillawan aywayanki. Trocakuyänaykipä röpatapis ama apayankitsu.
10
«Pipa wayinman patsakurpis juk markaman päsayanqaykiyaq tsayllachö quëdakuyanki.
11
Willakuyanqaykita mana chaskiyäshuptikiqa chakikikunachö polvuta tapsikuskir aywakuyanki. Tsaynö rurayanki Tayta Dios paykunata castigananpä kaqta musyayänanpä. [Rasunpam nï: Juiciu final junaqchöqa Sodomachö y Gomorrachö täraq runakunata castiganqanpitapis mas peormi tsay runakunata Tayta Dios castiganqa]».
12
Tsaynö niptinmi discïpulunkuna aywar willakuyarqan jutsankunata dëjar Tayta Dios munanqannö kawayänanpä.
13
Tsaynöllam supaykunatapis runakunapita qarquyarqan. Qeshyaykaqkunatapis aceitita wiñarmi atskaqta allïtsiyarqan.
14
Jesús ruranqankunata maytsaychö parlayaptinmi rey Herodespis musyarqan. Wakin runakunam Jesúspä niyarqan: «Tsay runaqa Bautizaq Juanmi kawamushqa kanqa. Tsaymi milagrukunata rurananpä poderyuq kaykan».
15
Wakinmi profëta Elías kanqanta niyarqan. Mas wakinnam niyarqan unay profëtakunanö profëta kanqanta.
16
Tsaynö parlayanqanta wiyarmi rey Herodes nirqan: «Umanta roqutsinqä Juanmi kawamushqa kanqa».
17
Ñöpatam Juanta Herodes prësu tsariskatsir cadënawan watarkur carcelman wichqatsishqa karqan. Tsaynö rurarqan Herodías jutiyuq warmi mañakuptinmi. Herodíasqa Herodespa wawqin Felipipa warminmi karqan. Herodes warmintanö Herodíasta katsiptinmi
18
Juan nirqan: «Wawqikipa warminwan kakurmi jutsata ruraykanki».
19
Tsaynö ninqanpitam Herodías chikir Juanta wanutsiyta munarqan. Peru wanutsiyta munarpis Juanta Herodes respitaptinmi puëdirqantsu.
20
Juanta tsaynö respitarqan Dios munanqannö kawar santu runa kanqanta musyarmi. Diospa willakuyninta Juan willakuptinmi kushishqa wiyarpis ima ruraytapis puëdirqantsu.
21
Tsaypita Herodespa santunchö fiestata rurarmi qayatsirqan autoridäkunata, soldädukunapa mas mandaqninkunata y Galileachö täraq rïcu runakunatapis.
22
Tsaychö kaykäyaptinmi Herodíaspa jipash wamran yaykuskir tushurqan. Tsayta rikarmi Herodes y qayatsinqan runakunapis pasaypa kushikuyarqan. Tsaymi jipashta rey Herodes nirqan: «Imata munanqaykitapis mañamay. Nimanqaykitam qarashayki».
23
Tsaypitanam jurar nirqan: «Mandanqayki nacionta pullanta rakipamay» nimaptikipis rakipäshaykim».
24
Tsaymi maman kaqman tsay jipash aywaykur tapurqan: «Mamay, ¿imatatä mañaküman?» Mamannam nirqan: «Bautizaq Juanpa umanta qarashunaykipä niy».
25
Maman tsaynö yätsiptinmi rey kaqman kutiykur nirqan: «Noqa munä kanan höra Bautizaq Juanpa umanta plätuchö qaramänaykitam».
26
Tsayta mañaptinmi rey Herodes pasaypa llakikurqan. Peru qayatsinqankunapa puntanchö jurashqa karmi ñëgayta puëdirqantsu.
27
Tsaymi jinan höra wardiata mandarqan Juanpa umanta apamunanpä. Ninqannöllam carcelman aywar Juanpa umanta roquskir
28
jipashta plätuwan entregarqan. Chaskiskirnam jipashqa mamanta entregarqan.
29
Tsaynö rurayanqanta musyaskirmi Juanpa discïpulunkuna ayanta qoriskir pampayarqan.
30
Willakuyanqanpita apostolkuna kutiykurmi llapan rurayanqanta y yachatsiyanqanta Jesústa willayarqan.
31
Tsaychö atskaq runakuna kayaptinmi mikuyänanpäpis tiempun karqantsu. Tsaymi apostolninkunata Jesús nirqan: «Aku aywashun tsunyaqman tsaychö jamapänantsikpä».
32
Tsaynö nirmi büquiman yarkurkur apostolninkunawan tsunyaqman aywayarqan.
33
Maypa aywayanqantapis runakuna rikarmi markakunapita juklla aywar Jesúspita mas puntata chäyarqan.
34
Büquipita yarpuskirnam atskaq runakuna shuyaykäyaqta Jesús tarirqan. Mitsiqniynaq üshakunanö kaykaqta rikarmi kuyaparnin imaykata yachatsirqan.
35
Tardiyaptinnam discïpulunkuna Jesúsman witiykur niyarqan: «Tsunyaqchömi kaykantsik. Patsapis tardiyaykannam.
36
Runakunata niy markakunapa aywar mikuyninkuna rantiyänanpä. [Kaychöqa manam mikuyänanpä imapis kantsu]».
37
Jesúsnam nirqan: «Qamkuna mikuyninkuna qarayay». Tsaynö niptinmi niyarqan: «¿Noqakuna tanta rantiq aywayänätaku munanki? Kaytsikaqpäqa ishkay pachak (200) jornalpa chaninrächi aypanman».
38
Jesúsnam nirqan: «¿Ayka tantatä kapuyäshunki? Mä rikayämuy». Rikaskamurnam niyarqan: «Pitsqa tantawan ishkay pescädullam kaykan».
39
Tsaypitam discïpulunkunata Jesús nirqan runakunata grüpu grüpu pampaman jamatsiyänanpä.
40
Tsaynö niptinmi pachakpa (100) pitsqa chunkapa (50) jamatsiyarqan.
41
Tsaypitanam pitsqa tantata y ishkay pescäduta aptarkur ciëluman ñukirkur Tayta Diosta Jesús agradëcikurqan. Tantata pakiskirnam discïpulunkunata makyarqan runakunata qarayänanpä. Tsaynöllam llapan mikuyänanpä ishkay pescädutapis makyarqan.
42
Pacha junta mikuskiyaptinnam
43
sobraq tantakunata y pescädukunata chunka ishkay canasta juntata qoriyarqan.
44
Tsaychö mikuqkunaqa pitsqa waranqa (5,000) runakunam kayarqan.
45
Tsaypitanam discïpulunkunata Jesús nirqan büquiman yarkurkur Betsaida markaman puntayänanpä. Aywaskiyaptinnam tsaychö kaq runakunata despidiskir
46
Tayta Diosta mañakunanpä jirkaman witsarqan.
47
Patsa tsakaskiptinnam discïpulunkuna büquiwan karutana aywaykäyarqan. Tsayyaqmi jirkallachörä Jesús kikillan kaykarqan.
48
Tsaypitam rikarqan vientu kutitsimuptin büquiwan discïpulunkuna pasaypa ñakaykaqta. Patsa waraykaptinnam discïpulunkuna kaqman yaku jananpa Jesús aywaykarqan. Büqui ñöpanpa päsaykaqtanö
49
rikaykurmi discïpulunkuna alma kanqanta yarpar pasaypa mantsakar qayaräyarqan.
50
Tsaymi Jesús nirqan: «¡Noqam kä! ¡Ama mantsayämaytsu!»
51
Tsaynö nir büquiman yarkuskiptinmi vientupis juklla päraskirqan. Tsaykunata rikarmi discïpulunkuna pasaypa mantsakashqa yarpachakuyarqan.
52
Atskaq runakunata qarananpä milagruta ruranqanta rikarpis shonqunkuna chukruyashqa kaptinmi tantiyakuyarqantsu Jesús poderyuq kanqanta.
53
Qochata päsaskirnam Genesaret pampaman chaykur büquita watayarqan.
54
Büquipita yarpuskiptinnam runakuna Jesústa reqiskir
55
maytsaypapis cörrilla aywar Jesús tsaychö kaykanqanta willakuyarqan. Tsayta musyaskirmi maytsaypitapis qeshyaqkunata kirmawan apayämurqan.
56
Tsaypita markakunapa y jallqakunapapis Jesús puriptinmi nänikunamanpis qeshyaqkunata apayarqan. Tsaypa päsaptinmi rugakuyarqan röpanpa kuchullantapis qeshyaqkuna yataykunanpä. Tsaychömi llapanpis yataq kaqkunaqa alliskiyarqan.
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 7 →
All chapters:
1
2
3
4
5
6
7
8
9
10
11
12
13
14
15
16