bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Mark 7
Mark 7
Quechuan QXO (Biblia en Quechua del sur de Conchucos)
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 8 →
1
Juk kutim fariseukuna y ley yachatsikuqkuna Jesús kaqman Jerusalénpita aywayarqan.
2
Tsaychömi rikayarqan Jesúspa discïpulunkuna makinkunata mana awikur mikuykäyaqta.
3
Fariseukuna y Israel mayinkunaqa unay castankunapa costumbrinkunata cumplirmi mikuyänanpä makinkunatarä imaypis awikuyan. Mana awikurqa manam mikuyantsu.
4
Tsay costumbrikunata cumplirmi täzakunatapis, witsikunatapis, mankakunatapis [y catrikunatapis] mayllayan. Tsaynömi rantipakuyanqanpita kutirpis mikuyänanpä bäñakuyan. Tsaynöllam mas wakin costumbrinkunatapis cumpliyan.
5
Tsaymi fariseukuna y ley yachatsikuq runakuna Jesústa tapuyarqan: «¿Imanirtä discïpuluykikuna unay castantsikkunapa costumbrinkunata mana cäsur impüru makinkunawan mikuyan?»
6
Jesúsnam nirqan: «¡Allish tukuq runakuna! Rasun kaqtam Isaías qamkunapä qellqarqan. Tsay qellqanqanchömi nin: «Kay runakunaqa shimillanwanmi cäsuyämänanpä niyäman. Peru shonqunkunachöqa juktam yarpaykäyan.
7
Ninqäta yachatsiyänanpa rantinqa runakuna niyanqallantam yachatsiyan. Tsaymi adorayämanqanpis manakaqllapä kaykan».
8
«Isaías ninqannöllam qamkunapis Tayta Diospa mandamientunkunata cäsuyänaykipa rantin kikikikunapa costumbrikikunallata cumpliykäyanki. [Tsaymi witsikunatapis täzakunatapis püru kayänanpä mayllayankirä. Tsaynöllam wakin costumbrikunatapis ruraykäyanki]».
9
Mastam Jesús nirqan: «¡Costumbrikikunata cumplir Tayta Diospa mandamientunkunatachi cumpliykäyanki!
10
Moisésmi nirqan: «Mamaykita y papänikita alli rikanki». Tsaynöllam nirqan: «Pipis mamanta o papäninta mana respitaq kaqqa wanutsishqa katsun».
11
«Peru qamkunaqa yachatsirmi niyanki: «Mamaykita y papänikita yanapayta mana munarqa ninki: «Qamkunata yanapanäpä kaqkunata Tayta Diosta entreganäpämi awnirqü».
12
Tsaynö nirmi runakunata yachaykätsiyanki mamanta y papäninta mana yanapayänanpä.
13
Costumbrikikunata tsaynö yachatsirqa Tayta Diospa palabranta manakaqmanmi churaykäyanki. Tsaynöllam wakin costumbrikikunatapis yachaykätsiyanki».
14
Runakunata qayaskirnam Jesús nirqan: «Kay ninqäkunata llapayki shumaq tantiyakuyay.
15
Manam imatapis mikunqanpitatsu pipis impüru kaykan, sinöqa shonqunchö mana allita yarpanqanpitam.
16
[Rinriyuq kaqkunaqa ninqäkunata wiyakuyätsun]».
17
Tsaypitanam runakunata dëjaskir juk wayiman Jesús yaykurqan. Tsaychönam yachatsinqankunata tantiyatsinanpä discïpulunkuna rugayarqan.
18
Jesúsnam nirqan: «¿Qamkunapis manaku tantiyayanki runa imata mikurpis impüru mana kanqanta?
19
Mikunqantsikkunaqa manam shonquntsikmantsu yaykun, sinöqa pachantsikmanmi. Tsaypitanam päsan». Tsaynö nirmi Jesús tantiyatsirqan llapan mikuykunapis mikunantsikpä alli kanqanta.
20
Mastam nirqan: «Shonqunchö mana alli yarpanqankunam runata impüruyätsin.
21
Runakunaqa shonqunchö mana allikunata yarparmi fornicación jutsata rurayan, suwakuyan, wanutsinakuyan,
22
adulteriu jutsata rurayan, ambiciösu kayan, llullakuyan, achachäpakushqa kar penqakuypä jutsata rurayan, envidiakuyan, jukpa wasanta rimayan, yachaq tukuyan y llutankunata rurayan.
23
Tsay llapan mana allikuna shonqunkunapita yarqamurmi runakunata impüruyätsin».
24
Tsaypitanam Jesús aywarqan Tiro [y Sidón] markakuna lädupa. Tsayman chanqanta runakuna musyayänanta mana munarmi pakayllapa juk wayiman patsakurqan. Tsaynö pakakuptinpis runakuna musyayarqanmi tsaychö kaykanqanta.
25
Tsay markachömi juk warmipa warmi wamranta supay pasaypa ñakatsirqan. Jesús tsayman chanqanta musyaykurmi tsay warmi puntanman qonqurikuykur
26
wamranpita supayta qarqunanpä rugakurqan. Tsay warmi manam Israel warmitsu karqan, sinöqa jinan Sirofeniciapitam karqan.
27
Peru Jesúsnam nirqan: «Puntataqa Israel mayïkunatarämi yanapashä. Qamta yanaparqa wamrakunapa tantanta qechuskir allqukunata qaraqnömi käman».
28
Warminam nirqan: «Awmi, taytay. Tsaynö kaptinpis wamrakuna shushupakuyanqantam allqukunapis mikuyan».
29
Jesúsnam nirqan: «Allitam nirquyki. Wamraykita ñakatsiq supay yarqushqanam. Kananqa wayikipa kutikuy».
30
Wayinman kutirnam wamranta tarirqan allishqana cämanchö kaykaqta. Tsaynö allirqan supay yarqukushqana kaptinmi.
31
Tiro markapita Jesús aywakurnam Sidón marka kaq lädupa tumamur Decápolis provinciaman charqan. Tsaypitanam Galilea qocha kuchunman charqan.
32
Tsaychö kaykaptinmi upa runata payman pushayarqan. Chaykatsirmi Jesústa rugayarqan yataykur allïtsinanpä.
33
Tsaymi kikillanta jukläman pushaykur upapa rinrinman dëdunta Jesús jatirqan. Toqayninwan dëdunta ushmarkatsirmi upapa qalluntapis yatarqan.
34
Tsaynö ruraskirmi jamayninta kachaskir ciëluman ñukirkur: «¡Efata!» nirqan. (Efata ninanqa kichakay ninanmi.)
35
Tsaynö niptinmi jinan höra rinrin wiyarqan y parlar qallaykurqan.
36
Tsaynö alliskatsirmi tsaychö kaykaq runakunata Jesús nirqan allïtsinqanta pitapis mana willakuyänanpä. Kutin kutin tsaynö nikaptinpis pïmaytam willayarqan.
37
Allïtsinqanta rikarmi runakuna pasaypa kushikur niyarqan: «¡Llapantapis allitam ruran! ¡Allïtsiptinmi upakunapis wiyayan y mana parlaqkunapis parlayan!»
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 8 →
All chapters:
1
2
3
4
5
6
7
8
9
10
11
12
13
14
15
16