Micah 1

Quechuan QXO (Biblia en Quechua del sur de Conchucos)

Jump to: Chapter 2 →

1Moreset markachö täraq Miqueastam Tayta Dios revelacionkunachö rikatsirqan Samaria markata y Jerusalén markata ima päsananpä kanqanta. Tsaynö rikatsirqan Judá nacionchö Jotam, Acaz y Ezequías rey kaykanqan witsanmi.

2Maytsay markakunachö täraqkuna, Tayta Dios ninqanta llapaykikuna wiyayay. Poderyuq Tayta Diosmi sagrädu templunpita jutsata rurayanqaykipita shimpiyäshunki.

3Taykanqanpita shamurmi jirka puntakunapa purinqa.

4Jaruptinmi ninachö cëra tsulluqnö tsay jirkakuna tsullunqa. Pampakunapis atska yaku aywar raqratsanqannömi raqrayashqa quëdanqa.

5Llapan tsaykuna kanqa Jacobpita miraq runakuna jutsata rurayanqanpitam. Israel runakunam Samaria markachö jutsata ruraykäyan. Judá runakunapis Jerusalénchömi ïdulukunata adoraykäyan.

6Tayta Diosmi nin: «Samaria markata chipyaq juchutsiptïmi üvata plantayänallanpäna sirvinqa. Ruminkunata raqrapa qarputsiptïmi cimientullanna quëdanqa.

7Contrankuna shamurmi Samaria runakuna adorayanqan ïdulunkunatapis pasaypa pakir ushayanqa. Qerupita rurashqa sagrädu kaqkunatapis llapantam kayayanqa. Prostitütakuna gänapakuyanqan yuraq qellaywanmi tsay ïdulukuna ruratsishqa karqan. Contrankuna shamurmi tsay ïdulukunata tsullutsir qellayta fundiyanqa prostitütakunawan kakur pägayänanpä».

8Tayta Dios tsaynö castigananpä kanqanta musyarmi llakikurnin ikikyarrä waqaykä. Qalla chakilla y qallapächullam llakishqa puriykä. Chacal aullanqannömi pasaypa waqaykä. Avestruz qayaranqannömi qayaraykä.

9Samaria markapa qerinqa ima jampiwanpis manam allintsu. Tsay qeriqa Judátapis muyashqam. Judá mayïkuna täyanqan Jerusalénmanpis chashqam.

10Tsaytaqa Gat markachö runakunata ama willayaytsu. Desgracia päsamanqantsikta mana musyayänanpä ama waqayaytsu. Bet-le-afrachö täraq runakuna, pasaypa llakikur allpachö qoshpayay.

11Safirchö täraqkuna, nacionnikipitam jukläman qallapächullata prësu apayäshunki. Zaanánchö täraqkuna, yanapayäshunaykipä manam pipis yarqayämunqatsu. Beteselchö täraqkuna, waqayaptikipis manam pipis kuyapäyäshunkitsu.

12Marotchö täraq runakunaqa pipis salvananta munarmi pasaypa llakikuyanqa. Paykunamanqa desgraciallatam Tayta Dios mandamunqa. Tsay desgraciaqa Jerusalén marka punkuyaqmi chanqa.

13Laquischö täraq runakuna, qamkunam Israel nación runakunanö mas puntata Judá nacionchö jutsata rurayarqayki. Jutsata rurayänanpämi Sión runakunatapis qamkuna yachatsiyarquyki. Kananqa castïgum qamkunaman chämunqa. Tsay castïgupita qeshpiyänaykipä caballuykikunaman carrëtaykikunata watayay.

14Imaypis mana kutiyämunaykipä Moreset-gat markapita despidikuskir aywakuyay. Israel nacionpa mandaqnin reykunaqa Aczib marka runakunamanmi yärakuyan. Tsaynö yärakuyaptinpis Aczib runakunaman castïgu chaptin tsay reykunata manam imanöpapis yanapayanqatsu.

15Maresachö täraqkuna, qamkunata ushakätsiyäshunaykipämi contraykikunata mandamushä. Tsaymi Israel nacionchö mas rïcukunapis mantsarirnin qeshpir Adulam machayman pakakuyanqa.

16Jerusalénchö täraq runakuna, kuyay tsurikikunatam karu nacionman apayanqa. Tsaynö kaykaptinqa llakikurnin qalla putuypa rutukuyay. Wiskurnö kayänaykipä pükaypa pükar rutukuyay.

Jump to: Chapter 2 →