Micah 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Tsaypitam nirqä: ¡Jacobpita miraq runakunapa autoridäninkuna! ¡Israel runakunapa mandaqninkuna! ¡Shumaq wiyayämay! ¿Manaku tantiyayanki alli kaqta rurayänaykipä kanqanta?

2Qamkunaqa allikunata rurayänaykipa rantinmi mana allikunata ruraykäyanki. Tsaymi runa mayikipa qaranta shipriqnö y tullunpita aytsanta shipriqnö kaykäyanki.

3Tayta Dios kuyanqan runakunata mikuqnömi kaykäyanki. Qaranta shipriskir tullunta pakiqnömi kaykäyanki. Caldukuyänaykipä aytsanta roquqnömi maltrataykäyanki.

4Tsaynö kayanqaykipitam mañakuyaptikipis Tayta Dios yanapayäshunkitsu. Rabyanätsir jutsata rurayanqaykipita rikaytapis manam munayäshunkitsu.

5Llulla profëtakunam Tayta Dios kuyanqan runakunata engañaykäyan. Paykunaqa imatapis qaraq kaqpäqa bendición kananpä kanqantam niyan. Peru mana qaraq kaqpämi sïqa maldición kananpä kanqanta niyan. Tsay llulla profëtakunatam Tayta Dios nin:

6«Qamkunataqa imata ruranäpä kaqtapis manam musyatsiyäshaykinatsu. Imanö kananpä kaqtapis manam willayäshaykinatsu. Tsaymi tsakäpakushqanö kar imata willakuyänaykipä kaqtapis musyayankinatsu».

7Tsay llulla profëtakunaqa pasaypa penqakuychömi kayanqa. Tayta Dios mana tantiyatsiptinmi imata willakuyänanpäpis shiminkuna pashtanqatsu.

8Noqatam sïqa Tayta Diospa Espïritun yanapaykäman pay munanqannö willakunäpä. Tsaymi valornï kan Israel runakuna mana cäsukuq kayanqanta y jutsayuq kayanqanta mana mantsariypa willakunäpä.

9¡Jacobpita miraq runakunapa autoridäninkuna! ¡Israel runakunapa mandaqninkuna! ¡Shumaq wiyayämay! ¿Imanirtä demandukunata shumaq arreglayankitsu? ¿Imanirtä leykunatapis cumpliyankitsu?

10Tsaynö kayaptikim Jerusalénchö mana alli ruraykunalla y wanutsinakuylla kaykan.

11Autoridäkunapis qarayta apapaqnin kaqpam janan shäriyan. Sacerdötikunapis qellaypä raykurllam yachatsiyan. Profëtakunapis qellaypä raykurllam willakuyan. Tsaynö kaykarmi niyan: «Tayta Diosmi yanapaykämantsik. Manam ima desgraciapis päsamäshuntsu».

12Tsaynö kayanqaykipitam Sión jirkan imayka barbichashqa chakranö quëdanqa. Jerusalén markata ushakätsiptinmi raqällana quëdanqa. Templuta juchutsiyaptinmi jachakunallana tsaychö wiñanqa.

← Chapter 2 Jump to: Chapter 4 →