Micah 4

Quechuan QXO (Biblia en Quechua del sur de Conchucos)

← Chapter 3 Jump to: Chapter 5 →

1Shamuq watakunachömi Tayta Diospa wayin kaykanqan jirkanqa wakin jirkankunapita mas respitashqa kanqa. Tsaymanmi maytsay nacionpitapis Tayta Diosta adorayänanpä runakuna aywayanqa.

2Tsaynöllam Sión jirkanpita Tayta Diospa yachatsikuyninta maytsaymanpis apayanqa. Jerusalénpitam palabranta willakuyanqa. Maytsay nacionpita runakuna Jerusalénman aywarmi niyanqa: «Tayta Dios akranqan jirkanman llapantsik witsäshun. Jacobpita miraq runakuna yärakuyanqan Tayta Diospa wayinman yaykushun. Tsaychömi kikin yachatsimäshun mandamientunkunata imanö cumplinantsikpä kanqantapis. Tsaynöpam pay munanqannö llapantsik kawashun».

3Atska nación runakuna chikinakuyaptinpis Tayta Diosmi arreglanqa. Tsay nacionkuna jatun y may karuchö kaptinpis paymi juzganqa. Juk markawan juk marka guërrata manam rurayanqanatsu. Maytsaychöpis runakuna espädankunapitam takllatana ruratsiyanqa. Lanzankunapitanam ösita ruratsiyanqa. Guërrachö pelyayänanpäpis manam alistakuyanqanatsu.

4Tsaynö kaptinmi runakuna pitapis mana mantsaypa kawayanqa. Üva plantapa y hïgus plantapa chakinchö tranquïlum jamayanqa. Llapanta mandaq Tayta Diosmi tsaynö kananpä kanqanta nin.

5Wakin marka runakuna diosninkunaman yärakuyaptinpis noqantsikqa poderösu Tayta Diosnintsikmanmi imaypis yärakushun.

6Tayta Diosmi nin: «Tsay junaqmi chakin pakishqa y oqrakashqa üshakunata qoriqnö castiganqä Israel runakunata qorimushä.

7Chakin pakishqa üshanö kayaptinpis y juklä markaman qarqushqa kayaptinpis yanapashä markanman kutir munayyuq kayänanpämi. Tsaypitanam Sión jirkanpita imayyaqpis paykunapa mandaqnin rey kashä.

8«Sión marka, üshakunata rikachakuna törrinö karmi Tayta Dios kuyanqan runakunata alli rikaykanki. Qamqa yapaymi poderyuq kanki. Kuyanqä Jerusalénpitaqa yapaymi reykuna mandayanqa.

9Tsaynö kananpä kaykaptinqa ¿imanirtä wachay nanaywan qayaraq warminö qayaranki? ¿Manaku mandaqniki rey kan? ¿Yachaq runakuna wanushqaku?

10Tsaynö kaptinpis qamchö täraq runakunata jäkuq jirkakunapa prësu aparmi Babilonia nacionman chätsiyanqa. Ay Sión, tsaynö kananpä kaptinqa pasaypa llakikur wachay nanaywan qoshpaykaq warmi qayaranqannö qayaray. Juklä nacionman apayäshuptikipis contraykikunapa makinpitam Tayta Dios salvashunki».

11Kananqa atska nación runakunam qorikaskir contrayki shäriyashqa. Paykunam willanakur niyan: «¡Sión ushakaqta rikar kushipäshun!»

12Peru tsay runakunaqa manam tantiyayantsu Tayta Dios imata yarpanqantapis. Manam musyayantsu trïguta wirunanpä ëraman qoriqnö paykunata qorir castigananpä kanqanta.

13Tayta Diosmi nin: «Sión, trïguta trillar päjanta ushakätsiyanqannö tsay nacionkunata ushakätsiy. Noqam yanapashayki fiërru waqrayuq y bronci shilluyuq törunö kar atska nacionkunata ushakätsiyänaykipä. Tsaypitam suwar apayanqan riquëzankunata qorimunki. Tsaytanam kay patsapa duëñun kaptï noqa Tayta Diospä apamunki».

← Chapter 3 Jump to: Chapter 5 →