Micah 5

Quechuan QXO (Biblia en Quechua del sur de Conchucos)

← Chapter 4 Jump to: Chapter 6 →

1Jerusalén runakuna, defiendikuyänaykipä alistakuyay. Qamkunata atacayäshunaykipämi jäpa runakuna chäyämunqa. Paykunam vinciyäshurniki mandaq reyta cäranchö wiruyanqa.

2Belén Efrata marka, Judáchö wakin markakunapita mas takshalla kaptikipis qamchömi Israel runakunapa mandaqnin rey yurinqa. Payqa unaypitam kaykan.

3Warmi qeshyakunqanyaqllam contrankunapa makinchö Israel runakunata Tayta Dios jaqinqa. Wamra yuriskiptinnam Israel runakuna mashtakashqa kaykäyanqanpita kutiyämunqa.

4Tsay wamra wiñarkurnam Tayta Dios yanapaptin imayka üsha mitsiqnöpis kuyanqan runakunata shumaq cuidanqa. Maytsaychöpis runakuna payta adorayaptinmi Israel runakuna pitapis mana mantsaypa tranquïlu kawayanqa.

5Paymi salvamäshun tranquïlu kawanantsikpä. Tsay witsan Asiria runakuna markantsikta atacar palaciuntsikkunaman yaykamuptinpis michäyänanpämi atskaq capitankunata mandashun.

6Tsay capitankunam espädankunawan Asiria runakunata vincir poderninkunaman churayanqa. Tsaynöpam Nimrodpa markanpita salvamäshun.

7Jacobpita miraqkunata wakinta wanutsiyaptinpis kawaykar quëdaqkunaqa maytsay markakunachöpis respitashqam kayanqa. Shullyapis tamyapis Tayta Diospa bendicionnin kanqannömi paykunapis llapan marka runakunapä bendición kayanqa.

8Mayqan markapis contran shärir atacaptinqa chucaru ashmakunata león atacaqnörämi Israel runakuna atacayanqa. Malta león üshakunaman yaykuskir wanutsinqannömi paykunapis contrankunata wanutsiyanqa. Kawaykaqtaqa manam ni jukllayllatapis dëjayanqatsu.

9Tayta Dios, tsaynöpam Israel runakunapa llapan contrankunatapis ushakätsinki.

10Tsay contran runakunatam Tayta Dios nin: «Tsay junaqmi caballuykikunatapis chipyaq wanutsishä. Guërra carrëtaykikunatapis llapantam ushakätsishä.

11Markaykikunatapis y amparakuyänaykipä shäritsiyanqayki jatun wayikunatapis llapantam juchutsishä.

12«Brüjukunatapis llapantam ushakätsishä. Suerti rikaqkunapis qamkunachö manam kanqanatsu.

13Adorayanqayki ïdulukunatapis y juytu rumikunatapis ushakätsiptïmi kikikikuna rurayanqayki dioskunata imaypis adorayankinatsu.

14Asera diösapä jawiyanqayki raku qerukunatapis llapantam ushakätsishä. Markaykikunatapis chipyaqmi juchutsishä.

15Pasaypa rabyarmi mana cäsumaq runakunataqa may markachö täyaptinpis castigashä».

← Chapter 4 Jump to: Chapter 6 →