Ruth 1

Quechuan QXO (Biblia en Quechua del sur de Conchucos)

Jump to: Chapter 2 →

1Israel nacionchö juezkuna mandayanqan witsanmi pasaypa hambrüna karqan. Tsaymi Judá trïbu runakuna täyanqan Belén markapita juk runa warminta y tsurinkunata pushakurkur Moab nacionman aywakurqan.

2Tsay runapa jutinmi Elimelec karqan. Warminpa jutinmi Noemí karqan. Tsurinkunapa jutinkunam Mahlónwan Quelión karqan. Paykunam Judáchö Belén markapita Efrata casta runakuna kayarqan. Moabman chaykurmi tsaychö täyarqan.

3Moab nacionchö Elimelec wanuskiptinmi Noemí viüdayar ishkan wamrankunallawanna quëdayarqan.

4Tsay wamrankuna jövinyaskirmi Moab nación jipashkunawan churakäyarqan. Queliónpa warminpa jutinmi karqan Orfa y Mahlónpa warminpa jutinnam karqan Rut. Moab nacionchö chunka watana taykarmi

5Mahlón y Queliónpis wanukuyarqan. Runanpis y wamrankunapis wanuskiyaptinmi Noemíqa japallanna quëdarqan.

6Moab nacionchö kaykarmi Noemí musyarqan Israel runakunaman Tayta Dios bendicionninta churaptin mikuy shumaq wayunqanta.

7Tsaymi ishkan llumtsuyninkunata pushakurkur Moab nacionpita Judáman kutikurqan.

8Aywaykäyanqanchömi llumtsuyninkunata nirqan: «Mamaykikunapa wayinman kutikuyay. Noqata y wamräkunata alli rikayämanqaykipita Tayta Dios qamkunatapis yanapaykuyälläshuy.

9Tsaynölla Tayta Dios yanapaykuyälläshuy juk runawan churakar alli kawayänaykipä». Tsaypitam llumtsuyninkunata despidikur mutsarqan. Tsaymi llumtsuyninkuna pasaypa llakirnin waqar

10niyarqan: «Manam kutiyätsu. Markaykiman qamwan aywakushun».

11Peru Noemínam nirqan: «Kuyashqa wamralläkuna, kutikuyay. ¿Imapänatä qatiräyämankipis? Aywashqapis manam wamräkuna kanqanatsu shakshayaptin täyänaykipä.

12Wayikikunaman kutikuyay. Noqaqa chakwannam kä. Mananam runawan yapay churakäshänatsu. Kanan paqas runawan punur qeshyaq tikraptïpis

13shuyäyankimanräku wamrä yuriskir jövinyanqanyaq. Manam runaynaqllaqa quëdayankimantsu. Runätapis y wamräkunatapis Tayta Dios qechumaptinmi pasaypa llakishqa kaykä. Qamkuna noqawan aywar ñakayaptiki masrämi llakikushä».

14Tsaynö niptinmi llumtsuyninkuna pasaypa waqayarqan. Waqaykäyanqanpitam Orfaqa suegranta mutsaykur wayinpa kutikurqan. Peru Rutmi sïqa suegranwan quëdarqan.

15Ruttanam Noemí nirqan: «Llumtsuy mayikipis markaykikunaman kutikuykannam. Markaykikunachöqa diosnikikunapis kanmi. Qampis payllawan wallkinakur kutikuyay».

16Rutnam nirqan: «Mamïta, imata nimaptikipis manam jaqishaykitsu. Noqaqa qam aywanqaykipam aywashä. Maychöpis tanqaykichömi täshä. Markaykim markä kanqa. Diosnikim Diosnï kanqa.

17Maychöpis qam wanunqaykichömi noqapis wanushä. ¡Kawaykarrä dëjaskir aywakuptïqa mana kuyapaypa Tayta Dios castigamätsun!»

18Tsaynö niptinmi Noemíqa imatapis nirqannatsu.

19Tsaymi ishkan chäyarqan Belénman. Chäyaptinmi llapanpis kushikuyarqan. Warmikunapis juknin jukninmi niyarqan: «¡Noemími kutimushqa!»

20Tsaynam Noemí nirqan: «Kananqa amana Noemí niyämaynatsu. Tsaypa rantinqa Mara niyämay, llapanpä poderyuq Tayta Dios pasaypa castigamanqanpita.

21Kaypita aywakuyaptï runäpis wamräkunapis y imaykäkunapis karqanmi. Kananqa pasaypa waktsayashqam kutimurqü. Llapanpä poderyuq Tayta Dios tsaynö castigaykämaptinqa amana Noemí niyämaynatsu».

22Tsaynömi Moab nacionpita llumtsuynin Rutwan Noemí kutirqan. Paykunam Belénman chäyarqan cebäda cosëcha qallaykaptin.

Jump to: Chapter 2 →