Ruth 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Tsaypita juk junaqnam llumtsuyninta Noemí nirqan: «Hïja, manam runaynaqllaqa kakunkimantsu.

2Runäpa castanllarä kaptinmi Boozwan tätsiyta yarpaykä. Pallapakuq aywaptikipis payqa allim chaskishurquyki. Kanan paqasmi cebäda wayraq aywanqa.

3Qampis bäñakuskir allinnin kaq röpaykita jatikur y perfümitapis wiñakurkur ayway. Chaykurna pakaranki mikuyta upuyta ushanqanyaq.

4Mayninmanpis pununqanta shumaq rikaykur chakin kaqllaman punukuykunki. Tsaychönam qamwan tayta munarqa parlapäshunki».

5Rutnam nirqan: «Yätsimanqaykinöllam llapantapis rurashä».

6Tsaymi ëraman aywaykur suegran yätsinqannölla Rut rurarqan.

7Booznam tsay ërachö kushishqa mikuskir upuskir cebäda qoturaykanqan lädunman punurqan. Tsaychö punuykaptinmi qataranqanta yachayllapa qariskir Boozpa chakin kaqllaman Rut punukuykurqan.

8Pullan paqas rikcharkur Booz tikrakunqanchömi chakinchö warmi punuykanqanta tantiyaskirqan.

9Tsaymi tapurqan: «¿Pitä kanki?» Paynam nirqan: «Taytay, noqaqa Rutmi kä. Runäpa castan kaptikim costumbri kanqannö qorikamänaykita munä».

10Tsaynö niptinmi Booz nirqan: «Noemípa wamrankuna wanur ushakaptinpis tsay casta mana illakänanpä qamqa allim yarpachakurquyki. Tsaynö yarpachakunqaykipita Tayta Dios yanapaykulläshuy. Wakin warmikunanöpis karqa jövinwanmi pobri o rïcu kaptinpis tankiman karqan.

11«Hïja, ama llakikuytsu. Kay markachö llapanmi musyayan alli warmi kanqaykita. Tsaymi mañakamanqaykinö llapanta rurashä.

12Runaykipa castan kaptïpis jukrämi kaykan mas legïtimu kaq castan.

13Kananqa tsayllapa punukamuy. Waraymi musyashun tsay runa qorishunaykipä o mana qorishunaykipä kanqantapis. Pay qorishuptikipis allim kanqa. Mana qorishuptikiqa noqam qorikushayki. Ninqätaqa Tayta Dios wiyaykämanmi. Rasunpam awninqäta cumplishä».

14Tsay paqasmi Boozpa matkallanchö Rut punukurqan. Tsaychö pununqanta pipis rikananta Booz mana munaptinmi tsaka tsakalla Rut shärikurqan aywakunanpä.

15Manarä aywakuptinmi Booz nirqan: «Jakuykita mashtamuy cebädata qaranäpä». Tsaymi jakunta mashtaptin ishkay arröbatanö cebädata qararqan. Joqariparkuptinmi aparikurkur wayinman kutikurqan.

16Wayinman Rut chaykuptinmi suegran tapurqan: «Hïja, ¿imatatä Booz nishurquyki?» Tsaymi Rut willarqan Booz llapan ninqankunata.

17Tsaypitam nirqan: «Jinayllaqa ¿imanötä suegraykiman chanki?» nirmi kay cebädata qaramashqa».

18Tsaynö niptinmi Noemí nirqan: «Hïja, mä shuyäshun. Imanöshi kanqa. Nishunqaykita manarä rurarqa tsay runa jamaytapis manam tarinqatsu».

← Chapter 2 Jump to: Chapter 4 →