Ruth 4

Quechuan QXO (Biblia en Quechua del sur de Conchucos)

← Chapter 3 Jump to:

1Tsaypitanam marka yaykuna punkuman aywaykur Booz jamaraykaptin Rutpa runanpa mas legïtimu kaq castan päsaykarqan. Päsaykaqta rikaskirmi Booz qayaykur nirqan: «Shamuy parlanantsikpä». Tsaynö niptinmi tsay runa aywar jamaykurqan.

2Tsaypitanam tsay markachö täraq chunka mayor runakunata Booz qayaykatsir jamakuyänanpä nirqan.

3Castan runatanam nirqan: «Moab nacionpita kutimuq Noemími runanpa chakranta rantikuyta munaykan. Tsay chakraqa castantsik Elimelecpa kaqmi kaykan.

4Tsaymi mas legïtimu castan kaptiki qamta willä rantiyta munarqa kay mayor runakunapa puntanchö rantinaykipä. Mana rantiyta munarqa willamay noqapis castan kaykarqa rantinäpä». Tsaynö niptinmi tsay runa nirqan: «Rantishämi taytay».

5Tsaymi Booz nirqan: «Noemípa chakranta rantirqa Moab nacionpita shamuq viüda Rutwanpis churakänaykim. Tsaynöpam Rutpa wamran yurir wanuq runanpa tsurinnö kanqa tsay chakrapa duëñun kananpä».

6Tsaymi tsay runa nirqan: «Tsaynö kaptinqa manam rantiyta valurätsu. Rutwan churakaptïqa tsay rantinqä chakra manam herenciätsu kanqa, sinöqa paypa wamrallanpänam kanqa. Peru rantiyta munarqa qam rantiy».

7Tsay witsan Israel nacionchö pipis castanpa chakranta rantiyta mana munarqa chakra rantiyta munaq kaqtam llanqinta lloqtiskir entregaq. Tsaynöpam runakuna musyayaq llanqinta chaskiq kaqna chakrata rantinanpä kanqanta.

8Tsaymi llanqinta lloqtiskir Boozta makyar nirqan: «Castantsikpa chakranta qam rantiy».

9Tsaynö niptinmi Boozqa mayor runakunata y tsaychö kaykaq wakin runakunata nirqan: «Qamkuna rikaykäyankim Elimelecpa, Queliónpa y Mahlónpa chakranta Noemípita rantinqäta.

10Tsaynöllam qamkuna musyayanki Mahlónpa viüdan Rut noqapa warmïna kananpä kanqanta. Tsaynöpam Rutpa wamran Mahlónpa tsurinnöna kanqa y Mahlónpa chakranpis Rutpa wamranpana kanqa. Ninqäkunataqa llapaykim wiyaykäyanki».

11Tsaynö niptinmi mayor runakuna y tsaychö wakin runakunapis niyarqan: «Ninqaykitaqa llapantam wiyaykäyä. Tayta Dios bendicionninta Rutman churaykullätsun. Raquelpa y Leapa wamrankuna atska kanqannö paypapis wamrankuna atska kaykullätsun. Paykunapita miraqllam llapantsikpis Israel runakunaqa kaykantsik. Qamtapis Tayta Dios yanapaykulläshuy Efrata ninqan Belénchö pïmaypis respitayäshunaykipä.

12Tsaynölla Tayta Dios bendisaykulläshunki Tamarchö Judápa tsurin Farespita miraqkuna atska kayanqannö qampapis tsurikikuna Rutchö atska kayänanpä».

13Tsaynöpam Rutwan Booz churakarqan. Tayta Dios bendicionninta churaptinmi Rut qeshyaq rikakur ollqu wamrata qeshyakurqan.

14Tsaymi warmikuna Noemíta niyarqan: «¡ Tayta Dios alabashqa kaykullätsun! Paymi munashqa Rutpa wamran kananta. Tsay wamran willkaykinö kar Israel nacionnintsikchö respitashqa kaykullätsun.

15Chakwanyaptikipis tsay willkaykim yanapashunki y wätashunki. Kuyashuqniki llumtsuynikipa wamran karmi qanchis ollqu wamraykipitapis mas alli rikaykäshunki».

16Noemínam willkanta alläpa kuyar wätarqan.

17Tsaymi Noemípa vecïnankuna niyarqan: «¡Noemíqa wamran aparishqam puriykan!» Tsay wamratam jutitsirqan Obedta. Obedmi Isaípa papänin karqan. Isaínam Davidpa papänin karqan.

18Kaykunam Farespita Davidyaq miraqkuna kayarqan: Farespa tsurinmi Hezrón,

19Hezrónpa tsurinmi Ram, Rampa tsurinmi Aminadab,

20Aminadabpa tsurinmi Naasón, Naasónpa tsurinmi Salmón,

21Salmónpa tsurinmi Booz, Boozpa tsurinmi Obed

22y Obedpa tsurinmi Isaí. Isaípa tsurinnam David karqan.

← Chapter 3 Jump to: