Ruth 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Belén markachömi juk rïcu runa Booz jutiyuq karqan. Paymi Noemípa runan Elimelecpa castan karqan.

2Juk junaqmi Noemíta Rut nirqan: «Aywä cebäda segaqkuna shushupakunqanta pallapakamunäpä. Chakraman chaptïqa pillapis kuyapämanqam». Tsaynö niptinmi suegranqa nirqan: «Hïja, aywaptiki allim kanman».

3Tsaynö aywaykanqanchömi cebäda segaqkuna jaqiyanqankunata rikar pallapakuq yaykurqan. Tsay chakraqa suegrun Elimelecpa castan Boozpam kanä.

4Rut pallapakuykaptinmi markapita Booz chaykur llapan minkayninkunata saludar nirqan: «Tayta Dios yanapaykuyälläshuy». Tsaymi minkayninkunapis niyarqan: «Qamtapis Tayta Dios yanapaykulläshuy».

5Tsaymi segaqkunapa capatazninta Booz tapurqan: «¿Pipa tsurintä taqay jipash?»

6Capataznam nirqan: «Payqa Moab nacionpita Noemíwan shamuq jipashmi.

7Chaykamurmi pallapata pallakunanpä rugakamashqa. Wäraypitam mana jamaypa pallaykan. Tsayrämi jamapaykan».

8Tsaymi Rut kaqman witiykur Booz nirqan: «Cosëcha ushakanqanyaq kayllaman shakamunki sirviqnï jipashkunawan pallapakunaykipä. Juk runapa chakranmanqa ama aywankitsu.

9Cada wäray kutimur segayanqan qepallanpa pallapakunki. Minkaynï runakunatapis willarqünam mana michäyäshunaykipä. Yakunarqa uylluchö kaykaq yakuta upunki».

10Tsaynö niptinmi Rutqa urkunpis patsaman töpanqanyaq qonqurikuykur nirqan: «Päkillä taytay, jäpa warmi kaykaptïpis kuyapamanqaykipita».

11Tsaymi Booz nirqan: «Musyämi runayki wanuskiptin suegraykiwan alli kawanqaykita. Tsaynöllam musyä mamaykita, papänikita y markaykita dëjaskir kay jäpa markaman shakamunqaykita.

12Tsaynöllam musyä noqakuna yärakuyanqä Tayta Diosman yärakunqaykita. Llapanchöpis pay yanapaykulläshuy».

13Tsaynö niptinmi Rut nirqan: «Päkillä taytay, sirviqniki mana kaykaptïpis kuyapämanqaykipita».

14Almuerzu höranam Rutta Booz nirqan: «Kayllaman shakamuy añijashqa vïnuwan tantata mikunaykipä». Tsaynö niptinmi minkayninkuna jamakuyanqan kaqllaman Rut jamakurqan. Tsaychönam paytapis trïgu kamtsata Booz qararqan. Pacha junta mikuskiptinpis atskarämi sobrarqan.

15Tsaypitanam minkayninkunata Booz nirqan: «Manöjukunapitapis Rut pallaptin ama michäyankitsu.

16Tsaypa rantinqa pallakunanpä shushutsiyanki. Imanö pallapaptinpis paytaqa ama michäyankitsu».

17Tsay junaq patsa tsakanqanyaqmi Rut pallapakurqan. Tsay pallapakunqanta wiruskir wayraptinmi ishkay arröbanö yarqurqan.

18Tsayta apakurkur suegran kaqman chaykurmi pallapakunqan cebädata rikatsirqan. Tsaynöllam churakunqan mikuytapis suegranta qararqan.

19Tsaymi Noemíqa kushikurnin nirqan: «Hïja, ¿maychötä kaytsikata pallapakamurquyki? ¿Pitä kuyapäshurquyki tsaytsikata tarimunaykipä? Tsay kuyapäshuqniki runataqa Tayta Dios yanapaykullätsun». Rutnam nirqan: «Mamay, Booz jutiyuq runapa chakranchömi pallapakamurqü».

20Tsaynö niptinmi Noemí nirqan: «¡Boozqa runäpa castanmi kaykan! ¡Tsaynöllam pay yanapamänantsikpä kaykan! ¡Tayta Dios payta yanapaykullätsun! ¡Tayta Diosqa runätapis wamräkunatapis yanapanqannöllam kananpis yanapaykämantsik!»

21Rutnam nirqan: «Tsaynöllam nimashqa cosëcha ushakanqanyaq sirviqnin jipashkunawan pallapakamunäpä».

22Tsaynö niptinmi Noemí nirqan: «Hïja, tsaynö kaptinqa paykunallawan pallapakamuy. Chakran chakran puriptikiqa pipis burlakurpis burlakushunkimanmi».

23Tsaymi cebäda cosëchawan trïgu cosëcha ushakanqanyaq Boozpa chakrankunallachö Rut pallapakurqan. Tsay witsanqa suegranwan juntum taykäyarqan.

← Chapter 1 Jump to: Chapter 3 →